मतपेटिकाको सुरक्षा र ढुवानीमा नेपाली सेनाको कमाण्ड

मातृभूमि नेपाल

Home
मातृभूमि नेपाल
मतपेटिकाको सुरक्षा र ढुवानीमा नेपाली सेनाको कमाण्ड

मतपेटिकाको सुरक्षा र ढुवानीमा नेपाली सेनाको कमाण्ड

गोर्खा मिडिया संवाददाता सोमबार, फागुन १८, २०८२

पोखरा । आगामी प्रतिनिधिसभा निर्वाचनमा मतपेटिकालाई सुरक्षित रूपमा मतगणनास्थलसम्म पुर्‍याउने जिम्मेवारी नेपाली सेनाले सम्हाल्ने भएको छ।

सैनिक मुख्यालय जङ्गी अड्डाले एक प्रेस विज्ञप्ति जारी गर्दै यसपटक पनि विगतका निर्वाचनहरूमा झैँ सुरक्षा प्रोटोकलकै आधारमा सेना परिचालन हुने स्पष्ट पारेको हो । 'एकीकृत सुरक्षा योजना २०८२' अनुसार सेनाले मतपेटिका ढुवानीको कार्यविधि अघि बढाउनेछ। यस प्रक्रियामा सेना एक्लै नभई नेपाल प्रहरी, सशस्त्र प्रहरी बल, निर्वाचन अधिकृत र सम्बन्धित राजनीतिक दलका प्रतिनिधिहरूको संयुक्त सहभागिता रहने जनाइएको छ। सबै पक्षको समन्वयमा मतपेटिकालाई अत्यन्तै सुरक्षित तवरले गन्तव्यमा पुर्‍याइने सेनाको भनाइ छ।

वि.सं. २०४८ देखि नै नेपालका हरेक निर्वाचनहरूमा सेनाले महत्त्वपूर्ण भूमिका निर्वाह गर्दै आएको छ। मतपत्र छपाइ केन्द्रको सुरक्षा, देशभर मतपत्रको ढुवानी र मतदानको समयमा तेस्रो घेरामा रहेर सुरक्षा प्रदान गर्ने आफ्नो पुरानो अनुभव र विरासतलाई यसपटक पनि निरन्तरता दिने सेनाले उल्लेख गरेको छ।