नायिका गौमाया गुरुङले गरिन् बेलायतमा विवाह

कर्मभूमि बेलायत

Home
कर्मभूमि बेलायत
नायिका गौमाया गुरुङले गरिन् बेलायतमा विवाह

नायिका गौमाया गुरुङले गरिन् बेलायतमा विवाह

गोर्खा मिडिया संवाददाता मंगलबार, साउन ५, २०८३

बेलायत । चर्चित अभिनेत्री गौमाया गुरुङ वैवाहिक जीवनमा बाँधिएकी छिन् । उनले बेलायतमा आफ्ना प्रेमी दिवससँग विवाह गरेकी हुन्। गुरुङ परम्परा अनुसार सम्पन्न भएको उक्त विवाह समारोहमा परिवार र नजिकका सीमित आफन्तहरूको मात्र उपस्थिति रहेको थियो।

आफ्नो विवाहको जानकारी उनले सामाजिक सञ्जालमार्फत दिएकी हुन्। उनले परिवार र प्रियजनहरूको उपस्थितिमा जीवनसाथी दिवससँग नयाँ जीवनको सुरुवात गरेको बताएकी छिन्। सामाजिक सञ्जालमा उनले तस्बिरहरू सार्वजनिक गरेपछि धेरै कलाकार र प्रशंसकहरूले उनलाई बधाई दिएका छन्। विवाहका तस्बिरहरूमा यो जोडी निकै खुसी देखिएको छ।

भ्लगरको रूपमा सुरुवाती चर्चा कमाएकी गौमायाले ब्रिटिश-अमेरिकी टेलिभिजन शृङ्खला ‘ब्ल्याक नार्सिसस’ बाट अभिनय यात्रा सुरु गरेकी थिइन्। नेपाली चलचित्र ‘कबड्डी ४’ बाट व्यावसायिक सफलता र पहिचान पाएकी उनले ‘१९१५ : लेजेन्ड अफ द गोर्खाज’, ‘फूलबारी’, ‘महाजात्रा’, ‘पूजा सर’, ‘सेप अफ मोमो’ र ‘रमिताको पिरती’ जस्ता चलचित्रहरूमा अभिनय गरेकी छिन्। व्यावसायिक र कलात्मक दुवै धारका फिल्ममा सक्रिय गौमाया वर्तमान समयकी लोकप्रिय अभिनेत्री मानिन्छन्।

उनले भदौ २६ गते चलचित्र प्रदर्शनमा आउन लागेको चलचित्र ‘पेन्सन पट्टा’ मा अभिनय गरेकी छिन् । अभिनेता तथा निर्देशक माओत्से गुरुङ निर्देशित नेपाली चलचित्र ‘पेन्सन पट्टा’ को पहिलो गीत ‘जुनी जाला’ केही दिन अघि मात्र सार्वजनिक गरिएको छ।

प्रकाशित मिति: मंगलबार, साउन ५, २०८३ १८:१६

प्रतिक्रिया दिनुहोस्