फोक्स्टनमा बहुसांस्कृतिक महोत्सव, नेपाली समुदायको जीवन्त उपस्थिति

कर्मभूमि बेलायत

Home
कर्मभूमि बेलायत
फोक्स्टनमा बहुसांस्कृतिक महोत्सव, नेपाली समुदायको जीवन्त उपस्थिति

फोक्स्टनमा बहुसांस्कृतिक महोत्सव, नेपाली समुदायको जीवन्त उपस्थिति

गोर्खा मिडिया संवाददाता बुधबार, असार २५, २०८२

फोक्स्टन, केन्ट | फोक्स्टन नेपाली कम्युनिटी सेन्टरमा बहुसांस्कृतिक महोत्सव भव्य रूपमा सम्पन्न भएको छ ।

फोक्स्टन नेपाली समुदायद्वारा आयोजित र इक्वेटर फेस्टिभलको सहकार्यमा सम्पन्न यो कार्यक्रममा विभिन्न देश र समुदायबीचको एकता र सौहार्दपूर्ण वातावरण देखिएको थियो । महोत्सवको उद्घाटन दिउँसो १२ बजे अफ्रिकी ढोलक संगीतबाट सुरु गरिएको थियो ।

त्यसपछि फोक्स्टन नेपाली समुदायका अध्यक्ष क्याप्टेन रामबहादुर पुनमगरले स्वागत मन्तव्य राख्दै सहभागी सबैलाई धन्यवाद ज्ञापन गरे ।

कार्यक्रममा पञ्जाबी नृत्य, युक्रेनी कोइर गीत, ब्राजिलियन र इक्वेडोरियन नृत्य, बलिउड नृत्य जस्ता विविध प्रस्तुति देख्न पाइयो । नेपाली सांस्कृतिक कार्यक्रमले विशेष आकर्षणको रूपमा स्थान पायो । किरात राई यायोक्खा फोक्स्टनद्वारा साकेला शिली नृत्य, किरात याक्थुङ चुम्लुङद्वारा केलाङ, मगर समुदायद्वारा कौडा, खामभाषी मगर समाज युकेद्वारा भूमे र पुन मगर समाज युकेद्वारा पुर्ख्यौली नृत्य प्रस्तुत गरिएका थिए ।

दर्शकहरूले सांगीतिक प्रस्तुति, स्वादिलो अन्तर्राष्ट्रिय खाना, आकर्षक नृत्य, फेस पेन्टिङ र बालबालिकाका लागि खेल–तमासाजस्ता विविध गतिविधिबाट भरपूर मनोरञ्जन लिएका थिए। कार्यक्रममा सबै उमेर, जाति, धर्म र पृष्ठभूमिका व्यक्तिहरूको उल्लेखनीय उपस्थिति थियो।

कार्यक्रमको विशेष आकर्षणमध्ये एक, मगर जातीय सम्पदा टेन्टको उद्घाटन पनि गरिएको थियो ।

वर्षाको कारण केही असहजता भए तापनि सहभागीहरूको उत्साहले वातावरण झनै जीवन्त बनाएको आयोजकले जनाएको छ । कार्यक्रममा सहभागी सम्पूर्ण अतिथि, सांस्कृतिक समूह, स्वयंसेवक, संयोजक र सहकार्य संस्थाहरूलाई धन्यवाद दिंदै अध्यक्ष क्याप्टेन पुनले भने, “आजको दिन हाम्रो विविध सांस्कृतिक पहिचानको उत्सव हो । यस्ता कार्यक्रमले समुदायलाई अझ नजिक ल्याउँछ, सहिष्णुता बढाउँछ र हाम्रा संस्कृतिहरूको आदानप्रदानलाई बल दिन्छ ।”

प्रकाशित मिति: बुधबार, असार २५, २०८२ १२:०३

प्रतिक्रिया दिनुहोस्