बेलायतवासी नेपाली समुदायमा लोकप्रिय कार्यक्रम हो, नेपाली मेला । तमु धीं युकेले आयोजना गर्ने गोर्खाकपपछिको दोस्रो ठूलो कार्यक्रमका रूपमा लइन्छ नेपाली मेलालाई । खेलकुद, सांस्कृतिक कार्यक्रम र संस्कृति झल्काइने नेपाली मेलाको १५ संस्करण यही २५ अगस्ट २०२४ मा केम्पर्टनपार्कमा हुँदैछ । यस वर्षको नेपाली मेलाको तयारी लगायत विषयमा तमु धीं युकेका अध्यक्ष हरि गुरुङसँग गोर्खा मिडियाको हिँड्दाहिँड्दै शृंखलामा प्रबन्ध निर्देशक मिलन तमुले गर्नुभएको कुराकानी :
नेपाली मेलाको तयारी कसरी भइरहेको छ ?
हामीले १५ औं नेपाली मेलाको तयारी लगभग ८० प्रतिशत पूरा गरेका छौं । भेन्यू बुकिङ, स्टल लिने, १८ तारिखको पत्रकार सम्मेलनको तयारी भइसकेको छ । रेसकोर्सस्थित केम्पर्टनपार्क अथोरिटीसँग बसेर पनि कुरा भइसकेको छ । हामीले हरेक वर्ष अगस्ट बैंक होलिडेको अघिल्लो दिन आइतबार नेपाली मेला गर्ने गर्छौं । यस वर्ष २५ अगस्टमा परेको छ ।
नेपाली मेलाको यसपालिको विशेष आकर्षण के छ ?
विभिन्न संघसंस्थाले ल्याउने झाँकी विशेष हुन्छ । यस वर्ष झाँकी पहिलेभन्दा १ घण्टा अगाडि सारेका छौँ । पहिला-पहिला १२-१३ वटा संस्थाले मात्र झाँकी प्रस्तुत गर्थे । यसपालि अहिलेसम्म ३५ वटा संस्थाले आउने जानकारी गराइसक्नुभएको छ । अझै बढ्ने क्रममा छ । उपस्थित संस्थालाई समय दिन पनि हम्मे छ । समय भयो भने सौजन्य केही नाच तथा गीत हुन सक्छ । त्यसपछि संस्कृति झल्काउने नृत्यको प्रतियोगिता हन्छ ।
स्टलका लागि कसलाई सम्पर्क राख्न सकिन्छ ?
यसका लागि वरिष्ठ उपाध्यक्ष जुमकाजी गुरुङलाई सम्पर्क गर्न सक्नुहुन्छ । वेबसाइटमा पनि उहाँको नम्बर छ । अथवा हामीलाई पनि सम्पर्क गर्न सक्नुहुन्छ । तर, स्टलको पनि लगभग सबै स्पेस सकिएको छ ।
इन्ट्री शुल्क कति छ ?
इन्ट्री शुल्क गाडीको ५ पाउन्ड र मान्छेको ५ पाउन्ड हो । यो पहिलादेखिकै शुल्क हो ।
समय कति छ ?
मेलाको समय १० बजेदेखि बेलुका ८ बजेसम्म हो ।
बेलायतका लागि नेपाली राजदूत पनि परिवर्तन हुँदै छ । दूतावासबाट केही सहयोग आएको छ ?
दूतावासबाट यत्ति नै भन्ने छैन । सहयोगको अपेक्षा राखेका छौँ । केही न केही हुन्छ नै । उहाँहरूसँग बैठक पनि बसिसकेका छौँ । पहिलेको राजदूत फर्किसक्नुभएको छ । नयाँ आउनुभएको छैन । जो भए पनि दूतावासको प्रमुख जो हुन्छ । उहाँ नै हाम्रो प्रमुख अतिथि हुन्छ ।
नेपाली मेला गोर्खा कपपछिको ठूलो इभेन्ट हो । यसमा आर्थिक व्यवस्थापन कसरी गर्नुहुन्छ ?
हामीले स्पोन्सरहरू खोज्छौँ । स्वतःस्फूर्त रूपमा चन्दा दिने दाता पनि हुनुहुन्छ । अलिअलि इन्ट्री शुल्कबाट पनि हुन्छ । तर यसपालि भेन्यूको भाउ ५० प्रतिशतले बढेको छ । त्यसैले खर्च म्यानेज गर्न निकै गाह्रो छ । सकेसम्म मिलाएर गर्ने प्रयासमा छौँ ।
मेलाबारे पत्रकार सम्मेलन कहिले हुँदै छ?
पत्रकार सम्मेलन यही १८ अगस्टमा तमु धीं भवन मिचेटमा हुँदै छ । त्यसक्रममा मेलाको तयारी र सञ्चालनबारे विस्तृत रुपमा जानकारी गराउनेछौं ।
नेपाली मेलाको उद्देश्य सबै नेपालीलाई एकै स्थानमा संस्कार संस्कृति र भेषभूषा देखाउनु रहेको छ । यसमा नेपालीमात्रै आउन् जस्तो लाग्छ कि गैह्र नेपाली पनि आउन् जस्तो लाग्छ ?
हाम्रो उद्देश्य यहाँको ब्रिटिस कम्युनिटीलाई पनि सहभागी गराउने हो । माथिल्लो ओहदाको व्यक्तिहरूलाई बोलाउँछौं । उहाँहरू आउनु पनि हुन्छ । तर साधारण जनताचाहिँ अपेक्षाअनुरूप आउनुभएको छैन । जे भए पनि विदेशी भूमिमा हाम्रो संस्कार संस्कृति र भेषभूषाको जगेर्ना गर्नु हो । हामीले गरेको कामले सार्थकता पाएको छ भन्ने लाग्छ । तपाईंहरूले आएर मेला भर्दिनु भो र रमाइलो गर्दिनु भो भने त्यो तपाईंले तिरेको शुल्क परोपकारी काममा नै जाने हो । त्यसैले उक्त दिनका लागि चुले निम्तो दिन चाहन्छु ।
यो मेलाको भविष्य कस्तो देख्नुभएको छ?
मेलाको आकर्षण यही रूपले बढ्दै जाने हो भने त्यो भेन्यू अपुग हुन सक्छ । त्योभन्दा ठूलो भेन्यू खोज्नुपर्छ कि भन्ने लागेको छ । धेरै मान्छेहरू मेला भर्न र किनमेलका लागि पनि आउने गर्नुहुन्छ । भविष्यमा फरक ढंगले सोच्नुपर्छ कि भन्ने लागेको छ । अन्त्यमा ‘मेला भरौँ, नेपाली संस्कार र संस्कृति जोगाऔँ’ भन्दै मेलामा उपस्थितका लागि अनुरोध गर्छु ।
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
-1731591869.jpg)
![धामीको चरित्र निभाउन सजिलोचाहिँ पक्कै थिएन : माओत्से गुरुङ [अन्तर्वार्ता]](https://gurkhamedia.com/uploads/posts/Messenger_creation_82D7EC6F-80A8-442C-BA30-03CBBA0D96F7-1731684941.jpeg)
