लन्डन १३ मे २०२४ । अन्तर्राष्ट्रिय नेपाली साहित्य समाज (अनेसास) बेलायत शाखाले साहित्यकार पारिजातको ८७ औं जन्मजयन्ती मनाएको छ । साउथ ह्यारोमा शनिबार एक कार्यक्रम गरी पारिजातको जन्मजयन्ती मनाइएको हो । त्यस क्रममा हालै निधन भएका गजलकार प्रकट पंगेनी ‘शिव’प्रति पनि श्रद्धाञ्जलि व्यक्त गरिएको थियो ।
अध्यक्ष राज श्रेष्ठको अध्यक्षतामा भएको कार्यक्रममा अनेसास बेलायतका सल्लाहकार सुमलकुमार गुरुङले भारतको दार्जीलिंगमा सन् १९३७ मा जन्मिएकी विष्णुकुमारी वाइबा ‘पारिजात’ नामले नेपाली साहित्यमा अमर रहेको बताए । उनले १३ वर्षको उमेरमा असफल प्रेमका कारण डिप्रेशनमा गएकी पारिजात पछि आंशिक पक्षाघातबाट पीडित भएको तर साहित्य सिर्जना जारी राखेको बताए ।
मदन पुरस्कार प्राप्त उनको उपन्यास ‘शिरिषको फूल’बाट नेपाली उपन्यास क्षेत्रमा नयाँ मोड आएको उनले बताए । पारिजातका ३ओटा कविता संग्रह, १० ओटा उपन्यास, निबन्ध तथा कथाहरु प्रकाशित छन्। सन् १९९३ मा ५६ वर्षको उमेरमा उनको निधन भएको थियो ।
संस्थाका सल्लाहकार डा रुपक श्रेष्ठले गत वैशाख ४ गते निधन भएका चर्चित गजलकार प्रकट पंगेनी ‘शिव’ एक बहुप्रतिभाशाली सर्जक भएको बताए । विसं २०१३ असोज २४ गते कास्की जिल्लाको तत्कालिन देउराली गाउँ पंचायत वडा नं २ मा जन्मेका प्रकट पंगेनीका २ ओटा गीतसंग्रहलगायत गजल र कवितासंग्रहहरु प्रकाशित भएको उनले बताए। उनका केही रचना प्रकाशित हुन बाँकी रहेको पनि उनले बताए ।
कार्यक्रममा साहित्यकार संगीता स्वेच्छाद्वारा लिखित उपन्यास ‘सेतो सिउँदो’ तथा पोर्चुगलमा बसोबास गर्ने साहित्यकार सबु श्रेष्ठको मुक्तकसंग्रह ‘अपरिभाषित आभा ‘ को विमोचन गरिएको थियो । ‘ सेतो सिउँदो’ उपन्यासको समीक्षा गर्दै समाजका सल्लाहकार डा रुपक श्रेष्ठले १८ वर्षको उमेरमा लेखिएको उक्त उपन्यासमा तत्कालिन नेपाली समाज र नारी मनोविज्ञानको यथार्थ चित्रण गरिएको बताए । ‘यो मानव सेवाको मूल भाव बोकेको र जीवन बोध गराउने यो उपन्यास सबै उमेर समूहका पाठकहरुका लागि पठनीय छ,” उनले भने ।
उपन्यासकार डा संगीता श्रेष्ठ स्वेच्छाले आफ्ना पिताको प्रेरणाले सेन्ट जेभियर्स कलेजबाट आइएससी दिएर बसेको समयमा आफुले उक्त उपन्यास लेखेको स्मरण गरिन् ।
समाजकी कोषाध्यक्ष प्रतिमा केसीले मुक्तक संग्रह ‘अपरिभाषित आभा’ को समीक्षा गरेकी थिइन् । कार्यक्रममा प्रमुख अतिथि वरिष्ठ नेत्र चिकित्सक डा बीरेन्द्र अमात्य, कुमार केसी, प्रेम खड्का, गङ्गा भण्डारी, जीत बुढाथोकी, विशन थापा, टेक बहादुर थापा, गोपी सापकोटा, बासुदेव सापकोटा, सारा देवी गुरुङ, माया गुरुङ लगायतका सर्जकहरुले आआफ्ना रचना सुनाएका थिए ।
समाजकी उपाध्यक्ष माया गुरुङले सबै सहभागीहरुलाई स्वागत गरिन भने समाजका अध्यक्ष राज श्रेष्ठले सबैलाई धन्यवाद दिए ।
सोही अवसरमा समाजका अध्यक्ष राज श्रेष्ठले अर्पिंगटन नेपाली समाजका सचिव बासुदेव सापकोटा, जीवन विज्ञान युकेका ट्रष्टी प्रेम खड्का तथा जीत बुढाथोकीले समाजको आजीवन सदस्यता प्रदान गरेका थिए ।
-1732095969.jpg)
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
