लन्डन । सहारा परिवार युकेको वार्षिक पारिवारिक क्याम्पिङ ब्रेकन साउथवेल्समा सम्पन्न भएको छ । यही मे ३ देखि ५ सम्म भव्य रूपमा भएको क्याम्पिङमा करिब ६० जनाको सहभागिता थियो ।
पहिलो दिन पानी परेको कारण क्याम्प सेटअप गर्न केही समस्या भए पनि समग्रमा अत्यन्तै रमाइलो भएको सहारा युकेका अध्यक्ष कृष्ण गुरुङले बताए । उनका अनुसार पानी जमेका कारण गाडी सडक छेउमा नै पार्किङ गरिएको थियो ।
उपस्थित सबैको सहकार्यमा एडमिन, कुकिङ र डाइनिङसहितको क्याम्प साइट सेटअप गरिएको थियो । टेन्टदेखि लिएर खाना पकाउने भाँडाकुँडालगायतको व्यवस्थापन सहाराका सल्लाहकार सेरा गुरुङले गरेका थिए ।
सहारा युके क्याम्पिङ आउटको कोअर्डिनेसन उपाध्यक्ष शारदा गुरुङ थिए । सम्पूर्ण प्राविधिक विषय पूर्व महासचिव मनोज गुरुङले मिलाएका थिए । सह कोषाध्यक्ष जगन गुरुङले इलेक्ट्रिसिटीतर्फको व्यवस्थापन गरेका थिए । आर्थिक संकलन तथा व्यवस्थापन कोषाध्यक्ष कुमार थापा, कुकिङतर्फ महिला सहभागीहरू खटिएका थिए । संस्थापक अध्यक्ष नवीन गुरुङ र खेलकुद सचिव समसेर गुरुङ र सीईओ मेघ गुरुङले मुख्य खानाको व्यवस्थापन गरेका थिए ।
विभिन्न प्रकारका खाना तथा पेय पदार्थको व्यवस्था गरिएको थियो । त्यसपछि नाचगान र रमाइलो गरिएको अध्यक्ष गुरुङले बताए ।
भोलिपल्ट ब्रेकफास्ट खाएपछि टोली पेन वाई हिलतर्फ गएको थियो । मौसम पनि घमाइलो भएको थियो । त्यहाँबाट ३० मिन्ट गाडीमा र १-२ घण्टा हिँडेपछि पेन वाई हिल पुगिन्छ । उक्त स्थान हाइकिङका लागि प्रख्यात छ । बैंक होलिडे परेका कारण त्यहाँ हाइकिङ जानेहरूको भीड थियो ।
‘बेलुका ४ बजेतिर क्याम्पमा फर्किएर केही समय आराम गरिएको थियो । अनि फुटबल (नानीहरूको पनि) खेलिएको थियो । महिलाको भलिबल भयो । बेलुका पुनः नाचगान भएको थियो,’ अध्यक्ष गुरुङले भने, ‘धेरै भेराइटिजका खानेकुराहरू आगोमा पकाएर खायौँ । एकदमै रमाइलो भयो । त्यो रात पनि बिहान ४ बजेसम्म बसियो ।’
भोलिपल्ट फोटोग्राफसहित क्याम्प क्लियरेन्सपछि टोली फर्किएको थियो ।
सहारा युके परिवारबीच चिनजानसहित सम्बन्ध प्रगाढ बनाउने र फन्ड राइज गर्ने उद्देश्यले क्याम्पिङ आयोजना गरिएको थियो । क्याम्पिङमा उपस्थित हुन नसक्ने सदस्यहरूले पनि स्वैच्छिक रूपमा सहयोग गरेका थिए ।
सहभागी भएर क्याम्पिङ सफल बनाउने सहयोग गर्ने सबैलाई सहारा युकेका अध्यक्ष गुरुङले धन्यवाद दिए ।
सहाराले बेलायतका विभिन्न पर्यटकीय क्षेत्रमा हरेक साल क्याम्पिङ गर्दै आएको छ । कोरोना महामारीका कारण केही वर्ष अवरुद्ध भएको क्याम्पिङले गत वर्षदेखि निरन्तरता पाएको हो ।
-1732095969.jpg)
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
