लन्डन । दक्षिण एसियाको पहिलो होमस्टे गाउँ सिरुबारीबाट बेलायत आई बसोबास गरिरहेका नेपालीहरुको संस्था सिरुबारी गाउँ यूकेको दसैं, तिहार कार्यक्रम भव्य रुपमा सम्पन्न भएको छ ।
साउथ ह्यारोस्थित स्पोर्ट्स एन्ड सोसियल क्लबमा शनिबार ११ अक्टुबरका दिन दसैं, तिहार कार्यक्रम सम्पन्न भएको हो । सिरुबारी गाउँ यूकेका अध्यक्ष डेभिड गुरुङ र ज्येष्ठ सदस्य निर्मला गुरुङले संयुक्त रुपमा दीप प्रज्वलन गरेर कार्यक्रम उद्घाटन गरेका थिए । उद्घाटनपछि नेपालको राष्ट्रिय गान गाइएको थियो ।
कुशल सञ्चालक महासचिव धनबहादुर गुरुङले सञ्चालन गरेको कार्यक्रममा समाजका पितृहरू साथै देशका दिवंगत पितृहरूको चीरशान्तिको कामना गर्दै दीप प्रज्वलन गरेर सामूहिक प्रार्थना गरिएको थियो । नेपालबाट आएका प्रख्यात कलाकारद्वय जुनाश्रीस मगर र तीलक गुरुङका साथ सबैले बुद्ध प्रार्थना गाएर कार्यक्रमलाई भावनात्मक र धार्मिक वातावरणमा रंगिन तर अलग विशेषता भएको माहोल सिर्जना गरिएको आयोजकले जनाएको छ । कलाकारहरूको प्रस्तुतिसँगै उपस्थित समुदायले पितृहरूलाई सामूहिक श्रद्धाञ्जली अर्पण गरेका थिए ।
सोही कार्यक्रमको अवसरमा कार्यसमितिलाई पूर्णता दिइएको थियो । कार्यसमिति अध्यक्षमा डेभिड गुरुङ, उपाध्यक्षहरूमा नवराज गुरुङ र तेजमान गुरुङ, धनबहादुर गुरुङ महासचिव, रङ्गना गुरुङ कोषाध्यक्ष चयन भएका छन् ।
सदस्यहरुमा सन्तोष गुरुङ, कृष्ण गुरुङ, सुजन गुरुङ र नवीन गुरुङ चयन भएका छन् । त्यस्तैगरी विजयबहादुर गुरुङ, रुद्रबहादुर गुरुङ, प्रकाश गुरुङ र तोरण गुरुङ सल्लाहकारमा चयन भएका छन् भने महिला चेलीबेटीको संयोजक जेकी गुरुङ चयन भएकी छन् ।
उक्त दिनमा डा.संयोग गुरुङ, सिनियर म्यानेजर रङ्गना गुरुङ, कर्पोरल पुकार गुरुङ र डब्लूओवान वसन्त गुरुङ, चार्टर्ड एकाउन्ट सुचित्रा गुरुङ, सिनियर वार्ड सिस्टर सृष्टी गुरुङ र डा. विनय गुरुङ ज्वाईंलाई समाजद्वारा सम्मान गरिएको थियो ।
जुनसुकै कार्य गर्दा पनि आर्थिक पक्षको ठूलो भूमिका हुन्छ । सिरुबारी नासाको यो पहिलो कार्यक्रममा आफ्नो जन्मभूमि र माटोलाई माया गर्ने व्यक्तित्वहरू (सदस्यहर र चेलीबेटीहरू)ले खुलेर समाजलाई सहयोग गरेका छन् । उक्त दिनको कार्यक्रम खर्च १ हजार ६४० पाउन्ड भुक्तानी गरेर २ हजार ७०६ पाउन्ड बचत भएको अध्यक्ष डेबिट गुरुङले जानकारी दिए ।
कार्यक्रममा राखिएको खेलका लागि पहिलो पुरस्कार सुनको चन्द्रमा जय श्रीकृष्ण जेवलरीले प्रायोजन गरेको थियो । गाउँघर परिवारमा दु:ख परेकोले ती खेलहरू स्थगित गरिएको थियो । आयोजकले प्रायोजक जय श्रीकृष्णलाई धन्यवाद दिँदै अर्को कार्यक्रमको लागि उक्त पुरस्कार सुरक्षित साथ राखिएको जनाएको छ ।
कार्यक्रममा अध्यक्ष डेबिड गुरुङकी धर्मपत्नी बीना गुरुङले पिउने पानी प्रायोजन गरेकी थिइन् । प्रशस्त र मिठो, स्वादिलो खानापिन धनबहादुर गुरुङ गोर्खा किचेनबाट व्यवस्था भएको थियो भने फोटोग्राफरको भूमिका पुकार गुरुङले निभाएका थिए ।
दसैं-तिहार पर्वलाई परदेशमा पनि जन्मभूमिको माटोसँगको सम्बन्ध र एकताको भावनासँग जोड्दै नेपाली परम्परा, सिरुबारी गाउँको संस्कार र संस्कृतिलाई जोगाउने उद्देश्यका साथ केही समय आगडि खडा भएको सामाजिक कुराहरू व्यक्त गर्दै समाजका अध्यक्ष डेभिड गुरुङले उपस्थित सबैलाई धन्यवाद दिए ।
समाजको अन्य कुराहरू सबैको साथ, सहयोग, आपसी मेलमिलाप र सरसल्लाहले समाज अझ सशक्त हुने महासचिव धनबहादुरले बताए ।
परदेशमा तथा स्वदेशमा जहाँ बसे पनि जन्मभूमिको माया, समुदायबीचको एकता, सहयोग, आपसी सद्भावले सबैलाई एकै थलोमा ल्याएर सांस्कृतिक, धार्मिक र सामुदायिक एकतालाई थप बलियो बनाएर इमानदारीतापूर्वक सेवा गरे सबैको हित हुने सोँपाल समाजका संस्थापक अध्यक्ष विजयबहादुर गुरुङले बताए ।
विदेशी भूमिमा बसोबास टाढा भए तापनि कार्यक्रममा स्थानीय समुदाय, चेलीबेटी तथा विभिन्न क्षेत्रका प्रतिनिधिहरूको उत्साहजनक सहभागिता रहेको थियो ।
