बेलायत, नेपाललगायत विश्वभर बुद्ध जयन्ती मनाइँदै

कर्मभूमि बेलायत

Home
कर्मभूमि बेलायत
बेलायत, नेपाललगायत विश्वभर बुद्ध जयन्ती मनाइँदै

बेलायत, नेपाललगायत विश्वभर बुद्ध जयन्ती मनाइँदै

गोर्खा मिडिया संवाददाता शुक्रबार, वैशाख २२, २०८०

लन्डन । शान्तिका अग्रदूतका रूपमा विश्वमा परिचित सिद्धार्थ गौतमको २५६७औँ जयन्ती आज (शुक्रबार) भगवान् विष्णुको नवौँ अवतारका रूपमा जन्म लिएका बुद्धको पूजा, आराधना एवं प्रवचन गरी बेलायत, नेपाल लगायत विभिन्न मुलुकमा मनाइँदै छ । बुद्धिष्ट कम्युनिटी सेन्टर (बीसीसी) युकेले धार्मिक पूजापाठसहित मे ५ शुक्रबारका दिन अल्डरसटस्थित एम्पायर हलमा मनाउँदै छ ।
यस्तै यही ७ मे का दिन डाइमण्ड बुद्धिस्ट सेन्टर यूकेको आयोजनामा बुद्ध पूजा वाचन, आयु अभिषेक तथा जीवन दर्शनसम्बन्धी प्रवचन कार्यक्रम राखिएको अध्यक्ष योगेश गुरुङले जानकारी दिएका छन् । उनका अनुसार बौद्ध गुरुङ खेन्छेन पेमा शेरब रिन्पोछे र रिन्पोछे शिर लामाले प्रवचन दिनेछन् ।

प्रत्येक वर्ष वैशाख शुक्ल पूर्णिमाका दिन बुद्ध जयन्ती मनाइन्छ । सिद्धार्थ गौतमले विश्व शान्ति स्थापनाका लागि पुर्‍याएको योगदानको स्मरणस्वरूप यो पर्व मनाउने गरिएको हो । बुद्धको जन्म, ज्ञान प्राप्ति, महापरिनिर्वाण (मुत्यु) वैशाख शुक्ल पूर्णिमाकै तिथिमा परेकाले यस दिन नेपाललगायत विश्वका बौद्ध धर्मावलम्बीले बुद्धप्रति भावपूर्ण श्रद्धा र भक्तिले बुद्ध जयन्ती मनाउने गर्दछन् । “अहिंसा नै शान्ति र मैत्रीको आधारशिला हो”, यस्ता अनेकौँ कालजयी सन्देशका वाहक भगवान् गौतम बुद्धको २५६७औँ जयन्ती शान्तिको कामना गर्दै आज देशभर मनाउन लागिएको हो ।

बौद्ध धर्मावलम्बीले चैत्य, गुम्बा, विहारलगायत स्थलमा लामा एवं बौद्ध धर्मगुरु बसेर परम्परादेखि हुँदै आएको पूजालगायत विधि पूरा गरिन्छ । आम मानिसलाई बेलुकी घरमा दीपावली गरेर बुद्ध जयन्ती मनाउन सरकारले आह्वान गरेको छ । यस अवसरमा नेपालका लुम्बिनी, स्वयम्भू, बौद्धलगायत स्थलमा विविध कार्यक्रम आयोजना गरी बुद्ध जयन्ती मनाउने परम्परा छ । इसापूर्व ५६३ अर्थात् आजभन्दा २५६७ वर्षअघि रुपन्देही जिल्लास्थित लुम्बिनी उद्यानमा पिता राजा शुद्धोधन र माता मायादेवीको गर्भबाट वैशाख शुक्ल पूर्णिमाका दिन सिद्धार्थ गौतमको जन्म भएको थियो । राजकुमारका रूपमा जन्म लिएका सिद्धार्थ गौतम मानिसले पाएका दुःख देखेर चिन्तित बने । उनान्तीस वर्षको उमेरमा दरबार छोडी तपस्याका लागि निस्केका थिए ।

प्रकाशित मिति: शुक्रबार, वैशाख २२, २०८० १३:५१

प्रतिक्रिया दिनुहोस्