लन्डन । गैर आवासीय नेपाली संघ (एनआरएनए) यूकेले गत ३० अप्रिल आइतबार गरेको नि:शुल्क स्वास्थ्य शिविरमा ५६ जनाले सेवा लिएका छन् ।
अल्डरसटस्थित आफ्नै कार्यालयमा दिउँसो २ देखि ४ बजेसम्म आयोजना गरिएको शिविरमा उच्च रक्तचाप (ब्लड प्रेसर), ब्लड सुगर, उचाई तथा तौल जाँच, मानसिक स्वास्थ्य, पोषण, लागूऔषध तथा अल्कोहल लत छुटाउन परामर्श एवं समग्र स्वास्थ्य अवस्थाबारे सुझाव सल्लाह दिइएको कार्यक्रम संयोजक डा. विशाल गुरुङले जनाए । शिविरमा सहभागी भएकालाई चिकित्सक तथा नर्सहरुबाट जाँच तथा परामर्श दिइएको थियो । डा. गुरुङले उच्च र कम ब्लड प्रेसर तथा ब्लड सुगरबारे परामर्श दिएका थिए ।
शिविरमा मानसिक स्वास्थ्यसम्बन्धी व्यावसायिक एनएचएस नर्स सुष्मा गुरुङले जानकारी दिँदै अन्तरक्रिया गरेकी थिइन् । उनी रसमोर बरोमा आफ्नो सामाजिक कार्यका कारण लोकप्रिय छिन् । त्यसैगरी, रसमोर हेल्दी लिभिङमा कार्यरत डाइटिसिएन तथा पोषणविज्ञ धिरज घले, जिआरएनसीमा विभिन्न प्रोजेक्ट चलाउने सोसल प्रिस्क्राइबर सुशीला मगर र लागूऔषध र मदिरा नियन्त्रणसम्बन्धी काम गर्ने सोइग्नाले आआफ्नो क्षेत्रको दक्षता प्रस्तुत गरेका थिए ।
सामाजिक अभियन्ता तथा जीआरएनसी सल्लाहकार डमर घलेले प्रशासनिक काममा सघाएका थिए । एनआरएनए यूकेले अंग्रेजी भाषा समस्या भएका वृद्धवृद्धाहरुलाई लक्षित गर्दै प्रत्येक महिनाको अन्तिम आइतबार नि:शुल्क स्वास्थ्य शिविर गर्दै आएको छ ।
एनआरएनए यूके अध्यक्ष प्रेम गाहामगरले आउँदो २८ मेका दिन गोर्खा कपमा अल्डरसटस्थित क्वीन्स एभिन्यूमा स्थानीय एनएचएससँगको सहकार्यमा स्वास्थ्य शिविर हुन लागेको जानकारी दिँदै त्यसबाट लाभ लिन पनि अपिल गरेका छन् ।
-1732408259.jpg)
-1732095969.jpg)
-1732504368.jpg)
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
