लन्डन । सेन्ट्रल लन्डनको ह्वाइटहलस्थित सेनोताफमा आइतबार (नोभेम्बर ९) सम्पन्न वार्षिक रिमेम्ब्रेन्स सन्डे परेडमा ब्रिटिस गोर्खा वेलफेयर सोसाइटी (BGWS) का अध्यक्ष मेजर (रि.) टिकेन्द्र दल देवान जे.पी.को नेतृत्वमा ५० सदस्यीय टोलीले गौरवपूर्ण उपस्थिति जनायो ।
करिब १० हजार सहभागी रहेको उक्त बृहत् परेडमा BGWS का प्रतिनिधिहरू फार्नबोरो, अल्डरसट, फोक्सटन, आसफोर्ड र लन्डन क्षेत्रबाट आका थिए । बिहान साढे नौ बजे भेट्रेन परिवारका सदस्यहरू होर्स गार्ड्स परेड ग्राउन्डमा भेला भई तयारीमा जुटे र पौने दश बजे समूहगत रूपमा ह्वाइटहलतर्फ अघि बढे । यसपटक BGWS “सी–२” कोलममा थियो ।
११ बज्न केही मिनेट हुँदा राजा चार्ल्स तेस्रो र राजपरिवारका सदस्यहरू परेड स्थलमा आइपुगेपछि दुई मिनेटको मौनता पालना गरियो । त्यसपछि रोयल मरिन्सका बिउ्ग्लरले लास्ट पोष्टको धुन बजाए । राजा चार्ल्सले सेनोताफमा पहिलो रिथ (wreath) अर्पण गर्दै कार्यक्रमको औपचारिक सुरुवात गरे । पछि राजकुमार विलियम, प्रधानमन्त्री सर कीयर स्टार्मर, कन्जरभेटिभ नेतृ केमी बेडेनोक, फरेन सेक्रेटरी युभेट कुपर, होम सेक्रेटरी साबना महमुद, कमनवेल्थका विशिष्ट व्यक्तिहरू, र लन्डनस्थित नेपाली दूतावासका उपनियोग प्रमुख विपिन दुवाडीले पनि रिथ अर्पण गरे ।
कार्यक्रममा पूर्व प्रधानमन्त्रीहरू जोन मेजर, टोनी ब्लेयर, गोर्डन ब्राउन, डेभिड क्यामरुन, ट्रिजा मे, बोरिस जोनसन, लिज ट्रस र ऋषि सुनक समेतको उपस्थिति उल्लेखनीय रह्यो । पहिलो महिला अर्चबिसप अफ क्यान्टबरी सारा मुलालीले मन्त्रोच्चारण गर्दै कार्यक्रम सञ्चालन गरिन् ।
रिथ अर्पणपछि सुरु भएको मार्च पासमा BGWS टोलीले अनुशासित रूपमा सहभागिता जनायो। सेनोताफ नजिक पुग्दा दर्शकहरूबाट ताली र “We are proud of you!” भन्ने आवाज गुन्जिएको थियो । संस्थाका परेड कमान्डर टेक थापाले "आइज लेफ्ट" गरे ।
अध्यक्ष देवानले ब्रिटिस लिजियनका प्रतिनिधिलाई रिथ हस्तान्तरण गरेपछि समूहले पार्लियामेन्ट स्ट्रिट हुँदै होर्स गार्ड्स परेड ग्राउन्डमा पुगेर पहिलो चरणको परेड सम्पन्न गर्यो ।
त्यसपछि टोली रक्षा मन्त्रालय अगाडि रहेको गोर्खा मूर्तिसम्म पुगेर श्रद्धाञ्जली अर्पण गर्यो । अध्यक्ष देवानले रिथ अर्पण गरे । कृष्ण राईले पाइप धुन, र ओम थापाले BGWS को स्ट्यान्डर्ड बोकेर कार्यक्रमको शोभा बढाए ।
कार्यक्रमपश्चात् सामूहिक तस्बिर खिचिएपछि सदस्यहरू आ–आफ्नो गन्तव्यतर्फ लागे । अल्डरसट,फार्नबोरो समूहले प्रिन्सेस गार्डेनस्थित भीसी कुलबिर थापा मूर्तिमा आइ रिथ अर्पण गरी गोर्खा भवन, फार्नबोरोमा आयोजित फ्रेस मिसिङ खाएर कार्यक्रम सम्पन्न गर्यो ।
अध्यक्ष देवानले सबै सहभागीप्रति आभार व्यक्त गर्दै BGWS को निरन्तर सेवा भावना र गोर्खा समुदायको सम्मानप्रति प्रतिबद्धता दोहोर्याए ।
