फार्नबोरो। गोर्खा भवन फार्नबोरोमा जी१० का सदस्यहरू र अल पार्टी पार्लियमेन्ट्री ग्रुप (एपीपीजी) नेपालका अध्यक्ष तथा अल्डरसटका सांसद एलेक्स बेकरबीच दुई घन्टा छलफल भएको छ । २३ नोभेम्बरका दिन एपीपीजी नेपाल गठन भएपश्चात जी१० का सदस्यसँगको पहिलो बैठक भएको हो ।
बैठकमा जी१० बाट बीजीडब्लूएसका अध्यक्ष मे. रि. टिकेन्द्र दल देवान जेपी, गेसोका प्रतिनिधि रामकाजी गुरुङ, अनसनकारीद्धय धनबहादुर गुरुङ र श्रीमती पुष्पा राणा घले र हेमस्यार काउन्टी काउन्सिलर एलेक्स क्रोफोर्ड सहभागी थिए।
मे. देवानले २१ पेजको ‘गोर्खा अभियानको संक्षिप्त जानकारी’ दस्ताबेज तयार पारेर एमपीलाई मिटिङ पहिलै नै जानकारी दिइसकेको बताए। त्यसैले बैठक छोटो र बुँदागत रूपमा अगाडि बढेको थियो। मे. देवानले दस्ताबेजमै भएका बुँदामा जोड दिँदै बोलेका थिए।
२१ पेजमा ब्रिटिस सेनामा गोर्खाको भूमिका, गोर्खा वेलफेयर ट्रस्टका बारे, भेदभाव, भेदभावको रिलाइजेसन,भुपू गोर्खा संगठनहरु, गोर्खा सेटलमेन्टमा बीजीडब्लूएस, नेपाली दूतावास लन्डनको बारे, जी टू जीका बैठकहरू, अन्तिम चरण र त्रिपक्षीय सम्झौता, ट्यकोसको बारे समेटिएको देवानले बताए।
बैठकमा धनबहादुर गुरुङले भोग हडताल बस्नुका कारण र बसेपछि सरकारले दिएको तनावबारे बोलेका थिए। अब पनि दिन काट्ने हामीलाई अल्झाइराख्ने नभई हाई लेभलको निर्णायक मिटिङ हुनुपर्छ भन्नेमा जोड दिए । ‘जे प्रतिज्ञा गरेर भोग हडताल तोड्न लगायो र तीन वर्षसम्म केही उपलब्धि भएन। यस्तै नै हो भने नसोचेको घटना हुन सक्छ’ भनी एमपीलाई भावुक बनाए। सन् २००४ मा लेबर सरकारले सेटलमेन्टको ढोका खोलेको थियो। लेबरकै पालामा दुई सरकारबीच चलिरहेको वार्ताबाट केही सकारात्मक नतिजा आउँछ कि भन्ने आश रहेको उनले बताए ।
श्रीमती घलेले नेपालीमै बोलेकी थिइन् । मे देवानले दोभासेको काम गरेका थिए। पहिलो पटक एलेक्स महिला एमपीलाई भेट्दा खुशी व्यक्त गर्दै श्रीमान् गुमाउँदाको पिडा सुनाएका थिए। ‘तीन वर्षमा लाहुरे छुट्टी आउँथ्यो। ६ महिनामा फर्कन्थ्यो। अनि घरमा बच्चाको जन्म हुन्थ्यो। श्रीमान् लाहुर हुन्थ्यो। अर्को पटक छुट्टी आउँदा छोरा वा छोरी ३ वर्षको भइसक्थ्यो। घर छुट्टी आएका लाहुरेलाई आफ्नै सन्तानले चिन्दैनथे । यस्तै हुँदै पेन्सन आएपछि घर परिवार पाल्नका लागि फेरि विदेश जानु पर्थ्यो। एक बोरा चामल पनि नआउने पेन्सन थियो । न्यूनतम पेन्सन र सधैँ बाबु बिना नै हुर्केका सन्तान भएर कुलतमा लाग्ने, राम्रो शिक्षा लिन नसक्ने धेरै भए,’ घलेले भनिन् ।
उनले श्रीमान् गुमाउँदाको कथा यसरी सुनाउँदा सबै भावुक भएका थिए। ‘हाम्रो समस्याहरू सबै लिखित रूपमा बुझाइसकिएको छ। लेबर सरकारले आलटाल गर्नु भएन,’ उनले भनिन् ।
एपीपीजीका चेसर बेकरले धेरैनै चासो लिएर सुनेकी थिइन् । ‘म सधैँ तपाईहरुको पक्षमा बोल्नेछु। गोर्खाहरूलाई अन्याय भएको थाहा छ। मलाई सक्दो प्रमाणहरू उपलब्ध गराइदिनुहोस्। नेपाल सरकार, रक्षा मन्त्रालय र जी१० बिचमा सक्दो वातावरण बनाउनेछु,’ उनले भनिन् ।
बैठक व्यावहारिक भयो भन्दै आयोजकलाई उनले धन्यावाद दिइन् ।
-1734963296.jpg)
-1734881218.jpg)
-1734972680.jpg)
-1735055731.jpg)
-1733556964.jpg)
-1733678017.jpg)
