नेपालमा एमसीसी परियोजना स्थगित

मातृभूमि नेपाल

Home
मातृभूमि नेपाल
नेपालमा एमसीसी परियोजना स्थगित

नेपालमा एमसीसी परियोजना स्थगित

गोर्खा मिडिया संवाददाता मंगलबार, फागुन ६, २०८१

काठमाडौँ । नेपालमा मिलेनियम च्यालेञ्ज कर्पोरेसन (एमसीसी) नेपाल कम्प्याक्टअन्तर्गतका कार्यक्रम रोकिएका छन् । अमेरिकी राष्ट्रपति डोनाल्ड ट्रम्पको कार्यकारी आदेशपछि एमसीसी फन्डबाट भुक्तानी हुने कार्यक्रम पनि प्रभावित भएको हो ।

अर्थ मन्त्रालयले यसअघि ट्रम्पको कार्यकारी आदेशपछि अमेरिकी सहायता र अन्य कार्यक्रम ९० दिन रोकिने तर एमसीसीले निरन्तरता पाउने जनाएको थियो । तर मंगलबार अर्थ मन्त्रालयले तीन महिनाका लागि एमसीए नेपालअन्तर्गतका कार्यक्रम पनि स्थगित भएको जनाएको छ । एमसीसीले फागुन २ गते इमेलमार्फत उक्त परियोजना रोकिएको जनाएको अर्थमन्त्री विष्ण पौडेलको सचिवालयको भनाइ छ ।

एमसीसी कम्प्याक्ट कोषमा अमेरिकाको ५० करोड अमेरिकी डलर अनुदान र नेपाल सरकारको १९.७ करोड अमेरिकी डलर लगानी रहेको छ । यो रकम विद्युत् प्रशारण लाइन निर्माण र सडकको गुणस्तर वृद्धिलगायतमा खर्च हुने बताइएको छ ।

त्यस्तै, राष्ट्रपति ट्रम्पको कार्यकारी आदेशपछि अमेरिकी अन्तर्राष्ट्रिय विकास नियोग यूएसएडबाट प्राप्त हुने सहयोग पनि रोकिएको छ । यूएसएडबाट प्राप्त सहयोगले नेपालमा खोप, मातृ शिशु सेवा, बालबालिकाको पोषण, सरसफाइजस्ता क्षेत्रमा कार्यक्रम सञ्चालन हुँदै आएका छन् ।

प्रकाशित मिति: मंगलबार, फागुन ६, २०८१ २१:५६

प्रतिक्रिया दिनुहोस्