लन्डन । क्वीइन्स गोर्खा ईन्जिनियर्स पल्टनको ७७औं वार्षिकोत्सव भव्य रूपमा मनाइएको छ । शनिबार २७ सेप्टेम्बरमा फार्नबरोस्थित साम्युल कोडी स्पोर्ट्स कलेजमा रिटायर्ड क्याप्टेन तीर्थमान गुरूङ र उनका सहयोगीहरू (ए टीम) को संयोजनमा वार्षिकोत्सव आयोजना गरिएको हो ।
कार्यक्रमको सुरूमा क्याप्टेन रिटायर्ड चित्रबहादुर गुरुङले सुरक्षासम्बन्धी जानकारी गराएका थिए । त्यसपछि कार्यक्रम संयोजक क्याप्टेन रिटायर्ड तीर्थमान गुरुङलाई कार्यक्रम सञ्चालनका लागि माइक्रोफोन हस्तान्तरण गरिएको थियो ।
संयोजक गुरुङले यो वर्षभरि दिवंगत भएका सदस्यहरूप्रति १ मिनट मौनधारण गरेर उनीहरूका आत्माको चिरशान्तिको कामना गराएका थिए।
त्यस्तै गरी जीटुजीका प्रवक्ता तथा संयोजक मेजर जुदबहादुर गुरुङले गोर्खा भूपूहरूको सेवा सुविधासम्बन्धी के भइरहेको छ र अब के हुँदै छ भन्नेबारे जानकारी गराएका थिए ।
पल्टनका सदस्यहरूमध्ये जुमकाजी गुरुङग तमु धीं यूकेका अध्यक्ष, धनबहादुर गुरुङ धम्पुस समाज यूकेका अध्यक्ष र शिवराम गुरुङ बीईएम तमु धीं साउथ इस्ट रिजनलका अध्यक्षको गरिमामयी पदभार सम्हालेकामा उनीहरूलाई बधाई तथा सफल कार्यकालको शुभकामना पनि दिएका थिए ।
कार्यक्रममा सहभागी हुने सबैभन्दा अग्रज सदस्य रिटायर्ड स्टाफ सार्जन्ट तुलाराम गुरुङले रेजिमेन्टल बर्थ केक काटेका थिए भने रिटायर्ड लेप्टेन कर्णेल ह्यारिस म्याक्लोड साहेबले पाइप बजाएर पार्टी हलको परिक्रमा गरेका थिए ।
त्यसपश्चात् पल्टनको कमान्डिङ अफिसरबाट प्रकाशित स्पेसल रुटिन अर्डरलाई रिटायर्ड क्याप्टेन चित्रबहादुर गुरूङले पढेर सुनाएका थिए ।
त्यसरी नै मेजर रिटायर्ड डमर घले एमबीईलेले आयोजक टिमलाई विशेष धन्यवाद र उपस्थित सबैलाई धन्यवाद दिएका थिए । औपचारिक कार्यक्रमपश्चात् स्थानीय कलाकारहरूबाट विभिन्न नाच तथा गीतहरु प्रस्तुत गरिएको थियो ।
अन्तमा नेपालबाट आएकी कलाकार पवित्र गुरूङले सांगीतिक प्रस्तुति दिएर कार्यक्रममा मनोञ्जन प्रदान गरेकी थिइन् । भाग्यशाली चिठ्ठा गरेर कार्यक्रमको अन्त्य गरिएको थियो ।
