बेलायत । प्राकृतिक सौन्दर्य र आध्यात्मिक ऊर्जाको अनुपम संगम मानिने वेल्सस्थित प्रसिद्ध तीर्थस्थल स्कन्द भ्याले (Skanda Vale) मा तमु समाज यूकेले एक भव्य सामूहिक आध्यात्मिक भ्रमण सम्पन्न गरेको छ।
समाजका सदस्यहरूबीच आपसी भाइचारा सुदृढ गर्ने, आध्यात्मिक शान्ति प्राप्त गर्ने र व्यस्त जीवनशैलीबाट केही समय प्रकृतिसँग साक्षत्कार गर्ने पवित्र उद्देश्यका साथ यो यात्रा आयोजना गरिएको थियो। यात्राको शुभारम्भ र आध्यात्मिक स्वागत तमु समाज यूकेको सामुदायिक भवन बारहम पार्क, वेम्बलीमा ८ मे २०२६, शुक्रबार राति ९:३० बजे उत्साहका साथ सदस्यहरू भेला भएका थिए।
राति ठिक १०:०० बजे दुईवटा बसमा सुरु भएको यो यात्रा बीच-बीचमा बिश्राम र 'रिफ्रेस' गर्दै करिब ६ घण्टाको सुखद यात्रा पश्चात् ९ मे, शनिबार बिहान ४:०० बजे स्कन्द भ्यालेको पावन भूमिमा पुगेको थियो। पहाडको टाकुरामा अवस्थित मन्दिरसम्मको उकाली, ओराली यात्रा वृद्धवृद्धाहरूका लागि चुनौतीपूर्ण हुने भएकाले मन्दिर व्यवस्थापनले विशेष मिनीबस (सटल बस) को प्रबन्ध मिलाएको थियो। केही युवा सदस्यहरू पैदल यात्रा गर्दै र अन्य सदस्यहरू सटल बसको सहयोगमा सहजै मन्दिर परिसरसम्म पुग्नुभएको थियो। बिहान ५:०० बजेको 'श्री मुरुगन पूजा' बाट सुरु भएको आध्यात्मिक कार्यक्रमले टोलीलाई एक दिव्य शान्तिको अनुभूति गरायो।
स्कन्द भ्यालेको महत्व र सामूहिक प्रार्थना वेल्सको कार्मारथेनशायरको पहाडी काखमा सन् १९७३ मा गुरु श्री सुब्रमण्यमद्वारा स्थापित यो धाम निस्वार्थ सेवा र धार्मिक सद्भावको अनुपम प्रतिक हो। भ्रमण टोलीले बिहान ६:३० बजेको 'महाशक्ति पूजा' मा सहभागी भएर जगज्जननी महाकालीको पाउमा सामूहिक प्रार्थना अर्पण गरेको थियो। पूजापश्चात् मन्दिरद्वारा सबै भक्तजनका लागि व्यवस्था गरिएको सात्विक प्रसाद (बिहानको खाजा) ग्रहण गरी टोलीले आध्यात्मिक ऊर्जा प्राप्त गर्यो। तत्पश्चात् बिहान ९:३० देखि ११:०० बजेसम्म चलेको 'श्री रंगनाथ पूजा' र भव्य आरतीमा सहभागी भएर सबैले विशेष आध्यात्मिक लाभ लिनुभयो। पूजा र प्रसाद ग्रहणको कार्यक्रम समापन भएपछि आफ्नै मौलिक पहिचान झल्किने परम्परागत तमु (गुरुङ) पोसाकमा सजिएका सदस्यहरूले स्कन्द भ्यालेको रमणीय प्राकृतिक दृश्य र विभिन्न मन्दिरहरूको अवलोकन गरेका थिए ।
हरियो वनजंगल र शान्त वातावरणको बीचमा गुरुङ पोसाकमा सजिएका टोलीका कारण त्यहाँको दृश्य अझै रङ्गीन, मौलिक र आकर्षक देखिएको थियो। सेवा भाव र दान हस्तान्तरण 'सेवा नै धर्म हो' भन्ने मूल मन्त्रलाई आत्मसात गर्दै तमु समाज यूकेले मन्दिर व्यवस्थापनलाई खाद्य सामग्री सहयोग स्वरूप प्रदान गरेको छ। समाजद्वारा संकलित करिब ३०० पाउन्ड मूल्य बराबरको सुख्खा खाद्यान्न सामग्रीहरू संस्थाका कोषाध्यक्ष श्री चन्द्रकान्त गुरुङ, पूर्व अध्यक्ष श्री अर्जुन कुमार गुरुङ तथा सल्लाहकारहरू श्री हर्क बहादुर गुरुङ र श्री धर्मबल गुरुङले संयुक्त रूपमा मन्दिर व्यवस्थापनलाई हस्तान्तरण गरेका थिए ।
