लन्डन । लन्डन बरो अफ बार्नेटका पूर्वमेयर काउन्सिलर क्यारोलिन स्टकको नेतृत्वमा ६ सदस्यीय प्रतिनिधिमण्डलले नेपालको पर्यटकीय राजधानी पोखरा भ्रमण गरेको छ । कास्कीको पोखरा महानगरपालिकाका मेयर धनराज आचार्यको निमन्त्रणामा पोखरा पुगेका टोली पोखरा पुगेको हो ।
आफ्नो साताव्यापी नेपाल भ्रमणका क्रममा लन्डन बरो अफ बार्नेटको पहिलो आधिकारिक प्रतिनिधिमण्डलले मेयर आचार्यको नेतृत्वमा रहेको प्रतिनिधिमण्डलसँग औपचारिक वार्ता गरेको थियो । भेटमा मेयर आचार्यले बार्नेट प्रतिनिधिमण्डललाई स्वागत गर्दै निमन्त्रणा स्वीकार गरी पोखरा महानगरपालिकाको भ्रमण गरेकामा धन्यवाद दिए । उनले पोखरा म्याराथनमा सहभागी हुन पनि आग्रह गरे ।
बैठकलाई सम्बोधन गर्दै काउन्सिलर क्यारोलिन स्टकले तत्कालीन उपमेयर लक्ष गुरुङले ल्याएको सोचबाट बार्नेट र पोखराबीचको मितेरी सम्बन्ध सुरु भएको बताइन् ।‘यो एक सोच थियो जसले हाम्रा विभिन्न समुदायबीच सांस्कृतिक आदानप्रदान र समझदारी बढाउने प्रयत्न गर्यो । हाम्रा सहरबीचको मित्रता प्रतीकात्मक भन्दा बढी छ र आज हामीमध्ये धेरै जना बार्नेटबाट यहाँ छौं’, क्यारोलिनले भनिन्, ‘हामी दुई नगरबीच दिगो विकास र वातावरणीय संरक्षणदेखि लिएर सम्बन्ध विस्तार गर्ने प्रयास गर्नेछौं ।’
बार्नेट बरोका पूर्व उपमेयर तथा हाल काउन्सिलर लक्ष गुरुङले दुवै पक्षबीच शिक्षा, स्वास्थ्य, पर्यटन, पोखरा म्याराथन र दुवै सहरलाई फाइदा हुने अवसर खोज्ने विषयमा छलफल भएको जनाए । ‘हामी हाम्रा दुई शहरबीचको सहकार्य अझ प्रवर्धन गर्न र हाम्रा नागरिकहरूको हितमा नजिकबाट काम गर्न तत्पर छौं’, उनले थपे । लन्डनबाट गएको प्रतिनिधिमण्डलमा काउन्सिलर क्यारोलिन स्टक, काउन्सिलर लक्ष गुरुङ, काउन्सिलर अर्जुन कुमार मित्रा, काउन्सिलर अम्मर नक्भी, काउन्सिलर कमल गुरुङ र डा रिचर्ड स्टक छन् ।
पोखरा बसाइका क्रममा लन्डन बरो अफ बार्नेट प्रतिनिधिमण्डलले फेवाताल, बेगनास ताल, अन्तर्राष्ट्रिय पर्वतीय सङ्ग्रहालय, गोर्खा सङ्ग्रहालय र ब्रिटिश क्याम्प भ्रमण गरेको थियो । प्रतिनिधिमण्डल सूर्योदय हेर्न सराङकोट पनि पुगेको थियो भने विश्व शान्ति प्यागोडा, डेभिस फल्स, गुप्तेश्वर गुफा र पुम्दीकोट अवलोकन गरेको थियो । उनीहरुले मातृशिशु मितेरी अस्पताल, विन्धवासिनी उच्चमावि अस्पताल र बेलायती परोपकारी संस्था किडाशाको नेपाल अफिसको पनि भ्रमण गरेका थिए ।
किडाशाले पोखरा र नेपालका अन्य शहरमा बालबालिकाको स्वास्थ्य सुधार गर्न, उनीहरूको शिक्षा र रोजगारीलाई सक्षम बनाउन र उनीहरूलाई दुर्व्यवहार एवं शोषणबाट जोगाउन काम गरिरहेको छ । बार्नेट र पोखरा महानगरपालिकाबीच सन् २०२१ मेमा मितेरी सहर बनाउने सम्झौता भएको थियो ।
गत १५ जनवरी २०२३ मा पोखरामा भएको दुःखद् हवाई दुर्घटनामा जहाजमा सवार सबै ७२ जनाको ज्यान गएपछि बार्नेटका तत्कालीन मेयर काउन्सिलर एलिसन मुरले पोखराका आफ्ना समकक्षीलाई शोक सन्देश पठाएका थिए । श्रद्धाञ्जली अर्पण गर्न लन्डन हेन्डन टाउन हल बाहिर फहराइरहेको बरोको झण्डा आधा झुकाइएको थियो ।
-1732095969.jpg)
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
