नेशनल ओलम्पिक एकेडेमीका चेयरमेन तेजबहादुर गुरुङसँग तमू समाज कुवेतका पदाधिकारीहरूको भेट

प्रमुख समाचार

Home
प्रमुख समाचार
नेशनल ओलम्पिक एकेडेमीका चेयरमेन तेजबहादुर गुरुङसँग तमू समाज कुवेतका पदाधिकारीहरूको भेट

नेशनल ओलम्पिक एकेडेमीका चेयरमेन तेजबहादुर गुरुङसँग तमू समाज कुवेतका पदाधिकारीहरूको भेट

गोर्खा मिडिया संवाददाता आइतबार, माघ ४, २०८२

कुवेत । कुवेतमा जारी २२औँ एसियन पुरुष ह्याण्डबल च्याम्पियनसिप (१५–२९ जनवरी २०२६)को अवसरमा ह्याण्डबल एशोसिएसन, कुवेतको विशेष निमन्त्रणामा कुवेत आएका ह्याण्डबल एशोसिएसन नेपालका मानार्थ अध्यक्ष तथा नेशनल ओलम्पिक एकेडेमीका चेयरमेन तेजबहादुर गुरुङसँग तमू समाज कुवेतका पदाधिकारीहरूले शिष्टाचार भेट गरेका छन् ।

कुवेतको साल्मियास्थित रोयल गाउँले रेस्टुरेन्टमा १६ जनवरीमा आयोजित रात्रिभोज कार्यक्रममा तमू समाज कुवेतकी अध्यक्ष रञ्जना गुरुङले खादा तथा फूलको गुच्छा प्रदान गरी स्वागत गर्दै कुवेतमा रहेका प्रवासी नेपालीहरूको अवस्था तथा तमू समाज, कुवेतका गतिविधिबारे जानकारी गराएकी थिइन् ।

कार्यक्रममा मन्तव्य राख्दै अध्यक्ष तेजबहादुर गुरुङले व्यक्तित्व विकासमा खेलकुदको महत्वपूर्ण भूमिका रहेको उल्लेख गरे । खेलकुदले शारीरिक तन्दुरुस्ती, अनुशासन, टिमवर्क तथा मानसिक सन्तुलन कायम गर्न मद्दत गर्ने उनको भनाइ थियो । साथै, बालबालिकालाई पढाइसँगै खेलकुदमा पनि अभिप्रेरित गर्नुपर्नेमा उनले जोड दिए ।

तेजबहादुर राष्ट्रिय ह्याण्डबलका पूर्वराष्ट्रिय खेलाडी तथा पूर्वप्रशिक्षक रहिसकेका व्यक्ति हुनुका साथै एसियन ह्याण्डबल फेडेरेसन (UDC) सदस्य, नेपाल ओलम्पिक कमिटीका पूर्वउपाध्यक्षलगायत विभिन्न खेलकुद संस्थामा सक्रिय भूमिका निर्वाह गर्दै आएका छन् ।

612322351_893199523267704_2451513626925386618_n-1768722041.jpg