सागर तामाङ
काठमाडौं । काठमाडौंको स्वयम्भूस्थित क्वालिटी दरबार ब्याङ्क्वेटमा २०८३ असोज २८ गते बुधबार एक कार्यक्रम आयोजना गरी ‘कहाँ भयौ बेपत्ता’ बोलको गीत तथा भिडियो सार्वजनिक (लोकार्पण) गरिएको छ । भोटेकोशी नदीमा भदौ १० गते आएको अप्रत्याशित बाढीका कारण ज्यान गुमाउने, बेपत्ता हुने तथा बाढीबाट प्रभावित परिवार र आफन्तजनप्रति समर्पित उक्त गीत तथा भिडियोको लोकार्पण वरिष्ठ गायक तथा संगीतकार सुरेश अधिकारीले गरेका हुन् ।
मिठु तामाङको सभाध्यक्षतामा सम्पन्न कार्यक्रममा वरिष्ठ गायक तथा संगीतकार सुरेश अधिकारी प्रमुख अतिथिका रूपमा उपस्थित थिए । कार्यक्रममा नेपाल तामाङ घेदुङका संघीय उपाध्यक्ष प्रेम लो, तामाङ पत्रकार संघका केन्द्रीय अध्यक्ष नेत्र मोक्तान, आदिवासी चलचित्र महासंघका कार्यवाहक अध्यक्ष भुइँसाल लामा, सगरमाथा रेडियोका पत्रकार बुद्ध योञ्जन, तामाङ चलचित्र निर्देशक संघका महासचिव विनय दोङ तथा युथ क्रियसन नेपालका अध्यक्ष रवि लामालगायत विशिष्ट व्यक्तित्वहरूको विशेष उपस्थिति रहेको थियो। साथै, गीत–संगीतप्रेमी दर्शक, कलाकार, सञ्चारकर्मी तथा शुभचिन्तकहरूको बाक्लो उपस्थिति रहेको थियो ।
२०७२ सालको भूकम्पको पीडाबाट जन्मिएको गीत
गीतका गायक, रचनाकार तथा संगीतकार सूर्यमान तामाङ वाइबाले गीत तयार हुनुको पृष्ठभूमिबारे जानकारी दिँदै २०७२ सालको विनाशकारी भूकम्पसँग जोडिएको आफ्नो पीडादायी अनुभव सुनाए ।
उहाँका अनुसार, भूकम्प आउनुअघि रेकर्ड गरेर सुरक्षित राखिएका गीतहरू त्यसबेला घरसँगै पुरिएर नष्ट भएका थिए । त्यतिबेला क्यासेट टेपमा गीत रेकर्ड गरेर राख्ने चलन थियो। भूकम्पका कारण घरसँगै ती गीतहरू पनि नष्ट भएपछि उहाँले ठूलो क्षति बेहोर्नुपरेको थियो ।
अहिले भोटेकोशी नदीमा आएको बाढीले निम्त्याएको दुःखद घटनाले उनलाई विगतको त्यही पीडाको स्मरण गरायो । प्राकृतिक विपत्तिमा ज्यान गुमाउने, बेपत्ता हुने तथा आफन्त गुमाएर पीडामा रहेका परिवारहरूको दुःख र वेदनालाई महसुस गर्दै यस गीतको जन्म भएको उनले बताए ।
गीतमार्फत विपत्तिमा परेका परिवारहरूको पीडा उजागर गर्नुका साथै उनीहरूप्रति सहानुभूति, समवेदना र मानवीय ऐक्यबद्धता व्यक्त गर्ने उद्देश्य रहेको उहाँको भनाइ थियो। गीतको पृष्ठभूमिबारे जानकारी दिँदै उहाँले कार्यक्रममा उपस्थित अतिथिहरूलाई स्वागत मन्तव्यसमेत राख्नुभएको थियो ।
प्रमुख अतिथि सुरेश अधिकारीद्वारा गीतको प्रशंसा
कार्यक्रमका प्रमुख अतिथि वरिष्ठ गायक तथा संगीतकार सुरेश अधिकारीले ‘कहाँ भयौ बेपत्ता’ गीत निकै राम्रो बनेको बताउँदै गायक, संगीतकार, कलाकार तथा सम्पूर्ण निर्माण टिमलाई बधाई दिए ।
