शेष घलेको अपिल- १३ जना एक ठाउँमा बसेर निकास निकालौँ

मातृभूमि नेपाल

Home
मातृभूमि नेपाल
शेष घलेको अपिल- १३ जना एक ठाउँमा बसेर निकास निकालौँ

शेष घलेको अपिल- १३ जना एक ठाउँमा बसेर निकास निकालौँ

गोर्खा मिडिया संवाददाता शुक्रबार, वैशाख १२, २०८२

काठमाडौँ । गैर आवासीय नेपाली संघ (एनआरएनए) उच्चस्तरीय समिति संयोजक डा. शेष घलेले सम्पूर्ण एनआरएनएहरूलाई फुटेर होइन जुटेर अगाडि बढ्न अपिल गरेका छन् ।

एकता महाधिवेशनको लागि डेलिगेट्स बन्न संसारभरीबाट तीन हजारभन्दा धेरै नेपालीले आवेदन दिएको र कतिपय नेपाल आइसकेको उल्लेख गर्दै एकता महाधिवेशनलाई सघाउन उनले अपिल गरेका हुन्।

'निर्वाचन कार्य तालिका पनि सार्वजनिक भइसकेको छ । यस्तो अवस्थामा महाधिवेशन रोक्न खोज्नु वा कुनै किसिमको भ्रम छर्न खोज्नु उपयुक्त होइन,’ उनले भनेका छन्, ‘गैर आवासीय नेपाली नागरिकता, लगानी प्रवर्द्धन जस्ता मुद्दाहरूमा नेपाल सरकारसँग दह्रो वार्ता गर्न पनि हामी जुटेर अगाडी बढ्नुपर्ने अवस्था छ।’

सर्वोच्च अदालतको परमादेश, एनआरएनएको विधान मर्म र उच्चस्तरीय समितिले पारित गरेको कार्यविधिका आधारमा आफूहरूले एकताको महाधिवेशन गर्न लागेको डा. घलेको भनाइ छ ।

एकै थलोमा भेला भएर खुला छलफल गरेर अघि बढ्न समेत उनले एनआरएनएका अधिकारीहरूलाई आग्रह गरेका छन्।

‘एनआरएनएमा संस्थापक अध्यक्ष पूर्वअध्यक्षहरू र उच्चस्तरीय समितिका सबै १३ जना एक ठाउँमा बसेर छलफल गरी निकास निकालौँ । अहिलेको सन्दर्भमा सर्वोच्च अदालतको परमादेशअनुसार उच्चस्तरीय समितिले तोकेको मितिमा नै महाधिवेशन आयोजना गर्नु एकताको सूत्र हो,’ उनले भनेका छन् ।

प्रकाशित मिति: शुक्रबार, वैशाख १२, २०८२ १७:५७

प्रतिक्रिया दिनुहोस्