लन्डन । तमु धीं यूकेले नेपाली दूतावास लन्डनकी नियोग प्रमुख रोशन खनाल र द्वितीय सचिव रामबाबु नेपालको बिदाइ गरेको छ ।
सोमबार ९ सेप्टेम्बर २०२४ मा मिचेटस्थित आफ्नै भवनमा एक समारोह आयोजना गरी कार्यवहाक राजदूतसमेत रहेकी खनाल र द्वितीय सचिव नेपाललाई बिदाइ गरिएको हो । खनाल र नेपाललाई अध्यक्ष हरि गुरुङले फेटा, खादा, पुष्पगुच्छा र मायाको चिनोसहित बिदाइ गरेका थिए । खनाल र नेपाल चार वर्षे कार्यकाल सकाएर केही दिनमै नेपाल फर्कंदै छिन् ।
तमु धीं यूकेका अध्यक्ष हरि गुरुङको अध्यक्षतामा भएको कार्यक्रममा वरिष्ठ उपाध्यक्ष जुमकाजी गुरुङले स्वागत मन्तव्य राखेका थिए । कार्यक्रम सञ्चालक महासचिव डा. विशाल गुरुङले स्वास्थ्य र सुरक्षा बारे जानकारी गराएका थिए । बिदाइ कार्यक्रममा नियोग प्रमुख खनालले बेलायतमा ४ वर्ष बिताएका गतिविधि भिडियोमार्फत देखाइएको थियो । सोही अवसरमा बेलायत भ्रमणमा रहेका वरिष्ठ पत्रकार एवं फोनिजका निवर्तमान अध्यक्ष डण्ड गुरुङ र कलाकार शिवदास गुरुङलाई समेत बिदाइ गरिएको थियो ।
कार्यक्रममा तमु धीं यूकेका संस्थापक अध्यक्ष मिनप्रसाद गुरुङले बिदाइ गरिएका नियोग प्रमुख, द्वितीय सचिव नेपाल, वरिष्ठ पत्रकार र कलाकार गुरुङद्वयलाई शुभकामना र शुभयात्रा भनेका थिए ।
कार्यवहाक राजदूतसमेत रहेकी खनालले तमु धीं यूकेले बेलायत र नेपालमा संस्कार, संस्कृति र सामाजिक क्षेत्रमा पुर्याएको योगदानबारे प्रशंसा गरेकी थिइन् । उनले आफूलाई यसअघि विभिन्न कार्यक्रममा निमन्त्रणा दिनुका साथै बिदाइ कार्यक्रमसमेत राखेकोमा तमु धीं यूके अध्यक्ष हरि गुरुङलगायत पदाधिकारी, सदस्यहरु सबैलाई धन्यवाद तथा कृतज्ञता व्यक्त गरेकी थिइन् । द्वितीय सचिव नेपालले पनि आयोजकप्रति धन्यवाद व्यक्त गरे ।
तमु धीं यूकेले नेपाली राजदूतावासको सहकार्यमा हरेक वर्ष नेपाली मेला आयोजना गर्दै आएको छ । यस पटक गत अगस्ट २५ तारिखमा १५ औं संस्करणको नेपाली मेला सम्पन्न गरेको थियो । तमु धीं यूकेका अध्यक्ष हरि गुरुङले आफू नेतृत्वको संस्थालाई कार्यवहाक राजदूत खनाल, द्वितीय सचिव नेपालसहित सबै टिमले पुर्याएको योगदानका लागि आभार व्यक्त गर्दै बिदाइ कार्यक्रममा आइदिएकोमा दुवैजनालाई आभार प्रकट गरे । उनले आगामी दिनमा खनाल र नेपालको उन्नति र प्रगति होस् भन्दै शुभकामनासहित कार्यक्रम समापन गरे ।
कार्यक्रममा बिदाइ भोज समेत व्यवस्था गरिएको थियो ।
![गोर्खा कप [कविता]](https://gurkhamedia.com/uploads/posts/ratna-gurung-1744036920.jpg)
![बेलायतमा यसरी गरियो २३ औं गोर्खा कपको तयारी [तस्बिरहरु]](https://gurkhamedia.com/uploads/posts/499424413_1092272429592350_8697503704045963673_n-1748110033.jpg)
![एनआरएनएको एकता महाधिवेशनबाट अध्यक्षमा महेशकुमार श्रेष्ठ निर्विरोध [विजयी सूची]](https://gurkhamedia.com/uploads/posts/Mahesh-shrestha-1746337658.jpg)