यस पुण्य कार्यप्रति कृतज्ञता व्यक्त गर्दै मन्दिरकी मुख्य संयोजक उमा मेयप्पन (Uma Meyyappan) ले यूकेको एक प्रतिष्ठित च्यारिटी संस्था तमु समाज यूकेको यस उदारता र सेवाभावको उच्च प्रशंसा गरिन् । सोही अवसरमा अध्यक्ष श्रीमती विन्दु कुमारी गुरुङ घलेले मन्दिर व्यवस्थापनले देखाएको हार्दिकता, वृद्धवृद्धाहरूका लागि गरिएको यातायातको व्यवस्था र नि:शुल्क भोजनका लागि हार्दिक धन्यवाद ज्ञापन गरिन् । सहकार्य र व्यवस्थापनको सुखद पक्ष भ्रमणलाई सफल बनाउन सामुदायिक सेवाको उत्कृष्ट नमूना प्रस्तुत गरियो। श्रीमती ऋतु गुरुङ, सुश्री बिबा देवी गुरुङ, बत्ती गुरुङ, प्रज्जु गुरुङ, बिजयता गुरुङ, सारा गुरुङ र उषा गुरुङले मन्दिरको भान्छामा भोजन तयारीका लागि विशेष श्रमदान गरेका थिए । कार्यक्रमको छायाङ्कन सल्लाहकार श्री उदय गुरुङ र फोटोग्राफी युवा महासचिव सुश्री प्रज्जु गुरुङले गरेकी थिइन् भने भने सम्पूर्ण व्यवस्थापनको नेतृत्व अध्यक्ष श्रीमती विन्दु कुमारी गुरुङ घलेले कुशलतापूर्वक सम्हालेकी थिइन् ।
भ्रमणको अधिकांश खर्च 'कम्युनिटी लट्री फण्ड' (Community Lottery Fund) को प्रायोजनबाट प्राप्त भएको जानकारी दिँदै अध्यक्ष घलेले यस्ता सामुदायिक कोषहरूको महत्वमाथि प्रकाश पार्नुभयो। साथै, निवर्तमान अध्यक्ष श्री शिवकुमार गुरुङ र संस्थापक अध्यक्ष श्री चित्रबहादुर गुरुङले भ्रमणको प्रचार-प्रसार र ब्यानर व्यवस्थापनमा विशेष सहयोग गरेका थिए । मनोरञ्जन र यात्राको समापन दिउँसो २:०० बजेको स्वादिष्ट दिवाभोज (प्रसाद) ग्रहण गरेपछि केही बेर स्कन्द भ्यालेको शीतल हरियाली र शान्त वातावरणमा समय बिताएर टोली अपराह्न ४:०० बजे फिर्ती यात्रामा लागेको थियो। लामो बस यात्रा भए तापनि सदस्यहरूले नेपाली मौलिक गीत-संगीत र दोहोरीको घन्कासँगै यात्रालाई अत्यन्तै उल्लासमय र अविस्मरणीय बनाएका थिए।
टोलीलाई मनोरञ्जन दिलाउन बस नं. १ मा आमा समूहका पूर्व अध्यक्ष माया गुरुङ, पूर्व उपाध्यक्ष पुष्पा गुरुङ र पूर्व अध्यक्ष अर्जुन कुमार गुरुङले सक्रिय भूमिका खेल्नुभएको थियो। त्यसैगरी बस नं. २ मा आमा समूहका उपाध्यक्ष मथुरा गुरुङ, पूर्व सांस्कृतिक सचिव सरु गुरुङ राना, बिना गुरुङ र निरु कोइरालाले लोक दोहोरी मार्फत यात्राभरि सबैलाई उत्साह र मनोरञ्जन प्रदान गर्नुभएको थियो। भ्रमणको सुखद अनुभूति साट्दै आमा समूहकी अध्यक्ष श्रीमती बिमला गुरुङले यस यात्राले आध्यात्मिक पुनर्ताजगी (Spiritual Refreshment) प्रदान गर्नुका साथै समुदायमा नयाँ उत्साह भरेको बताइन्। उनले आगामी दिनमा पनि समुदायको एकताका लागि यस्ता कार्यक्रमहरूलाई निरन्तरता दिन सुझाव दिइन्। यात्राको अन्त्यमा अध्यक्ष श्रीमती विन्दु कुमारी गुरुङ घलेले भ्रमणमा ६० जना सदस्यहरूको उत्साहजनक सहभागिताले कार्यक्रमलाई भव्य र सफल बनाउन महत्वपूर्ण योगदान पुगेको बताउँदै सम्पूर्ण सहभागीहरूप्रति हार्दिक कृतज्ञता व्यक्त गरिन् ।
विभिन्न क्षेत्रबाट सहयोग पुर्याउने सम्पूर्ण सहयोगी हातहरूप्रति धन्यवाद ज्ञापन गर्दै उहाँले यस भ्रमणलाई आफ्नो कार्यकालकै एक “अभूतपूर्व सफलता” का रूपमा लिएको उल्लेख गरिन्। भ्रमण टोली ९ मे २०२६ को राति १०:०० बजे बारहम पार्क, वेम्बली आइपुगेर यात्राको सुखद समापन भएको थियो। धार्मिक सद्भाव, आपसी एकता र निस्वार्थ सेवाको यो सुन्दर संगमले तमु समाज यूकेको गरिमालाई अझ उचाइमा पुर्याएको छ।
![गोर्खाकपमा स्वागतम [गीत]](https://gurkhamedia.com/uploads/posts/ratna-gurung-1744036920.jpg)
