काठमाडौं । गोर्खा मिडिया यूकेका सहसम्पादक प्रकाश गुरुङले संस्थाको छैटौँ वार्षिकोत्सवका अवसरमा ‘अवार्ड अफ एक्सिलेन्स’ बाट सम्मानित भएपछि अवार्डस्वरूप प्राप्त गरेको २० हजार रुपैयाँ रसुवा भोटेकोसी बाढीपीडित परिवारको सहयोगार्थ प्रदान गरेका छन् । पत्रकारितामार्फत समाजका आवाज उजागर गर्दै आएका गुरुङले सम्मानबाट प्राप्त रकमसमेत विपद्पीडितको राहतका लागि समर्पित गरेर सामाजिक उत्तरदायित्वप्रतिको आफ्नो प्रतिबद्धता प्रस्तुत गरेका हुन् ।
गोर्खा मिडिया यूकेको छैटौँ वार्षिकोत्सव तथा सम्मान कार्यक्रममा गुरुङलाई पत्रकारितामा लामो समयदेखि पुर्याउँदै आएको योगदान, व्यावसायिक निष्ठा, सम्पादकीय इमानदारी र जिम्मेवार पत्रकारिताप्रतिको प्रतिबद्धताको कदर गर्दै ‘सर्टिफिकेट अफ एक्सिलेन्स’ प्रदान गरिएको हो । सन् २०२६ सेप्टेम्बर २७ मा जारी सम्मानपत्रमा उनको पत्रकारिताप्रतिको समर्पण र संस्थाको विकास तथा प्रतिष्ठा अभिवृद्धिमा पुर्याएको योगदानको प्रशंसा गरिएको छ ।
पत्रकारितामा प्राप्त सम्मानलाई व्यक्तिगत उपलब्धिमा मात्र सीमित नराखी विपन्न प्रभावित परिवारको सहयोगमा उपयोग गर्नु गुरुङको सामाजिक सेवाप्रतिको दृष्टिकोणको उदाहरण बनेको छ ।
अवार्डको रकमसहित ४५ हजार ४५० रुपैयाँ सहयोग
गुरुङले बाढीपीडितका लागि प्रदान गरेको २० हजार रुपैयाँमा बेलायत निवासी विक्रम गुरुङले १० हजार १५० रुपैयाँ तथा काठमाडौंको लाजिम्पाट निवासी क्याप्टेन होमबहादुर गुरुङ र कृष्णकुमारी गुरुङले १५ हजार ३०० रुपैयाँ थप सहयोग गरेका थिए । तीनै पक्षबाट प्राप्त कुल ४५ हजार ४५० रुपैयाँ भोटेकोसी बाढीबाट प्रभावित तीन परिवारलाई जनही १५ हजार १५० रुपैयाँका दरले वितरण गरिएको थियो ।
सहयोग प्राप्त गर्ने परिवारमा कुमार बुढाथोकी मगरकी श्रीमती श्रीजना मगर, इन्द्रबहादुर खत्रीकी श्रीमती उषा खत्री र प्रेमकुमार बुढाथोकी मगरकी श्रीमती मुना मगर रहेका छन् ।
फ्लाई एभरेस्ट होलिडेजका म्यानेजर कटक तामाङले प्रभावित परिवारका सदस्य तथा बालबालिकालाई काठमाडौंको बौद्धस्थित रामनगरमा रहेको कार्यालयमा उपस्थित गराई सहयोग रकम हस्तान्तरण गर्ने व्यवस्था मिलाएका थिए । सो अवसरमा क्याप्टेन होमबहादुर गुरुङको हातबाट रकम हस्तान्तरण गरिएको थियो ।
यस सहयोगले व्यक्तिगत पहल, विदेशमा रहेका नेपालीको सद्भाव र स्थानीय सामाजिक सहकार्यलाई एउटै अभियानमा जोडेको छ ।
प्रकाश गुरुङको सामाजिक सेवाप्रतिको प्रतिबद्धता यसपटकको सहयोगमा मात्र सीमित छैन । उनले यसअघि सन् २०२२ मा गोर्खा मिडियाबाट अवार्डस्वरूप प्राप्त गरेको २० हजार रुपैयाँ नुवाकोटस्थित पञ्चकन्या स्कुललाई प्रदान गरेका थिए ।
आफूले प्राप्त गरेको सम्मानको आर्थिक मूल्यलाई शिक्षा र मानवीय सहयोगमा लगाउने उनको अभ्यासले पत्रकारितालाई समाचार सम्प्रेषणमा मात्र सीमित नराखी समाजसँग जोड्ने प्रयासलाई प्रतिबिम्बित गर्छ । विशेषगरी विपद्का समयमा प्रभावित परिवार, महिला तथा बालबालिकालाई सहयोग पुर्याउन व्यक्तिगत रूपमा अघि सर्नु सामाजिक उत्तरदायित्वको सकारात्मक उदाहरण हो ।
सम्मानलाई सेवामा रूपान्तरण गर्ने यस्तो पहलले समाजप्रति उत्तरदायी पत्रकारिताको महत्त्व उजागर गर्नुका साथै स्वदेश तथा विदेशमा रहेका नेपालीबीच मानवीय सहयोग, एकता र सहकार्यको भावना अभिवृद्धि गर्न प्रेरणा दिने अपेक्षा गरिएको छ ।
