पोखरा । ‘सामाजिक कार्यका लागि नृत्य’ नारासहित सकारात्मक सन्देश दिँदै पोखरामा आयोजित ३५ प्लस स्टार्स सामूहिक नृत्य प्रतियोगिता २०८१ मा क्रबा आजी सिङ्दी तमु समाज प्रथम भएको छ ।
स्टार्स स्टुडियो प्रालिको आठौँ तथा स्टार्स फाउन्डेसन नेपालको पाँचौँ वार्षिकोत्सवका अवसरमा आयोजित प्रतियोगितामा अन्य सात टिमलाई पछि पार्दै सिङ्दी प्रथम बनेको हो ।
प्रज्ञा प्रतिष्ठान गण्डकीका सदस्य सचिव मनकुमार श्रेष्ठ, नवसाधना कला केन्द्रका प्रशिक्षक रविन गुरुङ र नृत्य निर्देशक प्रीति गुरुङको संयुक्त निर्णयमा अन्तिम नतिजा सार्वजनिक भएको थियो ।
सोही नतिजाको आधारमा च्याम्पियन बनेको सिङ्दीले नगद ५० हजार रुपैयाँ प्राप्त गर्यो । यस्तै द्वितीय बनेको कोल्मा बाहाकोट तमु समाजले २५ हजार तथा चिउली पार्चे तमु समाज तृतीय हुँदै नगद १० हजार रुपैयाँ प्राप्त गरेको छ ।
विजयी तथा उपविजेता टोलीलाई गण्डकी प्रज्ञा प्रतिष्ठानका कुलपति सूर्य खड्का बिखर्ची, पोखरा प्रज्ञा प्रतिष्ठानका संस्थापक कुलपति पदमराज ढकाल, आयोजक संस्थाका अध्यक्ष जसमाया गुरुङ जसु लगायतले पुरस्कार वितरण गरे ।
हाइकुमारी र भीमबहादुर सम्मानित
प्रतियोगीमध्ये सबैभन्दा बढी उमेर भएका महिलातर्फ सिङ्दी समाजका ६२ वर्षीया हाइकुमारी गुरुङ र पुरुषतर्फ दुरा सेवा समाजका ६९ वर्षीय भीमबहादुर दुरा सम्मानित भएका छन् ।
सकारात्मक सन्देश प्रवाह गरेको भन्दै उनीहरूलाई दोसल्ला, माला, घलेक तथा सम्मानपत्र अर्पण गरिएको हो ।
यस्तै गुरुङ चलचित्र एसोसिएसनको आठौँ अधिवेशन तथा १६औँ साधारणसभाबाट नवनिर्वाचित राजेश गुरुङ नेतृत्वको कार्यसमिति र कम्बोडियाका दरारिथ टिभ (वर्ल्ड साइक्लिस्ट) लाई पनि सोही अवसरमा सम्मान प्रदान गरिएको आयोजक संस्थाका अध्यक्ष जसु गुरुङले बताइन् ।
‘यो कार्यक्रम नितान्त फरक हो, विशेषगरी सन्देश दिने उद्देश्यले कार्यक्रम आयोजना गरेका हौँ,’ उनले भनिन्, ‘अरू कम्पिटिसनभन्दा बेग्लै गर्ने लक्ष्य अनुसार कार्यक्रम गरेका हौँ त्यसैले हामी सफल भएका छौ ।’
कार्यक्रमका अवसरमा स्टार स्टुडियोका कलाकारहरूले विविध मौलिक नृत्य प्रस्तुत गरेका थिए । गायक राजबहादुर गुरुङ र एमडी काफ्लेले सांगीतिक प्रस्तुती दिएका थिए ।
स्टार्स स्टुडियोले मौलिक लोक संस्कृतिको संरक्षणका काम गर्दै आएको छ भने, फाउन्डेसनले सामाजिक कार्यक्रममा क्रियाशील रहँदै आएको छ । स्टार्स स्टुडियो प्रालि तथा स्टार्स फाउन्डेसन नेपालको अध्यक्ष जसु गुरुङको सभापतित्वमा सम्पन्न कार्यक्रममा फाउन्डेसनका कोषाध्यक्ष दीपक गुरुङले स्वागत मन्तव्य व्यक्त गरेका थिए । सञ्चारकर्मी रोशनी गुरुङले कार्यक्रम सञ्चालन गरेकी थिइन् ।
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
-1731591869.jpg)
