काठमाडौँ । धरान उपमहानगरपालिकाका मेयर हर्क साम्पाङ नेतृत्वको श्रम संस्कृति पार्टी निर्वाचन आयोगमा दर्ता भएको छ ।
आयोगका प्रवक्ता नारायणप्रसाद भट्टराईले आइतबार साम्पाङलाई दर्ताको प्रमाणपत्र दिइएको जानकारी दिए ।
२०७९ सालमा भएको स्थानीय तह निर्वाचनमा स्वतन्त्र उम्मेदवार बनेर मेयरमा विजयी साम्पाङले आफ्नो अध्यक्षतामा श्रम संस्कृति पार्टी गठन गरी दर्ताका लागि असोज १२ गते निर्वाचन आयोगमा निवेदन दिएका थिए ।
चुनाव चिह्न माटो राखिएको पार्टीमा उपाध्यक्ष देवराज लामा, महासचिव आर्यन राई, कोषाध्यक्ष समिता राई छन् ।
आयोगमा २०४ नम्बरमा दर्ता भएको श्रम संस्कृति पार्टीको केन्द्रीय कार्यालय काठमाडौँ महानगरपालिका- ४ मा रहने प्रमाणपत्रमा उल्लेख छ ।
आयोगबाट दल दर्ताको प्रमाणपत्र लिएपछि साम्पाङले आफ्नो पार्टी श्रम, उत्पादन र सामाजिक रूपान्तरणको एजेन्डा लिएर अघि बढ्ने बताए ।
‘हाम्रो एजेन्डा आजसम्म यो देशमा जे काम भएन, त्यही काम गर्ने हो। उत्पादन, निर्माण र सामाजिक रूपान्तरणका लागि हामी फिल्डमा निस्केर काम गर्छौं,’ उनले भने ।
साम्पाङले श्रम संस्कृति पार्टी अफिसमा बसेर भाषणमा सीमित नहुने र प्रत्यक्ष फिल्डमा गएर श्रमद्वारा परिवर्तन ल्याउने संगठन हुने दाबी गरे ।
‘आजसम्म म एक्लो अभियन्ता थिएँ, अब हामी सबै मिलेर देश उठाउनुपर्छ,’ उनले भने, ‘पहिले म धरानमा मात्र श्रमदान गर्थेँ, अब देशभर श्रमदान गर्न पाउने भएकोमा अत्यन्त खुसी छु।’
