लन्डन । तमु धीं यूकेको आयोजनामा विगतमा झैँ लन्डनमा हुने १७औँ नेपाली मेलाको तयारी पूरा भएको छ ।
आइतबार, २३ अगस्टमा मिचेटस्थित आफ्नै भवन पत्रकार सम्मेलन गरी आयोजकले मेलाको तयारी पूरा भएको जनाएको हो । ‘हाम्रो संस्कृति, हाम्रो पहिचान, हाम्रो गौरव’ नाराका साथ मेला ३० अगस्ट, २०२६ का दिन लन्डन केम्पटन पार्क रेस कोर्स मैदानमा हुनेछ ।
लन्डनस्थित नेपाली दूतावासको सहकार्यमा मेला हुन लागेको हो । प्रमुख अतिथि बेलायतका लागि नेपाली कार्यवाहक राजदूत विपिन दुवाडी हुनेछन् । अन्य नेपाली तथा विदेशी कूटनीतिक पाहुनासमेत सहभागी हुने आयोजकको अपेक्षा छ ।
महासचिव डा. विशाल गुरुङले सञ्चालन गरेको कार्यक्रममा वरिष्ठ उपाध्यक्ष परशु गुरुङले स्वागत मन्तव्य राखेका थिए । मिडिया सेक्रेटरी एसके गुरुङले पत्रकारहरूको परिचयसहित स्वागत गरे भने अध्यक्ष जुमकाजी गुरुङ, आमा समूह अध्यक्ष कमलादेवी गुरुङ र उपाध्यक्ष एवं मेला संयोजक कमल कोने गुरुङले सम्मान गरेका थिए ।
नेपालबाट आएका समाजसेवी तथा कलाकार, काउन्सिलर उत्तरबहादुर गुरुङ, आमा समूहकी संस्थापक अध्यक्ष तथा एनआरएनए यूके पूर्वअध्यक्ष पुनम गुरुङ, तमु धीं यूके पूर्वअध्यक्ष रामचन्द्र गुरुङ लगायतलाई पनि विशेष सम्मान गरिएको थियो ।
पत्रकार सम्मेलनमा संस्थाका संस्थापक अध्यक्ष मीनप्रसाद गुरुङ, पूर्वअध्यक्षहरू रामचन्द्र गुरुङ, ज्ञाम गुरुङ, ट्रष्टी सूर्य गुरुङ, प्रमुख सल्लाहकार एकेन्द्र गुरुङ, लन्डन इकाई अध्यक्ष भरत गुरुङलगायत पदाधिकारी तथा सदस्य उपस्थित थिए ।
संस्थाका उपाध्यक्ष एवं मेला संयोजक कमल कोने गुरुङले मेलाबारे जानकारी गराए । मेला नेपाली कला संस्कृति र पहिचानको उत्सवका रूपमा मनाइन लागेको उनको भनाइ थियो । मेला बिहान १० बजेदेखि साँझ ८ बजेसम्म सञ्चालन हुनेछ ।
विभिन्न जातजातिका मौलिक संस्कृति, भेषभूषा, परम्परा, रहनसहन झल्कने झाँकीसहित सांस्कृतिक कार्यक्रम प्रस्तुत गरिनेछ । खाना तथा अन्य व्यापारिक र च्यारिटीका स्टल एवं हेल्थ क्याम्पसमेत रहनेछन् ।
संयोजक गुरुङका अनुसार यसवर्ष बेलायतस्थित ४२ नेपाली संघसंस्थाले मेलाको झाँकीमा भाग लिनेछन् । नृत्य प्रतियोगितासमेत हुनेछ । औपचारिक कार्यक्रम बिहान ११.२० बजे उद्घाटन हुनेछ ।
झाँकी र नृत्य प्रतियोगितामा विजेता टिमले १ हजार ५०० पाउन्डको एम्बासडर कप पाउनेछन् । यसअघि १ हजार १०० पाउन्ड रहेको थियो । यस्तै, फस्ट र सेकेन्ड रनरअपले क्रमशः ७०० र ५०० पाउन्ड पाउनेछन् ।
सोही अवसरमा हुने एनआरएनए कपको विजेतालाई ५०० पाउन्ड दिइनेछ । यसअघि ३०० पाउन्ड रहेको थियो ।
कुल ७५ स्टल मेला सम्पन्न गर्न करिब ६१ हजार पाउन्ड खर्च हुने संयोजक गुरुङले बताए । उनका अनुसार, मेलाबाट करिब ६४ हजार पाउन्ड आम्दानी हुने अपेक्षा गरिएको छ । बालबालिका र वृद्धवृद्धालाई नि:शुल्क प्रवेशको व्यवस्था हुनेछ । वयस्कले भने ५ पाउन्ड प्रवेश शुल्क तिर्नुपर्नेछ ।
पत्रकार सम्मेलनमा बोल्दै तमु धीं यूकेका अध्यक्ष जुमकाजी गुरुङले मेला सफल बनाइदिन सञ्चारकर्मीसहित सबैमा आग्रह गरे ।
-1786899352.jpg)
