शरणार्थी शिविर र असहाय बालबालिकाको सहयोगार्थ ब्रेकनमा 'नेप्लिज इभिनिङ' सम्पन्न

कर्मभूमि बेलायत

Home
कर्मभूमि बेलायत
शरणार्थी शिविर र असहाय बालबालिकाको सहयोगार्थ ब्रेकनमा 'नेप्लिज इभिनिङ' सम्पन्न

शरणार्थी शिविर र असहाय बालबालिकाको सहयोगार्थ ब्रेकनमा 'नेप्लिज इभिनिङ' सम्पन्न

गोर्खा मिडिया संवाददाता आइतबार, माघ ६, २०८१

लन्डन । शरणार्थी शिविर र असहाय बालबालिकाको सहयोगार्थ बेलायतको ब्रेकन सहरमा कल्याणकारी रात्रिभोज (नेप्लिज इभिनिङ) सम्पन्न भएको छ । स्थानीय हे ब्रेकन र तालगार्थ टाउनको शरणार्थी शिविरमा र नेपालको कास्की, धम्पुसगाउँको असहाय बालबालिकाहरुको सहयोगार्थ शनिबार १८ जनवरी २०२५ मा ब्रेकनको लेंगोर्स कम्युनिटी हलमा नेप्लिज इभिनिङ कार्यक्रम सम्पन्न भएको हो | कार्यक्रममा लेंगोरस टाउनका स्थानीय र आसपास सहरहरुबाट बाक्लो संख्यामा उपस्थिति थियो ।

कल्याणकारी रात्रिभोजमा कार्य ब्यस्तताले उपस्थित हुनु असमर्थ भए पनि धम्पुस परिवार यूकेका अध्यक्ष कुमार गुरुङलगायत परिवारका धेरै सदस्यहरुले आर्थिक सहयोग प्रदान गरी कार्यक्रमलाई सफल बनाउन ठूलो भूमिका खेलेको कार्यक्रम संयोजक मेजर खुसीमान गुरुङ एमभीओले जानकारी दिए । प्रारम्भमा उपस्थित सम्पूर्ण महानुभावहरुलाई स्वागत गर्दै कार्यक्रमको उद्देश्य बारेमा कार्यक्रम संयोजक मेजर खुसीमान गुरुङ एमभीओले बोलेका थिए भने स्थानीय हे ब्रेकन र तालगार्थ शरणार्थी शिविरको उद्देश्य र योजनाहरुका बारेमा मेलरोस ईस्ट र डा. आइल्स डुनले प्रस्ट पारेका थिए । कार्यक्रम कोलिन प्रिसले सञ्चालन गरेका थिए । कार्यक्रममा न्यू गोर्खा इन रेस्टुरेन्टको स्वादिष्ट भोजनपछि स्थानीय युवाहरुले नेपाली लोकप्रिय नृत्यहरु प्रस्तुत गरी सबैलाई मनोरन्जन दिलाएका थिए । विभिन्न अक्सन, राफल ड्र साथै हाजिरी जवाफ पनि सञ्चालन गरिएको थियो ।

उक्त कार्यक्रममा परोपकारी कार्यहरुका लागि राम्रो रकम पनि संकलन गर्न सफल भएको संयोजक मेजर खुशीमान गुरुङ एमभिओले जनाए । उनले संकलित रकमको आधा ब्रेकन धम्पुस टुइनिङ एसोसिएसनमार्फत आगामी दिनमा नेपाल धम्पुसको निमुखा बालबालिकाहरुलाई स्कुलको पोसाक तथा न्यानो कपडा उपलब्ध गराइने र बाँकी रकम स्थानीय शरणार्थी शिविरलाई हस्तान्तरण गरिने बताए । परोपकारी रात्रिभोज कार्यक्रम अति सफल भएको जनाउँदै संयोजक मेजर गुरुङले उपस्थित र सहयोगदाता सम्पूर्ण महानुभावहरुलाई धन्यवाद ज्ञापन गरे । उनले आगामी दिनमा नेपाल घुम्नका लागि आह्वान र निमन्त्रणा गर्दै कार्यक्रम समापन गरेका थिए ।

मेजर खुशीमान कास्कीको धम्पुस गाउँ र वेल्सको ब्रेकन सहरसँग भगिनी सम्बन्ध स्थापना गर्ने सुत्राधार व्यक्ति पनि हुन् । उक्त सम्बन्ध स्थापनाको छैटौँ वर्ष पुग्न लागेको छ । तमु प्ये ल्हु संघ यूकेका अध्यक्ष तथा प्रमुख सल्लाहकार भई कार्य सम्पादन गरिसकेका मेजर खुशीमान बेलायतका विभिन्न सामाजिक संघ संस्थामा रहेर सेवा गर्दै आएका छन् । उनले समग्र नेपालको पर्यटन प्रवर्द्धनका निम्ति बेलायतमै नेपाली भिलेज यूके महत्वाकांक्षी परियोजनासमेत अगाडि बढाइरहेका छन् ।