बेलायतमा 21 Jambhala Empowerment and Dharma Deshana कार्यक्रम भव्यताका साथ सम्पन्न

कर्मभूमि बेलायत

Home
कर्मभूमि बेलायत
बेलायतमा 21 Jambhala Empowerment and Dharma Deshana कार्यक्रम भव्यताका साथ सम्पन्न

बेलायतमा 21 Jambhala Empowerment and Dharma Deshana कार्यक्रम भव्यताका साथ सम्पन्न

गोर्खा मिडिया संवाददाता सोमबार, जेठ २५, २०८३

बेलायत । बेलायतको अल्डरसटस्थित एम्पायर हलमा ७ जुन २०२६ का दिन '21 Jambhala Empowerment and Dharma Deshana' कार्यक्रम भव्य रूपमा सम्पन्न भयो । बुद्धिस्ट गुम्बा रिडिङ युकेको आयोजनामा भएको उक्त विशेष आध्यात्मिक समारोहमा क्याब्जे ग्याङखाङ रिन्पोछेको पावन उपस्थिति रहेको थियो।

आध्यात्मिक ऊर्जा र शान्तिको सन्देश प्रवाह गरिएको उक्त कार्यक्रमलाई संस्थाका महासचिव कमल गुरुङले सञ्चालन गरेका थिए। कार्यक्रमको सुरुमा वरिष्ठ उपाध्यक्ष कृष्ण गुरुङले स्वागत मन्तव्य राखेका थिए भने समापनको अवसरमा अध्यक्ष इन्स्पेक्टर खेम गुरुङले उपस्थित सम्पूर्णमा धन्यवाद ज्ञापन गरे।

कार्यक्रमको प्रारम्भमा रिन्पोछेलाई बेलायती शैलीमा ब्यागपाइपर (Bagpiper) बजाएर हलभित्र स्वागत गरियो । करिब ४ मिनेटसम्म ब्यागपाइपरको धुनसँगै गरिएको उक्त स्वागतपछि रिन्पोछेले बौद्ध परम्पराअनुसार दीप प्रज्वलन गरी विधिवत रूपमा पूजापाठ गरे। सो अवसरमा उनले बुद्ध धर्म र यसको ऐतिहासिक महत्वका बारेमा विशेष प्रवचन (Dharma Deshana) दिए। प्रवचनका क्रममा उनले बुद्ध धर्मको उत्पत्ति स्थल नेपाल भएको र यो भारत तथा तिब्बत हुँदै कसरी फैलिएको थियो भन्ने विषयमा प्रकाश पारे। उनले नेपाललाई एक स्वच्छ र पवित्र भूमिका रूपमा व्याख्या गर्दै बुद्ध धर्मको महत्वमाथि जोड दिए।

समारोहमा हजारौँको संख्यामा उपस्थित श्रद्धालु भक्तजनहरूले रिन्पोछेबाट 'वाङ' (Wang) अर्थात् २१ जम्भलाको अभिषेक ग्रहण गरे। बेलायतमा रहेका बौद्ध धर्मावलम्बी र अन्य श्रद्धालुहरूको उल्लेख्य सहभागिता रहेको यो कार्यक्रमले नेपाली संस्कृति र बौद्ध दर्शनलाई प्रवासमा पनि जीवन्त राख्न मद्दत पुर्याएको आयोजकले बताएको छ ।

21-Jambhala-Empowerment-and-Dharma-Deshana-Photo-1-1780935503.jpg