काठमाडौँ। पूर्वगोर्खा सैनिक तुलसी गुरुङले तेक्वान्दोको सर्वोच्च उपाधि ९ डान प्राप्त गरेका छन् । यससँगै गुरुङ तेक्वान्दोको सबैभन्दा माथिल्लो र अन्तिम उपाधि पाउने पहिलो नेपाली खेलाडीसमेत बनेका छन् ।
गुरुङले गत डिसेम्बरमा ९ डान प्राप्तिका लागि दक्षिण कोरियास्थित विश्व तेक्वान्दो महासंघमा प्रयोगात्मक र लिखित परीक्षा दिएका थिए । महासंघले चैत ११ मा नतिजा सार्वजनिक गरेको हो । आगामी जुनमा आयोजना हुने कार्यक्रममा गुरुङलाई प्रमाणपत्र प्रदान गरिनेछ ।
ओलम्पियन दीपक विष्ट अहिलेसम्म कुनै पनि नेपालीले ७ डानभन्दा माथि प्राप्त गर्न नसकेको बताउँछन् । ७ डान प्राप्त गरिसकेपछि ८ डानका लागि ७ वर्ष, ९ डानका लागि ८ वर्ष तेक्वान्दोमै निरन्तर क्रियाशील रहनुपर्नेसमेत हुन्छ ।
गुरुङको सफलताले तेक्वान्दोप्रति समर्पित खेलाडी र देशकै शिर उँचो बनाएको उनले बताए । यो उपाधि प्राप्त गर्ने व्यक्तिलाई संसारभर अत्यन्तै सम्मानजनक रूपमा ग्रान्डमास्टरका नामले सम्बोधन गरिन्छ ।
नेप्लिज तेक्वान्दो महासंघका अध्यक्ष दीपक खड्काले पनि तुलसी गुरुङबाहेक अरू कसैले ९ डान प्राप्त गरेको जानकारी नभएको बताए । १७ वर्षको उमेरदेखि तेक्वान्दोमा सक्रिय गुरुङले ९ डान परीक्षा पास गर्न सफल भएकोमा खुशी व्यक्त गरे ।
६३ वर्षीय हाल गुरुङ हङकङमा बस्दै आएका छन् । उनी हङकङ तेक्वान्दोका प्रमुख प्रशिक्षकसमेत भइसकेका छन् । उनी सन् १९८२ र १९८३ मा आयोजित ‘हङकङ ओपन ब्ल्याक बेल्ट कम्पिटिसन’ का स्वर्ण पदक विजेतासमेत हुन् ।
सन् १९८३ मा उनले हङकङको प्रतिनिधित्व गर्दै डेनमार्कको कोपनहेगनमा आयोजित ‘वर्ल्ड तेक्वान्दो च्याम्पियनसिप’ मा सहभागिता जनाएका थिए ।
सन् २००१ मा गुरुङले ‘हङकङ नेप्लिज तेक्वान्दो महासंघ’ दर्ता गरेका थिए । त्यसयता उनको प्रशिक्षणमा दुई हजारभन्दा बढीले ब्ल्याक बेल्ट लिइसकेका छन् ।
नेपाली खेलकुदमा समेत उनले इतिहास रचेका छन् । २०४० सालमा पोखरामा आयोजित दोस्रो राष्ट्रिय खेलकुदमा गुरुङले मार्सल आट्र्सतर्फ स्वर्ण पदकसहित उत्कृष्ट फाइटरको उपाधि जितेका थिए ।
![गोर्खा कप [कविता]](https://gurkhamedia.com/uploads/posts/ratna-gurung-1744036920.jpg)
![बेलायतमा यसरी गरियो २३ औं गोर्खा कपको तयारी [तस्बिरहरु]](https://gurkhamedia.com/uploads/posts/499424413_1092272429592350_8697503704045963673_n-1748110033.jpg)
![एनआरएनएको एकता महाधिवेशनबाट अध्यक्षमा महेशकुमार श्रेष्ठ निर्विरोध [विजयी सूची]](https://gurkhamedia.com/uploads/posts/Mahesh-shrestha-1746337658.jpg)
