यस वर्ष ‘एनएलडिसी स्वर्ण पदक’नेपाली साहित्य विकास परिषद् यूकेका संस्थापक शाहलाई

साहित्य

Home
साहित्य
यस वर्ष ‘एनएलडिसी स्वर्ण पदक’नेपाली साहित्य विकास परिषद् यूकेका संस्थापक शाहलाई

यस वर्ष ‘एनएलडिसी स्वर्ण पदक’नेपाली साहित्य विकास परिषद् यूकेका संस्थापक शाहलाई

गोर्खा मिडिया संवाददाता बिहीबार, जेठ २५, २०८०

लन्डन । यस वर्ष ‘एनएलडिसी स्वर्ण पदक’नेपाली साहित्य विकास परिषद् यूकेका संस्थापक वरिष्ठ साहित्यकार सुरेशजङ्ग शाहलाई दिइने भएको छ ।

नेपाली साहित्य विकास परिषद् यूकेका अध्यक्ष कोमल मल्लको अध्यक्षतामा बसेको पुरस्कार छनोट समितिको बैठकले उक्त पदक शाहलाई दिने निर्णय गरेको हो । समितिको प्रमुख निर्णायकमा वरिष्ठ सल्लाहकार डा. राघवप्रसाद धिताल ‘ओबीइ’ छन् ।

पुरस्कार आगामी जुलाई ९ मा हुने ११०औं भानु जयन्तीका अवसरमा शाहलाई प्रदान गरिने परिषद्ले जनाएको छ । यसका साथै उक्त समारोहमा नइ प्रकाशन नेपालबाट बेलायतका सर्जकहरूलाई प्रदान गरिएको ‘नइ कीर्ति अलङ्कार पदक’ पनि परिषद्का संरक्षक राजदूत ज्ञानचन्द्र आचार्यबाट सुशोभन गरिने कार्यक्रम छ ।

बेलायतमा तीन दशक बढी समयदेखि नेपाली साहित्य, पत्रकारिता र समाजसेवामा सक्रिय वरिष्ठ साहित्यकार तथा समाजसेवी सुरेशजङ्ग शाहका डेढ दर्जन कथा, कविता, नाटक, उपन्यास, जीवनीका मौलिक कृतिहरू प्रकाशित छन् भने फुटकर लेख रचना र पुस्तक समालोचना पनि विभिन्न पत्रपत्रिकामा प्रकाशित हुँदै आएका छन् ।

परिषद् स्थापना भएको आगामी जुलाईमा २८ वर्ष पुरा हुँदैछ । परिषद्को स्थापनाकाल सन् १९९५ मा नै स्थापना गरिएको २४ क्यारेटको एक तोला सुन र पाँच तोला शुद्ध चाँदीमा बनेको स्वर्ण पदक परिषद्मा आबद्ध भएर साहित्य सिर्जना र सेवाले विशिष्ट योगदान पुर्‍याएका सर्जकहरूलाई दिने गरिएको छ । नगद लिन चाहे जुनसुकै बेला एक लाख रूपियाँ परिषद्बाट लिन सक्ने प्रावधान पनि परिषद्मा छ ।

प्रकाशित मिति: बिहीबार, जेठ २५, २०८० १२:२६

प्रतिक्रिया दिनुहोस्