गेसोको टोली र नेपालका परराष्ट्रमन्त्रीबीच भेट: ८ जुनमा हुने वार्ता निष्कर्षमा पुग्ने विश्वास

गोर्खा

Home
गोर्खा
गेसोको टोली र नेपालका परराष्ट्रमन्त्रीबीच भेट: ८ जुनमा हुने वार्ता निष्कर्षमा पुग्ने विश्वास

गेसोको टोली र नेपालका परराष्ट्रमन्त्रीबीच भेट: ८ जुनमा हुने वार्ता निष्कर्षमा पुग्ने विश्वास

गोर्खा मिडिया संवाददाता बुधबार, जेठ १३, २०८३

काठमाडौँ । गोर्खा भूतपूर्व सैनिक संघ (गेसो) ले नेपालका परराष्ट्रमन्त्री शिशिर खनालसँग भेटवार्ता गरेको छ ।

बुधबार सिंहदरबारमा भएको भेटमा भूतपूर्व गोर्खाहरूको समस्या समाधानका लागि बेलायत र नेपाल सरकारबीच गोर्खाहरूको सहभागितामा हुने वार्तालाई परिणाममुखी बनाउने विषयमा छलफल भएको थियो ।

गेसोका सभापति कृष्णकुमार राई नेतृत्वको प्रतिनिधिमण्डलले बेलायत सरकारले २०० वर्षभन्दा बढी समयदेखि गोर्खाहरूमाथि गरेको विभेदपूर्ण व्यवहारबारे ध्यानाकर्षण गराएको हो । भेटका क्रममा गेसोले सन् २०४७ यतादेखि गोर्खा सैनिकले निरन्तर न्यायिक संघर्ष गर्दै आएको तथा नेपाली युवाले बेलायती सेनामा आफ्नो रगत बगाउँदा पनि समान अधिकारबाट वञ्चित हुनुपरेको विषय उठाएको जनाएको छ ।

गेसोले यो समस्या केवल भूतपूर्व गोर्खा सैनिकको मात्र नभई नेपाल र नेपालीको साझा मुद्दा भएको उल्लेख गर्दै आगामी वार्तामा नेपाल सरकारले गोर्खा सैनिकको पक्षमा स्पष्ट र प्रभावकारी भूमिका खेल्नुपर्ने माग गरेको छ । आगामी ८ जुनका दिन हुने उक्त मन्त्रीस्तरीय वार्ता निष्कर्षमा पुग्नेमा गोर्खाहरू विश्वस्त रहेको विज्ञप्तिमा जनाइएको छ ।

भेटका क्रममा परराष्ट्रमन्त्री खनालले गोर्खा सैनिकका समस्या र मागबारे जानकारी लिएको तथा आगामी वार्तालाई निष्कर्षमा पुर्‍याउन नेपाल सरकारका तर्फबाट आवश्यक पहल गर्ने प्रतिबद्धता व्यक्त गरेको गेसोद्वारा जारी प्रेस विज्ञप्तिमा उल्लेख छ ।

प्रकाशित मिति: बुधबार, जेठ १३, २०८३ २१:२१

प्रतिक्रिया दिनुहोस्