लन्डन । बेलायतवासी समाजसेवी एवं मेन्टल हेल्थ कम्युनिटी नर्स सुष्मा गुरुङले सञ्चालन गरेको कार्यक्रम ‘कुराकानी’को सय शृंखला पूरा भएको छ । अब यस कार्यक्रमलाई अझ प्रभावकारी बनाउने तयारी गरिएको छ ।
सुष्मा गुरुङ मुख्य सञ्चालक रहेको यस कुराकानी कार्यक्रममा डा. विशाल गुरुङ, डा. जित गुरुङ र डा. विजयलगायत चिकित्सकको टोली सञ्चालकका रूपमा रहेका छन् । यसमा मुख्य रूपमा मानसिक स्वास्थ्य र स्वास्थ्यका अन्य विषयमा यसमा कुराकानी हुने गरेको छ । यो कार्यक्रम पछिल्लो समय बेलायतमा रहेका नेपाली समुदायबीच निकै लोकप्रिय छ । ग्रेटर रस्मुर नेपाली कम्युनिटीको आयोजनामा हरेक मंगलबार बेलुका ७ देखि ९ बजेसम्म यो कार्यक्रम प्रसारण हुने गरेको छ ।
![db08b4a4-0c68-4089-bd53-5094aa144fb6-1717431731.jpeg](https://gurkhamedia.com/uploads/posts/db08b4a4-0c68-4089-bd53-5094aa144fb6-1717431731.jpeg)
सय शृंखला पुगेको अवसरमा आइतबार एक विशेष अन्तरक्रियाको आयोजना गरिएको थियो । शिव कल्चरल एन्ड कम्युनिटी सेन्टर क्विन्स रोड अल्डरसटमा भएको अन्तरक्रियामा १०० जनाभन्दा बढीको उपस्थिति थियो । दिउँसो १ देखि ५ बजेसम्म भएको कार्यक्रममा गोर्खा पेन्सनरहरू, स्वास्थ्य कार्यकर्ता तथा सामाजिक अभियन्ताहरूको उपस्थिति थियो ।
सुष्मा गुरुङले सञ्चालन गरेको अन्तरक्रियाको अध्यक्षता ग्रेटर रस्मुर नेपाली कम्युनिटीका अध्यक्ष मान गुरुङले गरेका थिए । जसमा एनएचएस मेन्टल हेल्थ कम्युनिटी हेल्थ सेन्टरबाट क्यारोल मोरेको पनि उपस्थिति थियो । उनले सुष्मासँग प्रतिबद्धता जनाइ नेपाली समुदायका लागि यो कार्यक्रम गराइएको हो।
![18241e36-9eaf-4fd4-8e3b-2b7e84f2d4e2-1717431822.jpeg](https://gurkhamedia.com/uploads/posts/18241e36-9eaf-4fd4-8e3b-2b7e84f2d4e2-1717431822.jpeg)
डा. जित, फार्मासिस्ट सोम थापा, डा. विजय अधिकारी, सुष्मा गुरुङ, योगा कन्स्ट्रक्टर मेघ गुरुङ तथा डा. विशाल गुरुङहरूले गरेको अन्तर्क्रियामा गोर्खा अग्रजहरूले सहभागिता जनाएका थिए । स्वास्थ्य र मानसिक रूपमा कसरी आफू राम्रो हुनुपर्छ र सर सहयोग के कसरी गरिन्छ भन्नेबारे कुराकानी भएको थियो । कार्यक्रममा वरिष्ठ मेन्टल हेल्थ नर्स राजेन्द्र क्षेत्री पनि सहभागी थिए । हाल रिटायर्ड भइसकेका क्षेत्री युकेका पहिलो नेपाली नर्ससमेत हुन् ।
यसैगरी, सामुदायिक स्वास्थ्य सल्लाहकार निशा शर्मा, डा. रवि पन्त, न्युट्रीसनिस्ट धिरज घसे, सामाजिक अभियन्ता रोहित गुरुङ, पं मधुसूदन सत्याल पनि सहभागी थिए । सो अवसरमा कार्यक्रमलाई सहयोग गर्ने डेनटिस्ट नर्स प्रमिला लाबुङ राई, डा. देउमान गुरुङ, गोमा राना, भीम तामाङ र डा. लता सत्यालको प्रशंसासमेत गरिएको थियो ।
![45252bd0-404a-4d9a-aae9-e3ea72bb9add-1717431848.jpeg](https://gurkhamedia.com/uploads/posts/45252bd0-404a-4d9a-aae9-e3ea72bb9add-1717431848.jpeg)
सो अवसरमा ‘कुराकानी’ कार्यक्रम १०० शृंखलासम्मको यात्राबारे समीक्षात्मक छलफलसमेत भएको थियो । शिव कल्चरल एन्ड कम्युनिटी सेन्टरका अध्यक्ष विक्रम भट्टराईले पनि आफ्नो विचार राखेका थिए । यो एक नितान्त सामुदायिक काम रहेको ग्रेटर रस्मुरले जनाएको छ ।
![189b3f14-9511-4b56-b951-4ffda1a6f19d-1717432345.jpeg](https://gurkhamedia.com/uploads/posts/189b3f14-9511-4b56-b951-4ffda1a6f19d-1717432345.jpeg)
नेपाली स्वास्थ्यकर्मी, डाक्टर तथा नर्स, योगाका प्रशिक्षकहरू, पोषणविद्कासाथै सामाजिक अभियन्ता सहभागी भएको कार्यक्रममा आपसी भेटघाटको अवसर पनि जुरेको सहभागीले जनाएका छन् ।
सुष्माले नेपाली समुदायबीच मानसिक स्वास्थ्यबारे सचेतना फैलाउने उद्देश्यले दुई वर्षअघि कुराकानी कार्यक्रम सुरु गरेकी थिइन् ।