पोखरा । बेलायतको अल्डरसटस्थित प्यालेस रेस्टुरेन्टमा १४ अगस्ट, २०२६ तारिखका दिन ‘उल्टो सुल्टो ६९’ को विशेष पुनर्मिलन कार्यक्रम सम्पन्न भयो ।
सन् १९६० को दशकको अन्त्य र ७० को दशकको सुरुवाततिर मलेसियाको केदाहस्थित टीडीबीजी सुङ्गाई पटानीमासँगै सेवा गरेका ५७ नम्बरी र उनीहरूका परिवार यस सुखद जमघटमा सहभागी भएका थिए । दशकौँअघि मलेसियाको भूमिमा गाँसिएको यो मित्रता समयको अन्तरालसँगै झन् प्रगाढ बनेको यस कार्यक्रमले पुष्टि गरेको छ ।
कार्यक्रमको सुरुवात निकै भावुक र चुनौतीपूर्ण क्षणको स्मरणबाट गरिएको थियो । दिवंगत भएका नम्बरी र उनीहरूका जीवनसाथीको सम्मानमा मिनेट मौनधारण गरिएको थियो । लास्ट पोस्ट र रिभेलीको धुनसँगै गरिएको उक्त स्मरणले उपस्थित सबैलाई भावुक बनाएको थियो । त्यसपछि पुरानो रोलकल (नामावली) मार्फत सदस्यहरूलाई सुङ्गाई पटानीका ती पुराना दिनहरूको सम्झनामा फर्काइएको थियो । रमको स्वादसँगै पुराना कथा र अनुभवहरू साटासाट गर्दा हलभित्र आत्मीयता र नोस्टाल्जिया छाएको थियो ।
औपचारिक छलफलका क्रममा गोर्खा पेन्सनको मुद्दाले पनि प्राथमिकता पायो । नेपाल र बेलायत सरकारबीच भइरहेको जीटूजी (G2G) वार्ताका बारेमा सहभागीहरूले चासो व्यक्त गरे । नेपाल सरकारको सकारात्मक भूमिका र भइरहेको निरन्तरको लबिङले चाँडै नै न्यायोचित र समान पेन्सनको नतिजा ल्याउनेमा सबै सदस्यहरूले आशा व्यक्त गरे । पुनर्मिलनको माहोललाई थप उत्साहजनक बनाउन साङ्गीतिक र मनोरञ्जनात्मक कार्यक्रमहरू समावेश गरिएका थिए ।
राष्ट्रिय गायिका रेजिना परियारको गायनमा सहभागीहरू झुमेका थिए भने आशा मणि प्रधानले पनि आफ्नो सुमधुर स्वरमार्फत सबैलाई मन्त्रमुग्ध पारेकी थिइन् । मनोरञ्जनका लागि राखिएका ‘किल द र्याट’, ‘म्याच द आइटम्स’ र ‘तोम्बोला’ जस्ता खेलहरूमा सहभागीहरूले निकै उत्साहका साथ भाग लिए । कार्यक्रमका लागि ५९६४३ र श्रीमती कल्पना शर्माले दुई बोतल ह्विस्की प्रायोजन गरेका थिए, जसमध्ये एउटा सामूहिक उत्सवका लागि र अर्को पुरस्कारका रूपमा वितरण गरिएको थियो ।
पर्दा पछाडि बसेर कार्यक्रम सफल पार्न विभिन्न सदस्यहरूले महत्त्वपूर्ण भूमिका निभाएका थिए । ९४५७ ले आर्थिक हिसाबकिताब चुस्त राखेका थिए भने ९५९६ ले ब्यानर तथा सजावटको जिम्मा लिएका थिए । केही सदस्यहरूले हल व्यवस्थापनमा स्वयंसेवी रूपमा सहयोग गरेका थिए । यस पटकको कार्यक्रमबाट २२९ पाउन्ड बचत भई अर्को वर्षका लागि सुरक्षित गरिएको छ ।
‘उल्टो सुल्टो’ परिवारको आगामी भेट सन् २०२७ अगस्ट १३, शुक्रबारका दिन रिडिङस्थित टीपीएलएसयूके (TPLSUK) कम्युनिटी सेन्टरमा हुने तय भएको छ । कार्यक्रमको अन्त्यमा उदयबहादुर गुरुङ (एमबीई) ले सबैलाई धन्यवाद दिँदै सफल कार्यक्रम समापन गरेका थिए ।
-1786899352.jpg)
