लन्डन । राष्ट्रिय सभाका अध्यक्ष गणेश तिमिल्सिनाले राष्ट्र निर्माणमा तल्लीन उम्मेदवारलाई बिजयी गराउन अपिल गरेका छन् । निर्वाचनमा व्यक्तिगत स्वार्थ भन्दा राष्ट्र निर्माणमा तल्लीन उम्मेदवारहरुलाई मत दिनुपर्ने जोड दिए ।
एमाले निकट प्रवासी नेपाली मञ्च बेलायत (ओएनएफ यूके) ले लण्डनमा आयोजना गरेको दशैं तिहार शुभकामना तथा च्यारिटी साँझलाई सम्बोधन गर्दै तिमिल्सिनाले उक्त कुरा बताए । अब मतदाताहरु सचेत रहनुपर्ने र भ्रष्ट, नराम्रा नेतालाई पाखा लगाउन आवश्यक रहेको बताए । आफ्नो पार्टी, पूराना नेता जिताउने भन्दा पनि राम्रोलाई जिताउनुपर्ने उल्लेख गरे ।
उनले भने–‘नेपालमा संविधान जारी भयो । तर, जनताले खोजेजस्तो परिवर्तन अनुभूति गर्न सकेका छैनन् ।’ गैर आवासीय नेपालीलाई प्रजातन्त्रको जननी बेलायतबाट सुशासन, विकास र समृद्धिका आइडिया स्वदेश लैजान आग्रह गर्दै नेपाललाई एसियाकै उत्कृष्ट देश बनाउन पर्याप्त स्रोत साधन भएको धारणा समेत राखे । उनी पहिलो पटक बेलायत भ्रमणमा आएका हुन् ।
ओएनएफ यूके अध्यक्ष तुंगभद्र भुसालको सभापतित्वमा भएको उक्त कार्यक्रममा समावेशी आयोगका सदस्य पुष्प तिमल्सिनाले आफू २१ बर्ष युरोप बसेर अन्त्यमा नेपाल नै फर्केको भन्दै अरुलाई पनि उमेर छंदैमा देशलाई केही गर्न आग्रह गरे । दूतावासकी उपनियोग प्रमुख रोशन खनालले ओएनएफ यूकेका च्यारिटी कार्यको प्रशंसा गर्दै दूतावासबाट हुने सहयोग भइरहने बताए ।
मञ्चका अध्यक्ष तुंगभद्र भुसालले प्रवास नेपाली समुदायभित्र विकास भएको एक आपसमै भिन्नता खोज्ने प्रवृत्ति परिवर्तन गरी समानताहरु खोज्दै अघि बढ्ने तथा पहिलो र नयाँ पुस्तालाई जोड्ने दिशामा अघि बढ्नुपर्ने बेला आएको धारणा व्यक्त गरे ।
कार्यक्रममा एनआरएनए आइसीसी अध्यक्ष कुल आचार्य, प्रवासी नेपाली मञ्च ग्लोवल कमिटी अध्यक्ष भक्त गुरुङ लगायतले दशैं तिहार शुभकामना दिएका थिए। कार्यक्रम संयोजक ओएनएफ यूके पूर्व अध्यक्ष रामशरण सिम्खडाले राजनीतिक संगठन भएपनि ओएनएफ यूकेले अप्ठेरोमा आर्थिक तथा सामाजिक सहयोगलाई निरन्तरता दिएको बताए ।
सो अवसरमा स्थानीय कलाकारहरुले विभिन्न नाचगान प्रस्तुत गरेका थिए भने संस्थाको गतिविधि समेटिएको ‘डकुमेन्ट्री’ समेत देखाइएको थियो । त्यस्तै, गायक सपनकुमार राई र गायिका निरुशा भट्टराईको गायन तथा प्रसुना कंडेल, प्रतिभा अधिकारी, बिनु लामिछाने, सुरक्षा पंगेनी लगायतका कलाकारका नृत्य प्रस्तुत गरिएको थियो । च्यारिटी साँझबाट ८ हजार पाउन्ड हाराहारीमा कोष संकलन भएको मञ्चले जनाएको छ ।
-1730997466.jpg)
![जीआरएनसीको आयोजनामा ‘रेमेम्बरेन्स डे’ सम्पन्न [तस्बिरहरू]](https://gurkhamedia.com/uploads/posts/collage-1731198933.jpg)
