बेलायतमा स्रष्टा ‘चिमखोले काइँला’ को एकल प्रस्तुति हुने

साहित्य

Home
साहित्य
बेलायतमा स्रष्टा ‘चिमखोले काइँला’ को एकल प्रस्तुति हुने

बेलायतमा स्रष्टा ‘चिमखोले काइँला’ को एकल प्रस्तुति हुने

गोर्खा मिडिया संवाददाता मंगलबार, असार २, २०८३

बेलायत । नेपाली कला, साहित्य र संस्कृतिको संरक्षण तथा प्रवर्द्धनमा क्रियाशील संस्था नेपाली प्रतिभा प्रतिष्ठान, बेलायतले आफ्नो नियमित कार्यक्रम ‘अभिव्यक्ति श्रृङ्खला-१७’ आयोजना गर्ने भएको छ। यसपटकको श्रृङ्खलामा विशिष्ट स्रष्टा दूतबहादुर पुन ‘चिमखोले काइँला’ ले आफ्नो एकल प्रस्तुति दिने तयारी पुरा भएको आयोजकले जानकारी दिएको छ।

२८ जुन २०२६ (शनिबार) का दिन अल्डरसटस्थित ‘द एम्पायर हाई स्ट्रिट’ मा उक्त कार्यक्रम आयोजना गरिने भएको छ। दिउँसो सवा १२ बजेदेखि सुरु हुने सो समारोहमा स्रष्टा पुनका विभिन्न साहित्यिक कृतिहरू र उनको सिर्जनात्मक यात्राका विषयमा चर्चा गरिने प्रतिष्ठानले बताएको छ ।

लामो समयदेखि नेपाली साहित्यमा निरन्तर कलम चलाउँदै आएका चिम्खोले काइँला उपनामले चिनिएका पुनद्वारा लिखित ‘सुनदन्ते’ सन् २००७ कवितासंग्रह, ‘लण्डनको कोशेली’ सन् २००९ आधुनिक गीति एल्बम, ‘युकेको जिन्दगी’ सन् २०११ कवितासंग्रह, ‘यूकेतिर जाउली’ सन् २०१३ दोहोरी गीति एल्बम, ‘मेजर पेन्सन खाउली’ २०१६ फिल्म निर्माण (निर्माता, पटकथा लेखन र गीतहरुको शब्द रचना आफैं), ‘वेस्ट अफ चिम्खोले काइँला’ डिभीडी २०१७, ‘अर्ली भाइ’ २०१७ कथासंग्रह, मगर संघ यूके इतिहासदेखि वर्तमानसम्म २०१९, आधा यात्रा (हस्त–नेत्र स्मृति ग्रन्थ सम्पादन) वि.सं.२०७७, गोलार्द्धलाई चक्कर मर्दा (नियात्रासंग्रह) वि.सं.२०७७, लोसोगोठदेखि बकिङ्गघम प्यालेससम्म (व्यक्तित्व) वि.सं. २०७७ र बाह्रौं कृतिः लन्डन घुमौला (गीतिसङ्ग्रह) जस्ता एक दर्जनभन्दा बढी कृतिहरू प्रकाशित भइसकेका छन् । प्रवासमा रहेर पनि नेपाली भाषा र साहित्यको श्रीवृद्धिमा योगदान पुऱ्याउने उद्देश्यले प्रतिष्ठानले यस्तो कार्यक्रमको परम्परा बसालेको आयोजकले बताएको छ ।

प्रकाशित मिति: मंगलबार, असार २, २०८३ १०:३३

प्रतिक्रिया दिनुहोस्