कविता : बिगबिगी

साहित्य

Home
साहित्य
कविता : बिगबिगी

कविता : बिगबिगी

मुखले सदैव
हितकारी शब्द वर्षाउनेहरू
मिठा मिठा कुरा लिएर
नजिक आउनेहरू
शुभकामनासहित
सुन्दर उपहार बोकेर
जूनको हाँसोले मुहार पोतेर
मृदु बोली र खुशीले नुहाई
फूलको लालीमा सर्लक्क दलेर
फूलजस्तै फूलेर आए पनि
साथमा विषाक्त काँढा हुन सक्छ,
होस गरे है यहाँ आजभोलि
समय नै विषाक्त छ
हावा, पानी सबै विषाक्त छ
हुँदा-हुँदा आफ्नो सम्झनेकै
नियतमा खोट छ
अनि बात-बातमा घात छ
अलिकति थिरिएर हिँड्यो कि
आघात् चोट छ र
यस्तै विषाक्त बानी छ
वर्षौंदेखिको व्यथा र कहानी छ
ख्याल राखे है यहाँ
अरुको बन्नै लागेको काम
भत्काइसकेपछि मन सन्चो
लागेर आनन्द मान्नेहरूको
लामो लामो कहानी छ
र यहाँ यस्तै चर्को जगजगी छ
होशियार हुनू है नानी
किनकि सही मानेमा यस्तै यस्तै
हितकारीहरूको आजकल
जता पनि उख्खुमै बिगबिगी छ ।