लन्डन । बेलायतमा आफ्नै डेरामा मृत्यु भएका नेपाली विद्यार्थी २६ वर्षीय योमन चन्दको शव नेपाल पठाउन थालिएको सहयोग संकलनमा शनिबार बिहानसम्म झन्डै ११ हजार पाउन्ड जम्मा भएको छ ।
'गो फन्ड मि'बाट थालिएको सहयोग संकलनमा यो समाचार तयार पार्दासम्म १० हजार ७९८ पाउन्ड उठेको हो । उक्त रकम संघसंस्था र व्यक्ति गरी ४१८ जना दाताले दिएका हुन् । सहयोग समितिले १५ हजार पाउन्ड उठाउने लक्ष्य राखिएको छ । सबभन्दा बढी सहयोग एनआरएनए स्कटल्यान्डले ५०१ पाउन्ड दान दिएका छन् ।
एक वर्षअघिमात्र अध्ययनका लागि बेलायत आएका सल्यानको दार्मा गाउँपालिका ४ निवासी चन्दको गत मंगलबार बिहान निधन भएको थियो । युनिभर्सिटी अफ हर्टफोर्डसायरमा एमएससी कम्युनिकेसन्स एन्ड इन्फर्मेसन इन्जिनियरिङ अध्ययनका लागि आएका चन्दले आफ्नो पढाइ पूरा गरेर यसै साता सर्टिफिकेट लिने योजना बनाएका थिए ।
उनक शव नर्थविक पार्क हस्पिटलमा राखिएको र कोरोनरको रिपोर्ट आएपछि निकटस्थलाई हस्तान्तरण गरिने जनाइएको छ । स्वर्गीय योमनका बुवा शेरबहादुर चन्द तथा आमा ओइली चन्दले आफ्नो छोराको मुख हेर्न शव नेपाल नै पठाई दिन अनुरोध गरेपछि सहयोग संकलन अभियान सुरु गरिएको एनआरएनए यूकेका अध्यक्ष राजेन्द्र पुडासैनीले बताए ।
बिहीबार बर्न्टओक नेपाली समाजका अध्यक्ष खमिरजंग गुरुङलगायत पदाधिकारीहरु र स्वर्गीय योमनका साथी तथा नातेदार समेतको उपस्थितिमा योमनका बुवा आमासँग सम्पर्क गरी नेपाली समुदायले सहयोग संकलन गरी शव नेपाल पठाउन पहल गर्ने निर्णय गरिएको थियो ।
बैठकले 'वन विन्डो' प्रक्रियाबाट सहयोग संकलन गरी शव नेपाल पठाउने कामको संयोजन तथा अनुगमन गर्न एनआरएनए यूकेका अध्यक्ष पुडासैनी, बर्न्टओक नेपाली समाजका अध्यक्ष खमिरजंग गुरुङ, समाजका उपाध्यक्ष मुरारी थापा, समाजकै कम्युनिटी हेल्थ एन्ड वेलबिइंग कोअर्डीनेटर सुषमा गुरुङ, भाइ (फुपूको छोरा) सुजन शाह, बहिनी सोनम रावत, साथीहरु मनोज कुँवर तथा प्रमिला नेपाली रहेको एक समिति पनि गठन गरेको छ ।
समितिले निम्न 'गो फन्ड मि' लिंकमा गएर सक्दो सहयोग गर्न बेलायतस्थित नेपाली संघसंस्था तथा सबै नेपालीहरुलाई अनुरोध गरेको छ ।
