लन्डन । गोर्खा मिडिया यूकेको आयोजनामा गत ३१ अगस्टमा भएको गायिका पवित्र गुरुङ एकल साँझबाट संकलित रकम विद्यालय र समाजघर निर्माण खर्च गरिने भएको छ ।
गायिका पवित्र गुरुङको उपस्थितिमा कात्तिक २७ गते बसेको नुवाकोट दुप्चेश्वर गाउँपालिकाको गोल्फुभन्ज्याङ माध्यमिक विद्यालयको विद्यालय व्यवस्थापन समितिको बैठकले प्राप्त रकम विद्यायको घेराबार र प्रवेशद्वार निर्माणमा खर्च गर्ने निर्णय गरेको हो । अ म्युजिक सोलो विथ पवित्र गुरुङ एन्ड डिएमटी ब्यान्ड च्यारिटी नाइटबाट संकलन भएको जम्मा ९ लाख १२ हजार ६ सय ८० बाट १ लाख गाउँकै समाजघरको लागि छुट्याइएको र बाँकी ८ लाख १२ हजार ६ सय ८० रकम विद्यालय घेराबार तथा विद्यालय प्रवेशद्वारमा खर्च गर्ने निर्णय भएको गायिका पवित्र गुरुङले जानकारी दिएकी छन् ।
उनले ती सबै काम अब छिटो अगाडि बढ्ने समेत विश्वास व्यक्त गरेकी छन् ।
'मेरो आफ्नै विद्यालयको लागि केही सानो सहयोग गर्ने अवसर पाएकोमा आफूलाई निक्कै भाग्यमानी महसुस गरेकी छु । र यो अवसर सम्पूर्ण बेलायतवासीको सहयोगले सम्भव भएको हो । फेरि पनि सम्पूर्ण सहयोगी हातहरुमा धेरै आभार प्रकट गर्न चाहन्छु ।'
सोही दिन गोल्फुभन्ज्याङ माविकी भूतपूर्व विद्यार्थीसमेत रहेकी गायिका पवित्र गुरुङलाई विद्यालय परिवारको तर्फबाट स्वागत, सम्मान गरेको थियो । गायिका पवित्रले आफूलाई भव्य स्वागत गरेकोमा विद्यालय परिवारप्रति आभार प्रकट गरेकी छन् ।
'यो गरिमामय स्वागत र मायाको लागि यसै विद्यालयका प्रधानाध्यापक मानबहादुर तामाङज्यूलगायत श्री गोल्फुभन्ज्यायाङ माध्यमिक विद्यालयका सम्पूर्ण गुरुवर्ग, विद्यार्थी भाइबहिनीहरू, विद्यालय व्यवस्थापन समितिका सम्पूर्ण कार्यसमिति र समाजसेवी, बुद्धिजीवी, मान्यजनहरूप्रति म विशेष आभार व्यक्त गर्न चाहन्छु,' उनले फेसबुकमा लेखेकी छन् ।
सांगीतिक भ्रमणका क्रममा ६ महिना बेलायत बसेर गायिका पवित्र केही हप्ता अघि नेपाल फर्केकी थिइन् । उनी पहिलो बेलायतमा तमु धीं यूकेको निमन्त्रणामा र दोस्रोपटक जीआरएनसी यूकेको निमन्त्रणमा आएकी थिइन् । पवित्र सन् २०२१ मा पहिलो पटक तमु धीं यूकेको निमन्त्रणामा बेलायत आएकी थिइन् । दोस्रोपटक जीआरएनसी यूकेको निमन्त्रणामा गत अप्रिल दोस्रो साता बेलायत आएकी थिइन् ।
त्यसबीचमा उनले बेलायतमा रहँदा दर्जनौँ कार्यक्रममा प्रस्तुति दिएर दर्शक तथा श्रोताको मन मुटुमा बस्न सफल भइन् । तमु धीं यूकेद्वारा आयोजित गोर्खा कप, मगर संघ यूकेको ओपन कन्सर्ट, तमु धीं यूके र नेपाली राजदूतावास लन्डनको संयुक्त आयोजनामा भएको नेपाली मेलालगायत विभिन्न कार्यक्रममा दर्क नचाइन् । त्यसमा पनि सबैभन्दा विशेष भने गोर्खा मिडियाको आयोजनामा गत ३१ अगस्टमा भएको ‘A Musical Solo with पवित्र गुरुङ र DMT Band Charity Night’ भएको थियो ।
गोर्खा मिडियाले पाँचौँ वार्षिकोत्सवका अवसरमा १४ सेप्टेम्बरमा उनलाई पुरस्कृतसमेत गरेको थियो ।
