लन्डन १२ नोभेम्बर २०२५ । बेलायतमा अध्ययन गर्न आएका २६ वर्षीय योमन चन्दको सुतेकै अवस्थामा मृत्यु भएको छ ।
नेपालको सल्यानमा २९ जनवरी १९९९ मा जन्मेका चन्द मंगलबार बिहान ११ नोभेम्बरमा लन्डन एजवेयरमा मृत भेटिएका हुन् । चन्द बस्ने कोठा नजिकै बस्ने अर्का विद्यार्थी सुजन साह ठकुरीका अनुसार चन्द सोमबार राति लन्डन घुमेर फर्किएका थिए ।
गत वर्षदेखि हार्डफोर्डसायर युनिभर्सिटीमा कम्युनिकेसन एण्ड इन्फोमेसन इन्जिनियरिङ अध्ययन गरिरहेका चन्द नर्थ लन्डनमा बस्दै आएका थिए ।
एनआरएनए यूके अध्यक्ष राजेन्द्र पुडासैनीले परिवार, विश्वविद्यालय र उनका साथीहरुसँग सल्लाह गरी अन्त्येष्टीको प्रबन्ध गरिने जनाउनुभयो । ‘हामी स्वर्गीय चन्दको परिवारका लागि आर्थिक, नैतिक सहयोगका साथ समुदायमा जनचेतना जगाउने कार्यमा अझ बढी सक्रिय हुन्छौं,’ अध्यक्ष पुडासैनीले भन्नुभयो, ‘नेपालबाट आएका विद्यार्थी भाइबहिनीहरुले अहिले धेरै समस्या भोगेका छन् । बसाइँ, जागिर, मानसिक स्वास्थ्य, सुरक्षा आदि । उनीहरुमा जनचेतना जगाउन अत्यन्त खाँचो देखिएको छ । हामी सबै यसमा लाग्न जरुरी छ ।’
यसैबीच,फार्नबोरोबाट एक नेपाली हराएका छन् । ३२ वर्षीय प्रदीप शाही आइतबार (नोभेम्बर ९) बिहान करिब १०:३० बजेदेखि बेपत्ता भएका हुन् । उनको अवस्थाबारे परिवार, साथीभाइ र स्थानीय निकायले गम्भीर चासो व्यक्त गरेका छन् । प्रदीपको खोजीका लागि स्थानीय प्रहरीले ‘अर्जेन्ट’ अपिल जारी गरेको छ ।
प्रदीप करिब ५ फिट ६ इन्च अग्लो, छोटो घुम्रेको कालो कपाल भएका र हल्का ढल्किएर हिँड्ने बानीका रहेको प्रहरीको अपिलमा छ । उनी अन्तिम पटक खैरो ट्रयाकसुट, हरियो ज्याकेट र खैरो ऊनीको टोपी लगाएको अवस्थामा देखिएका थिए । ह्याम्पसायर प्रहरीका प्रवक्ताले अपिलमा भनेका छन्, ‘हामी जसले प्रदीपलाई देखेका छन् वा उनी कहाँ छन् भन्ने कुनै जानकारी छ भने तुरुन्त सम्पर्क गर्न अनुरोध गर्छौं । उनको परिवार र साथीहरू अत्यन्तै चिन्तित छन् ।’
जानकारी हुने जो कोहीलाई ९९९ नम्बरमा फोन गरेर रेफरेन्स नम्बर ४४२५०५०७४१६ उल्लेख गरि सम्पर्क गर्न प्रहरीले आग्रह गरेको छ ।
