गुरुङ चलचित्र र संस्कृतिकर्मी केश बहादुर गुरुङको निधन

मातृभूमि नेपाल

Home
मातृभूमि नेपाल
गुरुङ चलचित्र र संस्कृतिकर्मी केश बहादुर गुरुङको निधन

गुरुङ चलचित्र र संस्कृतिकर्मी केश बहादुर गुरुङको निधन

गोर्खा मिडिया संवाददाता सोमबार, असार २२, २०८३

पोखरा । गुरुङ चलचित्र क्षेत्रका मार्गनिर्देशक एवं वरिष्ठ संस्कृतिविद् केशबहादुर गुरुङको ६७ वर्षको उमेरमा निधन भएको छ । नशा सम्बन्धी समस्याबाट विगत ६ वर्षदेखि पीडित गुरुङको सोमबार बिहान पोखरा–१४, चौँथेस्थित आफ्नै निवासमा मृत्यु भएको गुरुङ फिल्म एसोसिएसन (जिफान) का पूर्व भोजबहादुर गुरुङले बताए ।

विसं २०१६ सालमा कास्कीको मादी गाउँपालिका वडा नं १, खिलाङमा जन्मिएका गुरुङले २०५२ सालदेखि गुरुङ चलचित्रको सुरुआत गरेका थिए । पोखरामा रहेर ‘परम्परा फिल्म्स’ मार्फत ‘न्ह्यान्सो न्होरी’ (कुइरोभित्र) र ‘ह्युलै माया’ गीत समावेश भएको चलचित्रको निर्माण तथा निर्देशन गरेर उनले यो क्षेत्रमा नयाँ इँटा थपेको जिफानका पूर्वअध्यक्ष भोजबहादुरले जानकारी दिए । चलचित्र मात्र नभई ‘मदी स्योँरी’ र ‘क्या राम्रो खिलाङ’ जस्ता कालजयी गीतहरू मार्फत उनले गुरुङ कला र भूगोललाई विश्वमाझ चिनाएका थिए ।

उनले लामो समयसम्म टेलिभिजन कार्यक्रम ‘नमस्ते पोखरा’ मार्फत गाउँबस्तीका मौलिक पहिचान र संस्कृतिलाई उजागर गरेका थिए । च्यानल नेपाल, सगरमाथा टेलिभिजन र नेपाली टिभी युकेमा आबद्ध रहेर उनले गुरुङ भाषा र संस्कार संरक्षणमा अनवरत योगदान दिएका थिए ।

जिफानका आजीवन सदस्य समेत रहेका गुरुङलाई एक कुशल निर्देशक, निर्माता, गायक र प्रस्तोताका रूपमा मात्र नभई गुरुङ संस्कृतिका संरक्षकका रूपमा पनि लिइन्छ । उनको निधनले गुरुङ चलचित्र र सांस्कृतिक क्षेत्रमा अपूरणीय क्षति पुगेको जिफानका पूर्वअध्यक्ष भोजबहादुरले बताए ।

प्रकाशित मिति: सोमबार, असार २२, २०८३ २३:४४

प्रतिक्रिया दिनुहोस्