लन्डनमा बिस्का जात्रा तयारी

कर्मभूमि बेलायत

Home
कर्मभूमि बेलायत
लन्डनमा बिस्का जात्रा तयारी

लन्डनमा बिस्का जात्रा तयारी

गोर्खा मिडिया संवाददाता सोमबार, माघ १५, २०८०

लन्डन । पासा पुचः गुथि यूके लन्डनमा दोस्रो ‘बिस्का जात्रा’ को तयारीमा जुटेको छ । गुथिले २ वर्षअघि पहिलो पल्ट लन्डनमा आयोजना गरेको जात्रामा सयौंको सहभागिता थियो ।

आगामी अप्रिल १३ मा नेपाली नयाँ वर्षकै दिन लन्डन प्लमस्टिडको एशियन कम्युनिटी सेन्टरमा आयोजना हुने जात्राको तयारी शुरु गरिएको हो ।

शनिबार सम्पन्न पासा पुचः गुथि यूकेको तयारी बैठकले दोस्रो बिस्का जात्राका लागि विभिन्न जिम्मेवारीहरु बाँडफाँड गरेको गुथिका अध्यक्ष सुशील प्रजापतिले बताए ।

जात्राको संयोजक पासा पुचः गुथि साउथ इष्ट लन्डन अक्ष्यक्ष माधवलाल श्रेष्ठ र उपसंयोजक पासा पुचः गुथि रेडिङका अध्यक्ष दिव्य महर्जन चयन भएका छन् । बेलायतस्थित गुथिका सबै शाखाहरुको धिमे र धाः बाजाका टोली र भैरव गण नाचको तयारी प्रशिक्षण आगामी फेव्रुअरीबाटै सञ्चालन गरिने भएको छ ।

भैरव र भद्रकालीको पुरानो रथको पाटपुर्जा निरीक्षण गरी नयाँ रथहरुको निर्माणको जिम्मा सुशील प्रजापति, ओजेश सिंह र सोहन सुवाल लगायतको टिमलाई प्रदान गरिएको छ ।

सो अवसरमा नेवारी र नेपाली परिकारका विभिन्न फुड स्टल समेत राखिनेछ ।
त्यस्तै, विदेशी फोटोग्राफरका नेवारी संस्कृति र सम्पदा झल्काउने फोटोहरुको प्रदर्शनी हुनेछ ।

प्रकाशित मिति: सोमबार, माघ १५, २०८० ०९:४२

प्रतिक्रिया दिनुहोस्