लन्डन । तमुधिं युकेद्वारा आयोजित २१औं गोर्खाकप एलजी लोएन्सले हात पारेको छ । इंग्ल्यान्डको दक्षिण पश्चिममा पर्ने नेपालीहरुको घनाबस्ती रहेको सहर अल्डरसटकै क्वीन्स एभिन्यू फुटबल ग्राउन्डमा आइतबार भएको खेलमा मुख्य टिमतर्फ प्लमस्टेड एफसीलाई ३-१ गोल अन्तरले पराजित गर्दै एलजी लोएन्स च्याम्पियन बनेको हो । प्लमस्टेड एफसी रनरअप भए ।
प्रतियोगितामा ४४ टिमले भाग लिएका थिए । जसमा ३२ वटा मुख्य टिम, १० वटा भेट्रेन टिम र लेडिजहरुका २ टिमले प्रतिस्पर्धा गरेका थिए । भेट्रेनतर्फ हिमालन एफसी पेनाल्टी सुटआउटबाट विजेता बने । ईन्टेक २००० ले रनरअपमा चित्त बुझाउनु पर्यो । लेडिजतर्फ दुई टिममात्र भएकाले क्रमशः म खेल्छु एफसी र रन्डरबोल्ट्स एफसी विजेता र रनरअप बने ।
वेष्ट प्लेयरको उपाधि सौगात गुरुङले पाए । टप स्कोररको उपाधि रेगन गुरुङले प्राप्त गरे । वेष्ट म्यानेजर एलजी लोइनका सोम गुरुङ बने । लेडिजतर्फका वेष्ट खेलाडी सुष्मिता शाही भइन् ।
मुख्य टिमका विजेतालाई २,५०० पाउन्ड, रनरअप टिमलाई १५०० पाउन्ड, भेट्रेनका विजयी टिमलाई १२०० पाउन्ड, रनरअप टिमलाई ८०० पाउन्ड र लेडिज टिमलाई ५०० पाउन्ड र ३०० पाउन्डको चेक प्रायोजकहरुले दिएका थिए । साथै विजयी खेलाडीहरुलाई मेडल र सर्टिफिकेट दिइएको थियो ।
पुरस्कारका प्रायोजकहरु क्रमशः नेपाल भिलेज टिम, श्री लक्की ज्वेलर्स अल्डरसट, हेम्पसायर एकाउन्टेन्ट लिमिटेड, मान ट्राभल्स, आइएमई नेपाल, किङ्ग्स गेट मोर्गेजेज थिए । करिब २० हजार जनसागर उर्लिएको टिकट वितरणका संयोजक श्रीचन्द्र गुरुङले बताए ।
प्रमुख अतिथि रशमोर बरो काउन्सिलका मेयर क्लाइभ ग्रयाटन, विशेष अतिथि लन्डनस्थित नेपाली दूतावासकी नियोग उपप्रमुख रोशन खनाल, ब्रिगेडियर पीएस रिहाल एमबीई, विभिन्न संघसंस्थाका प्रमुखहरु, काउन्सिलरहरु, सेनाका सिनियर दर्जाहरु, धर्मगुरुहरु, पत्रकारहरु गरी करिब १५० जति अतिथि नै थिए । १६ वर्षमुनिका बेल्जियमको राष्ट्रिय खेलाडी गोरख घलेको उपस्थिति रहेको थियो।
तमुधिं यूकेका अध्यक्ष हरि गुरुङ, संयोजक क्या. दिपकराज घले, टिम दर्तामा सुलभ गुरुङ, कुमार गुरुङ, ले. कुसाङ गुरुङ, मे. रि. खुशीमान गुरुङ, स्टल व्यापार संयोजक कमल गुरुङ, पाहुना सत्कारमा परशु गुरुङ, मे. रि. कृष्ण गुरुङ, वरिष्ठ उपाध्यक्ष जुमकाजी गुरुङ, पोर्टलु क्याम्पेनका दुर्गा गुरुङ, कोषाध्यक्ष दिलमाया गुरुङ, मिडिया सेक्रेटरी एसके गुरुङ, तमुधिं आमा समूहका अध्यक्ष सन्ध्या गुरुङ र सम्पूर्ण टिम कार्यक्रम सफल बनाउन सक्रियरुपमा लागिपरेका देखिन्थे ।
फुटबलबाहेक छेलो प्रतियोगिता पनि आयोजना गरिएको थियो । छेलोमा प्रथम भएर निरज गुरुङले २०० पाउन्ड र भेट्रेन तर्फको प्रथम गोकुल गुरुङले २०० पाउन्ड पुरस्कार पाए । ठेलोको पुरस्कार प्रायोजक सेवा मोर्गेजेजले गरेको थियो ।
आरएलसी टिमले पारासुट डिस्प्ले गरेको थियो । सयपत्री कल्चरल ग्रुपले सानो नानीहरुको अति आकर्षक नाच प्रस्तुत गरेको थियो । गायक धिराज राईले बुद्ध वाज बोर्न इन नेपाल गीत गाएका थिए ।
प्रवेश र टिकटको कठिन जिम्मेवार साउथईष्ट रेजिनल तमुधिंले निभाएको थियो । घमाइलो दिन बिहानदेखि नै भोलेन्टियरहरु खटिएका थिए । टिकट छपाउनको लागि घले मोर्गेजेजले १६०० पाउन्ड प्रायोजन गरेको कोषाध्यक्ष दिलमाया गुरूङले बताइन् । यसपटकको गोर्खाकप विशेष रहेको आयोजक बताउँछ । 'पहिलो पटक नेपालबाट खेलाडी उतार्न सफल भयौं । वेल्स, स्कटल्यान्ड र नेदरल्यान्डबाट पनि सहभागी भए । र अहिलेसम्मको नै अधिकतम दर्शकहरु सहभागी भए। यो तमुधिं युकेको मात्र नभई सम्पूर्ण यूकेवासी नेपालीको सफल कार्यक्रमको उदाहरण भयो,' अध्यक्ष हरि गुरुङले गोर्खा मिडियासँग भने ।
कार्यक्रममा तमुधिं अध्यक्ष हरि गुरुङ, संयोजक क्या. दिपक गुरुङ, नेपाली दूतावासकी नियोग उपप्रमुख रोशन खनाल र मेयर ग्राथनले छोटो मन्तव्य राखेका थिए । धौलागिरि नौमती बाजाका साथ भीआईपीहरुलाई आगमन गराएको थियो ।
नेपालबाट आएका खेलाडीहरुले पहिलो पटक गोर्खाकपको अनुभव लिएको नेपाल टिम कप्तानले बताए ।
-1732095969.jpg)
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
