लन्डन । तमुर्धी यूकेको आयोजनामा भएको १६औं नेपाली मेलाको उत्सवमा पुन जातिको गौरवशाली झाँकी प्रस्तुत गरिएको छ ।
गत आइतबार २४ अगस्ट २०२५ लन्डनस्थित केम्पर्टन पार्क घोडा रेस कोर्स, सनबरी अन द थेम्समा भएको मेलामा सुरुका वर्षहरुदेखि नै निरन्तर सहभागी हुँदै आएको पुन समाज यूकेले पुन जातिको गौरवशाली झाँकी प्रस्तुत गरेको हो । मेलालाई अझ आकर्षक र भव्य बनाउन आफ्नो समाजको झाँकी प्रस्तुतिले महत्वपूर्ण योगदान दिएको समाजले पुन समाज यूकेले जनाएको छ।
पुन समाज यूकेलाई झाँकी प्रदर्शन प्रतियोगितामा सबैभन्दा पहिले लगातार तीनपटकसम्म एम्बास्डर कप जित्ने ऐतिहासिक सफलता मिलेको थियो ।
पुन जातिको एउटा प्रचलित, प्रख्यात र सबैले मन पराउने पुर्ख्यौली गीतको हाँगा ख्याली गीत हो। ख्याली गीत विशेषगरी पूजापाठ र विवाहजस्ता शुभकार्यहरूमा गाउँदै नाच्दै मनोरञ्जन गर्ने मात्र होइन, अति विशिष्ट पाहुनाहरूलाई मानसम्मानसहित स्वागत गर्ने महत्वपूर्ण परम्परा पनि हो । यो परम्परा पुर्ख्यौली नाचसँग जोडिएर अझ समृद्ध र जीवन्त बनेको छ । यसै अवसरमा,
उज्यालो नेपालका नायक कुलमान घिसिङ, पुन समाज यूकेका अध्यक्ष भूतपूर्व गोरखा मेजर गमबहादुर बुजुजा पुन, पुन समाज यूके नेपाली मेलाका संयोजक तथा सल्लाहकार भूतपूर्व सर्जन्ट शेरबहादुर पुन, पुर्ख्यौली नाच संयोजक जंग पुन तथा पुर्ख्यौली नृत्य विशेषज्ञ लालबहादुर ख पुन साथै ख्याली गीत नृत्य समूहले विशिष्ट व्यक्तिहरु आउँदा स्वागत, धन्यवाद र अभिवादन अर्पण गर्दै प्रस्तुत गरिएको पुन जातिको ख्याली नाच-गानको दृश्य अवलोकन गरिएको छ ।
तमुधीं यूकेका अध्यक्ष जुमकाजी गुरुङको अध्यक्षतामा सम्पन्न औपचारिक कार्यक्रममा नेपाली दूतावास लन्डनका राजदूत चन्द्रकुमार घिमिरे प्रमुख अतिथि र उज्यालो नेपाल अभियानका अभियन्ता तथा नेपाल विद्युत् प्राधिकरणका निवर्तमान कार्यकारी निर्देशक कुलमान घिसिङ विशेष अतिथिका रूपमा उपस्थित थिए ।
कार्यक्रममा पुन समाज यूकेले सारा बेलायतवासी नेपालीहरुको तर्फबाट अथितिहरुलाई विशेष स्वागत गरेको समाजका अध्यक्ष मेजर गमबहादुर पुले बताए ।
