लन्डन । तमु समाज यूकेले सिटी अफ लन्डनमा आयोजित प्रतिष्ठित ‘द लेडी मेयर्स शो’मा ऐतिहासिक सहभागिता जनाएको छ ।
शनिबार, ८ नोभेम्बरमा भएको शोमा समाजले सहभागिता जनाएर नेपाल र तमु समुदायको तर्फबाट गौरवपूर्ण प्रदर्शन गरेको हो ।
संस्थाका अध्यक्ष बिन्दु घले गुरुङको नेतृत्वमा १० जना महिला प्रतिनिधिले एसियाली समूहको तर्फबाट नेपालको झन्डा, संस्कृति र समुदायको पहिचान गर्वका साथ प्रस्तुत गरेका थिए ।
समाजका संस्थापक अध्यक्ष चित्र बहादुर गुरुङ, उपाध्यक्षहरू भीम बहादुर गुरुङ, केदार बहादुर गुरुङ र कोषाध्यक्ष चन्द्रकान्ता गुरुङलगायत पदाधिकारीको उपस्थितिले कार्यक्रमलाई थप उत्साहमय बनाएको थियो ।
लन्डनकी ६९७औँ तथा पहिलो लेडी मेयर अफ लन्डन डेम सुसन ल्याङ्ली (Dame Susan Langley DBE) को कार्यकाल आरम्भसँगै आयोजना गरिएको शोमा हजारौँ दर्शक उपस्थित थिए ।
तमु समाज यूकेको झाँकीले नेपालको झन्डा र तमु समुदायको सांस्कृतिक पहिचान प्रस्तुत गर्दा दर्शकले जोस र उत्साहका साथ स्वागत गरेका थिए ।
कार्यक्रमको अन्त्यमा अध्यक्ष बिन्दु घले गुरुङले सहभागी र सहयोगीहरूलाई धन्यवाद ज्ञापन गरिन् । ‘यो दिन तमु समाज यूकेको इतिहासमा गर्वको क्षणका रूपमा सदैव स्मरणीय रहनेछ,’ उनले भनिन् ।
लन्डनकी ६९७औँ मेयर डेम सुसन ल्याङ्ली (Dame Susan Langley DBE) निर्वाचित भएकी हुन् । उनले यसअघि Aldgate Ward बाट प्रतिनिधित्व गरेकी थिइन् ।
उनी ८०० वर्षको इतिहासमा तेस्रो महिला मेयर हुनुका साथै ‘लेडी मेयर अफ लन्डन’ उपाधि पाउने पहिली महिला हुन् ।
नवनिर्वाचित लेडी मेयरले ७ नोभेम्बरमा हुने Silent Ceremony मा पदभार ग्रहण गरेकी थिइन् । त्यसको भोलिपल्ट Lady Mayor’s Procession मार्फत Westminster पुगेर राजाप्रति निष्ठा शपथग्रहण गरिन् ।
सो अवसरमा हुने तीन माइलभन्दा लामो भव्य झाँकीमा विभिन्न देशका समुदायले आफ्ना संस्कृति, पोसाक र परम्परा प्रस्तुत गरेका थिए ।
Lord Mayor’s Show विश्वकै सबैभन्दा पुरानो, लामो र लोकप्रिय नागरिक झाँकी हो । यसको सुरुवात १३औँ शताब्दीमा भएको हो ।
जब राजा जोनले City of London लाई आफ्नै मेयर चयन गर्ने अधिकार प्रदान गरे । यसमा एउटा सर्त राखिएको थियो । जसअन्तर्गत हरेक नयाँ मेयरले आफ्नो पदभार ग्रहणपछि Westminster पुगेर राजाप्रति निष्ठा शपथग्रहण गर्नुपर्छ ।
त्यस युगदेखि आजसम्म निरन्तर जारी यो परम्परा विश्वकै सबैभन्दा प्रसिद्ध नागरिक उत्सवको रूपमा विकसित भएको छ ।
