कास्की । २३ औं आहा ! रारा पोखरा गोल्डकपमा सहभागी हुन सहारा युकेका अध्यक्ष कृष्ण गुरुङ नेतृत्वको टोली पोखरा आइपुगेको छ ।
बेलायतबाट शनिबार काठमाडौंको त्रिभुवन अन्तर्राष्ट्रि विमानस्थलमा ओर्लिएका अध्यक्ष कृष्ण आइतबार दिउँसो करिब ४ बजे पोखरा अन्तर्राष्ट्रिय विमानस्थलमा अवतरण भएका हुन् । अध्यक्ष कृष्ण र सहारा युकेका सल्लाहकार कृष्णबहादुर गुरुङलाई विमानस्थलमा सहारा पोखराका निर्वतमान अध्यक्ष सुरज गुरुङ, पूर्वअध्यक्ष केशव थापा, फोटो पत्रकार सुदर्शन रन्जित, राजन ढकाल, गमबहादुर गुरुङ, नेपाल मगर सांस्कृतिक संघ कास्कीका अध्यक्ष सरिता सारु मगर, गायिकाहरु रेनु रेलामी मगर, निरा थापामगरलगायतले पुष्पगुच्छा र खादाले स्वागत गरेका थिए ।
पर्सि माघ ९ गतेदेखि हुने पोखरा गोल्डकपका लागि बेलायतबाट सहाराका पदाधिकारी तथा सदस्यहरु धमाधम पोखरा आइरहेका छन् । आइतबार बिहान सहारा युकेकी सचिव मन्जु गुरुङ राई पोखरा आइपुगेकी छिन् । त्यस्तै शनिबार बेलुकी मिडिया सेक्रेटरी एवं गोर्खा मिडियाका प्रबन्ध निर्देशक मिलन तमु पोखरा ओर्लिइसकेका छन् ।
गोल्डकपका लागि सहाराका एक टोली यसअघि नै पोखरा आएको थियो । जसमा प्रमुख सल्लाहकार महेश गुरुङ, आजीवन सदस्य भोज गुरुङ, मानार्थ सदस्य सहारा पोखराका लोक गुरुङ, राम गुरुङ, नरजंग गुरुङ र हरिकुमार श्रेष्ठ छन् । निवर्तमान अध्यक्ष लेरि कुसाङ गुरुङ, पूर्वअध्यक्ष कुमार गुरुङ, कार्यसमिति सदस्य एसके गुरुङ, लालकाजी गुरुङ, योगेश गुरुङ, चन्द्र गुरुङ, देव गुरुङ, गम गुरुङलगायत अर्को टोली पनि आउने कार्यक्रम रहेको अध्यक्ष कृष्ण गुरुङले जानकारी दिए ।
अध्यक्ष कृष्ण गुरुङले आइतबार अखिल नेपाल फुटबल संघ (एन्फा) अध्यक्ष पंकज नेम्बाङ र सहारा युकेका संरक्षाक नेपालकै सफल व्यवसायी अरूण चौधरीसँग काठमाडौंमा भेटघाट गरेका थिए । भेटका अवसरमा सहारा युकेको विषयमा छलफल भएको अध्यक्ष गुरुङले जानकारी गराए । एन्फा अध्यक्ष नेम्बाङलाई अध्यक्ष गुरुङले सहारा युकेको तर्फबाट मायाको चिनो प्रदान गरे ।
पोखरा अन्तर्राष्ट्रिय फुटबल स्टेडियमममा सञ्चालन हुने आहा ! रारा गोल्डकप प्रतियोगिताको उद्घाटन खेल आयोजक सहारा र थ्रिस्टार क्लबबीच हुनेछ । प्रतियोगितामा एक विदेशीसहित १२ टोली प्रतिस्पर्धा गर्ने क्लबका अध्यक्ष केशवराज बरालले बताए । प्रतियोगिता माघ २० गतेसम्म चल्नेछ । उनका अनुसार विजेताले १२ लाख एक हजार नगदसहित ट्रफी पुरस्कार प्राप्त गर्नेछन् । उपविजेता टोलीले छ लाख एक हजार नगदसहित ट्रफी प्रदान गरिने क्लबले जनाएको छ ।
अध्यक्ष बरालले प्रतियोगितामा प्रथम र द्वितीय पुरस्कारसहित कूल २८ लाख ३२ हजार पाँच सय ५५ नगद पुरस्कार राशि रहेको जानकारी दिए । सहभागी प्रत्येक टोलीलाई एक खेल खेलेबापत अतिरिक्त प्रोत्साहन रकम प्रदान गरिने छ । प्रिक्वाटरफाइनल विजेता र पराजित दुवै टोलीलाई २० हजारका दरले र क्वाटरफाइनलमा विजेता र पराजित दुवै टोलीलाई ३० हजार तथा सेमिफाइनलमा पुग्ने टोलीलाई ५० हजारका दरले प्रोत्साहन रकम प्रदान गरिने सहाराका महासचिव रामजीप्रसाद अधिकारीले बताए ।
यसैगरी, ‘म्यान अफ दी म्याच’लाई नगद १० हजारसहित मेडल पुरस्कार पाउँछन् । यस वर्षदेखि क्लबले प्रत्येक खेलमा दुईजनालाई भाग्यशाली दर्शक पुरस्कार पाँच हजारका दरले प्रदान गर्ने भएको छ । दर्शकको उपस्थिति वृद्धि गर्न र प्रोत्साहनका लागि सो पुरस्कार राखिएको हो ।
प्रतियोगितामा नेपाल प्रहरी फुटबल क्लब, त्रिभुवन आर्मी, संकटा क्लब, मनाङ मर्स्याङ्दी, जावलाखेल युथ क्लब, मच्छिन्द्र क्लब, चर्च ब्वाइज युनाइटेड फुटबल क्लब, राइजिङ स्टार फुटबल क्लब, थ्रिस्टार क्लब, पारो फुटबल क्लब भूटान, नेपाल एपीएफ क्लब र आयोजक सहारा क्लबको टोली सहभागिता जनाउनेछन् । अघिल्लो संस्करणको उपाधि सङ्कटा क्लबले जितेको थियो भने भुटनिज युथ स्पोर्टस क्लब मिनोसोटा अमेरिका उपविजेता बनेको थियो ।
‘खेलकुद विकासमा सहकार्य गरौँ, पोखरालाई खेलकुद पर्यटनको सहरका रुपमा स्थापित गरौँ’ भन्ने उद्देश्यका साथ हरेक वर्ष प्रतियोगिता सञ्चालन हुने गर्दछ । पर्यटकीय सहर पोखरालाई ‘स्पोर्टस् हव सिटी’का रुपमा विकास गर्दै आन्तरिक तथा बाह्य पर्यटन प्रवर्द्धनमा प्रतियोगिताले सहयोग पुग्ने आयोजकको भनाइ छ ।
प्रतियोगिताबाट बचत हुने रकम क्लबबाट सञ्चालित सहारा फुटबल एकेडेमीमा खर्च गर्ने गरिएको छ । विसं २०६१ देखि पोखरामा एकेडेमी सञ्चालनमा छ । हाल चौथो ब्याचको एकेडेमीमा आठ जिल्लाका १४ जना बालक आश्रित छन् ।
-1732408259.jpg)
-1732095969.jpg)
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
