लन्डन । लन्डनस्थित केम्पटेन पार्कमा आइतबार २४ अगस्ट २०२५ मा सम्पन्न १६औँ नेपाली मेलामा दक्षिण पूर्व क्षेत्रीय तमुधीं लन्डनको तर्फबाट पनि झाँकी तथा ट्होँटे प्रदर्शन गरिएको छ। ट्होँटे पर्वलाई गुरुङ जातिहरुको मौलिक पर्व चैत महिनाको अन्तिममा गाउँ टोलका दाजुभाइहरु मिलेर खेलिने फरक खालको विशेष पर्वको रुपमा लिइन्छ ।
नेपाली मेलामा ४४ वटा संस्थाहरुले सहभागी जनाएकोमा यो ट्होँटे पर्व विगतका केही वर्षहरुबाट अहिलेसम्ममा १ मात्रा संस्थाको तर्फबाट उत्कृष्ट प्रदर्शनी गराउन सफल भएको संस्था हो, साउथ ईष्ट रेजिनल तमुधीं लन्डन । ट्होँटे तथा झाँकी प्रदर्शनीको जिम्मा समाजका सचिव कमल गुरुङले लिएका थिए भने यसपटक विगतका कमीकमजोरीलाई सुधार गरेर अझ रोचक,मौलिक र उत्कृष्ट बनाउन समाजका वर्तमान अध्यक्ष शिवराम गुरुङ बीईएमको निर्देशन तथा समाजका अग्रजहरुको सल्लाहअनुसार प्रस्तुत गरिएको थियो ।
पहिलो पङ्तिमा दुई जना भूतको रुपमा निवर्तमान अध्यक्ष पिके लामा,उपाध्यक्ष यम गुरुङको मौलिक ट्होँटे नाच थियो भने समाज सेवाका लागि ८१ वर्षीय रत्नबहादुर गुरुङले पनि भूतको पहिरनमा सहभागी जनाएका थिए भने अन्य थुप्रै दाजुभाइहरुले विभिन्न मौलिक बाजागाजा बजाएर अझ रोचक बनाएका थिए ।
सो अवसरमा तमुधिं यूकेका अध्यक्ष जुमकाजी गुरुङ, उपाध्यक्ष तथा मेला संयोजक कमल गुरुङसहितका अग्रज तथा शुभेच्छुकहरूले संस्थालाई बधाई तथा शुभकामना दिए । ट्होँटे नाच, झाँकी प्रदर्शन र सांस्कृतिक झल्कोले मेलामा उपस्थित दर्शकलाई मातृभूमिको सम्झना दिलाएको सहभागीहरूको प्रतिक्रिया छ । यस्ता चाडपर्वले मौलिक संस्कृतिको संरक्षणमा टेवा पुग्ने गरेको सचिव कमल गुरुङले बताए । 'ट्होटेँले सामाजिक एकताको सन्देश दिन्छ, आफ्नो समुदायका मानिसहरु भेला हुने, एकापासमा चिनजान गर्ने मौका पनि मिल्छ,' उनले भने, 'यो पर्व गुरुङहरुको पहिचान, संस्कार र संस्कृतिसँग गाँसिएको छ ।'
कार्यक्रममा सहभागी सबैजनालाई संस्थाको तर्फबाट खाना र यातायात बन्दोबस्त गरिएको थियो भने १५० बोतल मिनरल पानी, ५ बोतल ईस्क्वास, जम्बो थर्मसमा चिया समाजका कोषाध्यक्ष दिकपाल गुरुङले प्रायोजन गरेका थिए ।
संस्थाका अध्यक्ष शिवराम गुरुङ बीईएमद्वारा कार्यक्रम सफल तुल्याउनका लागि प्रत्यक्ष,अप्रत्यक्ष सहयोगी तथा सहभागी जनाउने महानुभावहरुमा,अहोरात्र खटिएका संयोजक (सचिव) कमल गुरुङलगायत सम्पूर्णलाई एकमुष्ठमा व्यक्तिगत तथा संस्थाको तर्फबाट आभार प्रकट गरे । आगामी दिनमा पनि यस्तै साथ र समर्थन रहेमा अझ उत्कृष्ट प्रस्तुति हुने बारेमा संयोजक (सचिव) कमल गुरुङले आश व्यक्त गरेका छन् ।
