समाचार कक्षबाटै पत्रकार पक्राउ परेको घटनाप्रति प्रमुख दल र सञ्चार क्षेत्रको तीव्र विरोध

मातृभूमि नेपाल

Home
मातृभूमि नेपाल
समाचार कक्षबाटै पत्रकार पक्राउ परेको घटनाप्रति प्रमुख दल र सञ्चार क्षेत्रको तीव्र विरोध

समाचार कक्षबाटै पत्रकार पक्राउ परेको घटनाप्रति प्रमुख दल र सञ्चार क्षेत्रको तीव्र विरोध

गोर्खा मिडिया संवाददाता शनिबार, कात्तिक १४, २०८३

पोखरा । समाचार संकलन र सम्प्रेषणकै विषयलाई लिएर कार्यकक्षबाटै पत्रकारहरूलाई नियन्त्रणमा लिने प्रहरीको कदमविरुद्ध प्रमुख राजनीतिक दलहरूले कडा आपत्ति जनाएका छन्। शुक्रबार प्रहरीले पत्रकारहरू विश्वमणी सुवेदी, शोभराज बराल र धीरज बस्नेतलाई समाचार कक्षमार्फत पक्राउ गरेको थियो भने अर्का एक पत्रकारलाई खोज्दै नयाँ पत्रिकाको कार्यालय समेत पुगेको थियो।

यस घटनाप्रति विरोध जनाउँदै सत्तारुढ राष्ट्रिय स्वतन्त्र पार्टी (रास्वपा) का प्रवक्ता जगदीश खरेलले समाचारकै कारण धरपकड गरिनु संविधानले प्रत्याभूत गरेको प्रेस तथा अभिव्यक्ति स्वतन्त्रताविपरीत हुने बताए। यस्तै, नेपाली कांग्रेसका महामन्त्री प्रदीप पौडेलले सञ्चारगृहमाथिको हस्तक्षेपलाई सर्वसत्तावादी प्रवृत्तिको पराकाष्ठा भन्दै यस्तो निगरानी तुरुन्त बन्द गर्न आग्रह गरे। नेकपा एमालेका महासचिव शंकर पोखरेलले बिनापूर्जी नागरिक पक्राउ गरेर राज्यका अंगहरूलाई भयभीत बनाउनु फासीवादको संकेत भएको टिप्पणी गरे। त्यसैगरी, नेपाली कम्युनिस्ट पार्टीका प्रमुख सचेतक युवराज दुलालले सादा पोशाकमा मिडिया कार्यालयहरूमा छापा मार्नु स्वतन्त्र पत्रकारितामाथिको राज्य आतंक भएको भन्दै पक्राउ परेका पत्रकारहरूको विना शर्त रिहाइ माग गरे।

यसैबीच नेपाल पत्रकार महासंघ, नेपाल प्रेस युनियन, प्रेस चौतारी नेपाल, प्रेस सेन्टर नेपाललगायत पत्रकारका विभिन्न संघसंस्थासँगै अग्रज पत्रकारले पनि विरोध गरिरहेका छन्।

प्रकाशित मिति: शनिबार, कात्तिक १४, २०८३ १०:११

प्रतिक्रिया दिनुहोस्