काठमाडौँ । लायन्स मनराम प्रतिष्ठान २००५ नेपालको अध्यक्षमा सुजनकुमार श्रेष्ठ चयन भएका छन् । प्रतिष्ठानको १४औँ साधारणसभाले तीन वर्षका लागि नयाँ कार्यसमिति चयन गरेको हो ।
संस्थाको संरक्षकमा मनमाया श्रेष्ठ, वरिष्ठ उपाध्यक्ष सुमनकुमार श्रेष्ठ, उपाध्यक्ष राजन लम्साल, महासचिव रामप्रसाद घिमिरे, सचिव रेशमबहादुर पोख्रेल र कोषाध्यक्षमा पुनम कार्की निर्वाचित भएका छन् । त्यसैगरी, सदस्यहरूमा इन्दु लम्साल, राजेन्द्रकुमार श्रेष्ठ, शकुन्तला खड्का, पार्वती खरेल पाण्डे र ठाकुरप्रसाद खनाल निर्वाचित भए । नयाँ कार्यसमितिमा गत कार्यसमिति कै पदाधिकारी र सदस्य दोहोरिएका हुन् ।
कार्यक्रममा प्रत्येक १० विद्यालयको मुद्दती खातामा १–१ लाख र ३५ हजार बराबरको विभिन्न पुस्तक विद्यालयमा पुस्तकालय स्थापनार्थ सहयोग गरिएको थियो । प्रतिष्ठानले मनराम पुस्तकालय स्थापनार्थ लायन्स क्लब अफ काठमाडौँ बन्डर उमनको स्थानीय सहयोगमा अमृत विद्या मन्दिर, बेथानचोक–२, काभ्रेलाई रकमसहित पुस्तक उपलब्ध गराएको प्रिन्सिपल रघुनाथ सापकोटाले जानकारी दिए ।
प्रतिष्ठानका उपाध्यक्ष लायन राजन लम्सालका अनुसार अन्य विद्यालयलाई पनि विभिन्न क्लबको स्थानीय सहयोगमा १ लाख रकमसहित पुस्तक उपलब्ध गरिएको छ । प्रतिष्ठानका अध्यक्ष लायन सुजनकुमार श्रेष्ठले मुलुकका ७७ वटै जिल्लाका १५४ विद्यालयमा मनराम पुस्तकालय स्थापना भइसकेको र यस वर्ष १० वटा थप गरी १६४ पुस्तकालय पुगेको जानकारी दिए ।
पुस्तकालय स्थापनाका लागि विद्यालयको छनोट डिस्ट्रिक्ट गभर्नर लायन पार्वती खरेल पाण्डेले गरेकी थिइन् । साधारण सभामा आर्थिक प्रतिवेदन कोषाध्यक्ष पुनम कार्की र वार्षिक प्रतिवेदन सचिव रेशमबहादुर पोख्रेलले प्रस्तुत गरेका थिए ।
यसैबीच, संखुवासभा–काठमाडौँ जर्नालिस्ट एसोसिएसनबाट प्रत्येक वर्ष वितरण हुने मनराम– एसकास पत्रकारिता पुरस्कार यस वर्ष गोविन्द पोखरेललाई प्रदान गरियो । ५० हजार रुपैयाँ राशिको पुरस्कार सूचना तथा सञ्चारमन्त्री जगदीश खरेलले प्रदान गरेका थिए ।
![चर्चा बटुल्दै गायिका नितु पुन मगर [तस्बिरहरु]](https://gurkhamedia.com/uploads/posts/1-1764317145.jpg)
![सहारा यूकेले अर्डर दियो २५ औं आहा रारा पोखरा गोल्डकपका लागि ट्रफी [भिडियोसहित]](https://gurkhamedia.com/uploads/posts/588148836_1349565109463339_1498477943217599803_n-1764050714.jpg)
