बेलायतमा रहेका राप्रपा अध्यक्षलाई नागरिकता र गोर्खा मुद्दाबारे एनआरएनए यूकेको ज्ञापन

गोर्खा

Home
गोर्खा
बेलायतमा रहेका राप्रपा अध्यक्षलाई नागरिकता र गोर्खा मुद्दाबारे एनआरएनए यूकेको ज्ञापन

बेलायतमा रहेका राप्रपा अध्यक्षलाई नागरिकता र गोर्खा मुद्दाबारे एनआरएनए यूकेको ज्ञापन

गोर्खा मिडिया संवाददाता बुधबार, असोज ९, २०८१

लन्डन । गैर आवासीय नेपाली संघ (एनआरएनए यूके) अध्यक्ष प्रेम गाहामगरले वंशजको नेपाली नागरिकता निरन्तरताका लागि पहल गर्न आग्रह गर्दै राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनलाई ज्ञापनपत्र बुझाएका छन् । नेपाली कांग्रेस र एमालेको बहुमत सरकारले संविधान संशोधन गर्ने चर्चा चलिरहेका बेला गाहामगरले गत आइतबार अल्डरसटमा आयोजित एक कार्यक्रममा लिङ्देनलाई ज्ञापन बुझाएका हुन् । राप्रपा केन्द्रीय नेताहरु यतिखेर बेलायत भ्रमणमा छन् । ज्ञापनमा एनआरएनए यूकेले विश्वभर छरिएर रहेका वंशजका नेपाली नागरिकहरुको मागको सम्बोधन गर्न, वंशजका नेपाली नागरिकलाई सधैंका लागि नेपाली नै रहिरहन दिनका लागि नेपालको नागरिकता ऐन २०६३ (पहिलो संशोधन २०७९) को दफा १०, उपदफा १ मा उल्लेख भएको विदेशी नागरिकता लिएपछि नेपाली नागरिकता कायम नरहने भन्ने प्रावधान संशोधन गर्न जोड दिइएको छ । गैरआवासीय नेपालीहरुलाई नेपालको वंशजको नागरिकताबाट वञ्चित गराउने खालका नेपालको संविधान तथा कानुनमा भएका असमान प्रावधानहरुलाई तुरुन्त परिवर्तन गरी गैरआवासीय नेपालीका लागि वंशजको नेपाली नागरिकता निरन्तरताको प्रत्याभूति गराउन गैरआवासीय नेपाली संघ यूकेको माग छ । नेपाल नागरिकता ऐन, २०६३ मा भएको संशोधनले गैरआवासीय नेपाली नागरिकताको व्यवस्था गरेपनि यो व्यवस्थाले पहिले नै प्राप्त नेपाली नागरिकताको निरन्तरता नहुने एनआरएनए यूकेको धारणा छ । साथै ज्ञापनमा गोर्खाहरु त्रिपक्षीय सन्धिअन्तर्गत भर्ती भएर आएकाले गोर्खा तथा निजका सन्ततिहरुको नेपाली नागरिकता कायमै रहने व्यवस्था गर्न पनि जोडदार माग छ । ज्ञापन बुझ्दै राप्रपा अध्यक्ष लिङ्देनले आफ्नो पार्टीको मूलमुद्दा पनि वंशजको नेपाली नागरिकता निरन्तरता भएकाले एनआरएनए यूकेको चासोलाई सम्बोधन गराउन पहल गर्ने प्रतिबद्धता व्यक्त गरेका थिए ।

प्रकाशित मिति: बुधबार, असोज ९, २०८१ ०८:५४

प्रतिक्रिया दिनुहोस्