विश्वविख्यात पर्वतारोही निर्मल पुर्जा (निम्स दाइ) को निधन

मातृभूमि नेपाल

Home
मातृभूमि नेपाल
विश्वविख्यात पर्वतारोही निर्मल पुर्जा (निम्स दाइ) को निधन

विश्वविख्यात पर्वतारोही निर्मल पुर्जा (निम्स दाइ) को निधन

गोर्खा मिडिया संवाददाता शनिबार, साउन १६, २०८३

पोखरा । विश्वकीर्तिमानी पर्वतारोही निर्मल पुर्जा 'निम्स दाइ' को पाकिस्तानको ब्रोड पिक हिमालमा आएको हिमपहिरोमा परी निधन भएको छ । पुर्जा संस्थापक रहेको आरोहण कम्पनी ‘इलाइट एक्सपेड’ ले सामाजिक सञ्जालमार्फत उनको निधनको पुष्टी गरेको हो ।

गत बिहीबार (१४ साउन) मध्याह्नतिर ८ हजार ४७ मिटर अग्लो ब्रोड पिक हिमालको आरोहणका क्रममा गएको ठूलो हिमपहिरोमा पुर्जासहित १० जना आरोही बेपत्ता भएका थिए । बेपत्ता भएका १० जनामध्ये ६ जना नेपाली आरोही थिए । शुक्रबार गरिएको खोजी कार्यका क्रममा चार जनाको शव फेला परेको थियो । सो टोलीको नेतृत्व पुर्जा आफैँले गरिरहेका थिए ।

सन् २०१९ मा ६ महिना ६ दिनभित्र विश्वका ८ हजार मिटरभन्दा अग्ला सबै १४ वटा हिमाल चढेर विश्व कीर्तिमान कायम गरेपछि निर्मल पुर्जा विश्वभर चर्चामा आएका थिए । उनले बनाएको ‘प्रोजेक्ट पसिबल’ को कीर्तिमानले नेपालको पर्वतारोहण क्षेत्रलाई अन्तर्राष्ट्रिय स्तरमा नयाँ उचाइ दिएको थियो । काराकोरम हिमशृङ्खलामा पर्ने ब्रोड पिकलाई आरोहणका दृष्टिकोणले निकै कठिन र चुनौतीपूर्ण मानिन्छ ।

म्याग्दीमा जन्मिएर चितवनमा हुर्किएका पुर्जाको प्रारम्भिक सपना हिमाल चढ्ने नभई बेलायती सेनामा भर्ती हुने थियो । सन् २००३ मा १८ वर्षको उमेरमा उनी गोर्खा सैनिकमा भर्ती भएका थिए । सेनामा रहँदा उनले ६ वर्ष गोर्खा रेजिमेन्ट र १० वर्ष बेलायतको प्रतिष्ठित ‘यूके स्पेसल फोर्स’ (एसबीएस) मा सेवा गरेका थिए । कुल १६ वर्षको सैन्य सेवापछि उनले हिमाल आरोहणलाई आफ्नो मुख्य लक्ष्य बनाएका थिए ।

उनको आरोहण यात्रा सन् २०१२ बाट सुरु भएको थियो । बेलायती सेनाको विशेष फौजमा कार्यरत रहँदा बिदाको समयमा सगरमाथा आधार शिविर पुगेपछि उनको हिमालप्रतिको लगाव बढेको थियो । त्यसपछि उनले एकपछि अर्को गर्दै कठिन हिमालहरू आरोहण गरेर विश्वलाई आश्चर्यचकित पारेका थिए ।

आफ्ना बुबा र दाजुहरू जस्तै सैन्य सेवामा नाम कमाएका निम्स दाइले पर्वतारोहणमा पनि कहिल्यै नमेटिने इतिहास रचेर बिदा भएका छन् । उनको निधनले नेपाली र अन्तर्राष्ट्रिय पर्वतारोहण क्षेत्रमा अपूरणीय क्षति पुगेको छ ।

प्रकाशित मिति: शनिबार, साउन १६, २०८३ १७:१४

प्रतिक्रिया दिनुहोस्