गीत–संगीतको महत्वबारे चर्चा गर्दै उनले आफ्नी आमालाई गुमाउँदाको पीडादायी क्षणसमेत स्मरण गरे । व्यक्तिगत जीवनमा भोग्नुपरेको वियोगको अनुभव सुनाउँदै उनले गीतमा अभिव्यक्त दुःख, वेदना र भावनाको प्रशंसा गरे । साथै, गीतका गायक तथा भिडियो निर्माणमा संलग्न सम्पूर्ण टिमलाई बधाई तथा आगामी सिर्जनात्मक यात्राका लागि शुभकामना व्यक्त गरे ।
कार्यक्रमको अन्त्यतिर उनले बडादसैँ, तिहार तथा छठ पर्वका अवसरमा सम्पूर्ण नेपाली दाजुभाइ तथा दिदीबहिनीहरूलाई शुभकामना व्यक्त गरेका थिए ।
चर्चित तामाङ कलाकारहरूको अभिनय
सूर्यमान तामाङ वाइबाको शब्द तथा संगीत रहेको यस गीतमा सूर्यमान तामाङ र योजम तामाङको स्वर रहेको छ । मिठु तामाङको लगानीमा निर्माण गरिएको गीत तथा भिडियोमा तामाङ समुदायका चर्चित कलाकारहरू प्रेम लामा, भुइँसाल लामा, छेवाङ तेन्जिङ लामा, बिणी लोहनी, मिठु तामाङ, कृष्ण तामाङ, सरोज तामाङ, चन्द्रबहादुर तामाङ, राममाया तामाङ, पूर्णमाया तामाङ तथा नुवाकोटका लोहनी परिवारलगायत कलाकारहरूको अभिनय रहेको छ ।
कलाकारहरूले भिडियोमा प्राकृतिक विपत्तिले निम्त्याएको पीडा, बिछोड र मानवीय संवेदनालाई अभिनयमार्फत जीवन्त रूपमा प्रस्तुत गरेका छन् । बाढीका कारण प्रभावित परिवारहरूको दुःख र आफन्तको पर्खाइमा रहेका व्यक्तिहरूको भावनालाई गीत तथा भिडियोमार्फत अभिव्यक्त गर्ने प्रयास गरिएको छ ।
गीतको एरेन्जमेन्ट छेवाङ तेन्जिङ लामाले गरेका छन् भने भिडियोको छायाङ्कन, सम्पादन तथा निर्देशन विजय रुम्बाले गरेका हुन् ।
मिठु तामाङद्वारा धन्यवाद ज्ञापन
कार्यक्रमको सभाध्यक्षता गर्नुभएकी मिठु तामाङले गीत तथा भिडियो लोकार्पण कार्यक्रममा उपस्थित प्रमुख अतिथि, विशिष्ट अतिथि, कलाकार, सञ्चारकर्मी, गीत–संगीतप्रेमी दर्शक तथा सम्पूर्ण सहयोगीहरूलाई धन्यवाद ज्ञापन गरे । उनले सबैप्रति आभार व्यक्त गर्दै कार्यक्रम समापन गरेका थिए । कार्यक्रमको सञ्चालन छेवाङ तेन्जिङ लामाले गरेका थिए ।
विपत्तिमा परेका परिवारप्रति समर्पित सिर्जना
‘कहाँ भयौ बेपत्ता’ गीत तथा भिडियो प्राकृतिक विपत्तिबाट प्रभावित परिवारहरूको पीडा, दुःख र वेदनालाई समर्पित गरिएको छ । गीत–संगीतमार्फत मानवीय संवेदना उजागर गर्ने यस प्रयासले विपत्तिको घडीमा एकअर्काप्रति सहानुभूति, सहयोग र ऐक्यबद्धताको भावना अभिवृद्धि गर्ने अपेक्षा गरिएको छ ।
कार्यक्रममा सहभागी अतिथि, कलाकार, सञ्चारकर्मी तथा गीत–संगीतप्रेमी दर्शकहरूले यस सिर्जनात्मक प्रयासको प्रशंसा गरेका थिए । प्राकृतिक विपत्तिमा ज्यान गुमाउनेहरूप्रति भावपूर्ण श्रद्धाञ्जली अर्पण गर्दै बेपत्ता भएकाहरूको सुरक्षित उद्धार र प्रभावित परिवारहरूले दुःख सहन सक्ने शक्ति प्राप्त गरून् भन्ने कामनासमेत गरिएको थियो ।
कार्यक्रममा ज्यान गुमाउनेहरूप्रति भावपूर्ण श्रद्धाञ्जली, बेपत्ता भएकाहरूको सुरक्षित उद्धारको कामना तथा बाढीबाट प्रभावित सम्पूर्ण परिवारप्रति हार्दिक समवेदना पनि व्यक्त गरिएको छ ।
