गोर्खाज् ईन्टेक १९८५ को ४० औं वार्षिकोत्सव नेपालमा मनाउन बेलायतमा अन्तिम बैठक

गोर्खा

Home
गोर्खा
गोर्खाज् ईन्टेक १९८५ को ४० औं वार्षिकोत्सव नेपालमा मनाउन बेलायतमा अन्तिम बैठक

गोर्खाज् ईन्टेक १९८५ को ४० औं वार्षिकोत्सव नेपालमा मनाउन बेलायतमा अन्तिम बैठक

गोर्खा मिडिया संवाददाता सोमबार, माघ ७, २०८१

लन्डन । आगामी ८ फेब्रुअरी २०२५ मा मनाइने गोर्खाज् ईन्टेक १९८५ को ४० औं वार्षिकोत्सवका लागि बेलायतमा अन्तिम बैठक बसेको छ ।

आइतबार १९ जनवरी २०२५ मा अल्डरसटस्थित ओजन रेस्टुरेन्टमा अध्यक्ष लाल लिम्बुको अध्यक्षतामा गोर्खाज ईन्टेक १९८५ को वार्षिकोत्सवसम्बन्धी अन्तिम पटक प्रत्यक्ष बैठक बसेको हो । यसअघि ईन्टेकको लगातार एक वर्ष हरेक महिनाको शुक्रबार जुमसभामार्फत विभिन्न विषयवस्तुमा छलफल हुँदै आएको थियो ।

४० औं वार्षिकोत्सवको लागि संयोजक समिति र कार्यसमितिको संयुक्त प्रयास र गृहकार्यपछि आइतबार बैठक बसेको संस्थापक शेरबहादुर सुनारले जानकारी दिए । १७ जनाको उपस्थिति रहेको बैठकमा केही विषयमा नेपाल पुगेपछि निर्णय गर्न सकिने भएकोले सोहीअनुसार कार्ययोजनाहरू अघि बढाउन छलफल भएको उनले जनाए छ ।

हालसम्म १४२ जना नम्बरी र बहिनीहरू पार्टीमा सहभागी हुने निश्चित भएको र नामावली आउने क्रम जारी रहेको जानकारी गराइएको छ । नामावली दर्ताका लागि जनवरी ३१ सम्म अन्तिम समयसीमा आजको सभाले निर्णय गरेको छ। त्यस्तै पारिवारिक पाहुनामा पूर्वनिर्णय गरेकोबाहेक आफ्नो खुन रिस्ता भएकालाई पनि पाहुनाको लागि ल्याउन सक्ने निर्णय गरिएको छ।

नेपाल पुगेपछि प्रमुख कार्यक्रमहरूमा ७ फेब्रुअरीमा होटल सोल्टीमा चेक इन् र सोही दिन ईन्द्रेणी कार्यक्रममा सहभागी हुने, भोलिपल्ट ८ फेब्रुअरीमा ४० औं वार्षिकोत्सव (Ruby anniversary) मनाउने र पर्सिपल्ट ९ फेब्रुअरीमा खाजानास्ता गरी छुट्ने तयारी छ । ईच्छुक नम्बरी साथै बहिनीहरूका लागि पोखरा भ्रमणको पनि योजना बन्दै गरेकोले त्यसबारे ९ फेब्रुअरीमा नै निर्णय लिने छलफल भएको छ ।

गोर्खाज् ईन्टेक १९८५ ले आफ्नो जन्मभूमिलाई सम्मान गर्दै पहिलो पटक नेपाल गएर आफ्नो परिवारका साथ ४० औं वार्षिकोत्सव मनाउने ईतिहासिक थालनी गर्ने जमर्को गरेको जनाउँदै यसमा सबै नम्बरी साथै परिवारको पनि ठूलो भूमिका रहने जनाइएको छ । आयोजक गोर्खाज् ईन्टेक १९८५ ले सबैजना मिलेर उक्त ऐतिहासिक कार्यक्रम सफल बनाउन सबैलाई अनुरोध गरेको छ ।