बेलायतमा भव्य रूपमा गोर्खा स्मृति दिवस मनाइने तयारी

कर्मभूमि बेलायत

Home
कर्मभूमि बेलायत
बेलायतमा भव्य रूपमा गोर्खा स्मृति दिवस मनाइने तयारी

बेलायतमा भव्य रूपमा गोर्खा स्मृति दिवस मनाइने तयारी

गोर्खा मिडिया संवाददाता शुक्रबार, चैत २७, २०८२

बेलायत । लन्डनस्थित थरक नेपाली (गोर्खा) समुदाय (टीएनजीसी) ले आगामी २६ अप्रिल २०२६ मा 'गोर्खा स्मृति दिवस' मनाउने भएको छ।

संस्थाका अध्यक्ष एवं कार्यक्रमका मुख्य संयोजक किशोर लिम्बुका अनुसार यस वर्षको स्मृति दिवस आइतबारका दिन विशेष कार्यक्रमका साथ आयोजना गरिँदैछ। एसेक्सको पफ्लीटस्थित रोयल गनपाउडर म्यागजिन नम्बर ५, सेन्चुरियन वे थिम्समा हुने यो कार्यक्रम बिहान साढे ९ बजेबाट औपचारिक रूपमा सुरु हुनेछ।

कार्यक्रमको तालिकाअनुसार १०:१५ बजे गोर्खा रेजिमेन्टल परेड प्रदर्शन गरिनेछ भने १०:४५ बजे स्मृति सेवा सञ्चालन हुनेछ। त्यसैगरी, ११ बजे वीर गोर्खाहरूको सम्मानमा दुई मिनेट मौन धारण गरेर ११:०५ मा स्मारकमा माल्यार्पण गर्ने कार्यक्रम तय गरिएको छ। कार्यक्रमलाई सम्बोधन गर्दै टीएनजीसीका अध्यक्ष लिम्बुले ११:३५ मा गोर्खा स्मृति दिवसको औचित्य, गोर्खालीहरूको अतुलनीय योगदान र नेपाल-बेलायतबीचको ऐतिहासिक सम्बन्धबारे चर्चा गर्नेछन्। ११:४५ मा बुगलद्वारा 'अन्तिम पोस्ट' धुन बजाएपछि मध्यान्ह १२ बजे कार्यक्रमको समापन गरिने आयोजकले जानकारी दिएका छन्।

अध्यक्ष लिम्बुले यो दिवस केवल एक परम्परा मात्र नभई आफ्ना पुर्खाहरूको साहस, त्याग र निस्वार्थ भावनाको सम्मान भएको बताए। विश्व शान्तिका लागि ज्यान अर्पण गर्ने वीरहरूको योगदानलाई कहिल्यै बिर्सन नहुने र आफ्नो पहिचान जोगाउनु सबैको कर्तव्य भएको उनले उल्लेख गरे। उनले सबैलाई एकता र कृतज्ञताका साथ सहभागी हुन आह्वान गर्दै उपस्थितिले वीरहरूको सम्मानमा थप अर्थ राख्ने कुरामा जोड दिए। कार्यक्रममा सहभागी हुन चाहनेहरूका लागि बिहान ८:५० बजे ग्रेजस्थित जब सेन्टरबाट गोर्खा स्मारक स्थलसम्म निःशुल्क बस सेवाको समेत व्यवस्था गरिएको छ।

प्रकाशित मिति: शुक्रबार, चैत २७, २०८२ ११:४३

प्रतिक्रिया दिनुहोस्