लन्डन । तमु समाज युकेले उत्तर पश्चिम लन्डनका नेपालीमूलका बालबालिकाहरुका लागि ४० हप्ते नेपाली भाषा कक्षा सुरु गरेको छ ।
नेसनल लोट्री फन्डको प्रायोजनमा तमु समाज युकेले २२ मार्च शनिबार आफ्नै सामुदायिक भवन बारहम पार्क सडबरिमा नेपाली भाषा कक्षा सुरु गरेको हो । तमु समाज युकेका अध्यक्ष बिन्दुकुमारी गुरुङ घलेले नेपाली बालबालिकाहरुलाई नेपाली पठ्यापुस्तक र कपि कलम नि:शुल्क वितरण गरी नेपाली भाषा कक्षाको समुद्घाटन गरेकी थिइन् । कक्षामा नेपाली संस्कृतिसमेत सिकाइने आयोजकले जनाएको छ ।
कार्यक्रममा तमु समाज युकेका संस्थापक अध्यक्ष चित्रबहादुर गुरुङ, वर्तमान कार्यसमितिका उपाध्यक्ष केदरबहादुर गुरुङ, महासचिव सुब घले, कोषाध्यक्ष चन्द्रकान्त गुरुङ, सल्लाहकार बिजु गुरुङ, नेपाली भाषा संचालकका संयोजन संस्थापक अध्यक्ष चित्रबहादुर गुरुङ र कोषाध्यक्ष चन्द्रकान्त गुरुङले गरेका छन् । नेसनल लट्रीफन्ड माग र लट्री फन्डको प्राप्त भएको रकम खर्च गर्ने र त्यसको सम्पूर्ण व्यवस्थापन मिलाउने कार्य पनि संस्थापक अध्यक्ष गुरुङ र कोषाध्यक्ष गुरुङले गरेका छन् ।
कार्यक्रममा शिक्षक अर्बिन्द्र श्रेष्ठ, बिबेक केसी, शिक्षिका कल्पना थापालगायत बालबालिका र उनीहरूका अभिभावकको बाक्लो उपस्थिति थियो ।
तमु समाज युकेले सन् २०२२ को जुलाईदेखि नै नेपाली भाषा कक्षा संचालन गर्दै आएको छ । यस पटकको नेपाली भाषा कक्षा संचालनमा नेसनल लोट्री फन्डद्वारा प्रायोजित भएकोले विशेष सुविधासहित कक्षा संचालन गरिने समाजका निवर्तमान अध्यक्ष शिवकुमार गुरुङले जानकारी दिए । उनका अनुसार भाषा कक्षाबाट धेरै जना बालबालिकाहरु लाभान्वित हुने आसा र बिश्वास लिइएको छ ।
विगतमा पनि संयोजक अर्बिन्द्र श्रेष्ठले बालबालिकाहरूलाई विभिन्न किसिमका पाठ्यपुस्तकहरू नि:शुल्क उपलब्ध गराउँदै आएका थिए । 'हाम्रो मुख्य उद्देश्य भनेको नेपाली बालबालिकाहरुले आफ्नो मातृभाषा बोल्न, लेख्न र पढ्न सकुन् भन्ने हो । यस विषयलाई सबैले मनन गरिदिनु भई आफ्ना बालबालिकाहरुलाई यो अवसरको सदुपयोग गरिदिनुहुन सबै अभिभावकहरूलाई आवाहन गर्दछु,' शिक्षक श्रेष्ठले भने ।
उनले ५ वर्षभन्दा माथिका बालबालिकाहरु नेपाली भाषा बोल्न, लेख्न र पढ्न, सिक्न सकिने बताए ।
